জামুগুৰিহাট জামুগুৰিহাটৰ মহিলাৰ কল্যাণাৰ্থে গঠিত অগ্ৰণী অনুষ্ঠান সত্যসন্ধ্যা মহিলা সমিতিয়ে মহামাৰী ক’ৰ’ণাৰ বিৰুদ্ধে সন্মুখৰপৰা যুঁজ দিয়া চিকিৎসক, স্বাস্থ্যকৰ্মী, আৰক্ষী বিষয়া আৰু আৰক্ষীৰ জোৱানসকলক একোখনকৈ গামোছাৰে সম্বৰ্ধনা জনোৱাৰ লগতে প্ৰতিগৰাকী বিষয়া-কৰ্মচাৰীক মাস্ক প্ৰদান কৰে৷ ক’ৰ’ণাৰ বিৰুদ্ধে হোৱা যুঁজখন জামুগুৰি আৰক্ষী থানাত কৰ্তব্য সমাপন কৰি থকা চিকিৎসক ডাঃ হৰেণ শইকীয়া, জামুগুৰি আৰক্ষী থানাৰ ভাৰপ্ৰাপ্ত আৰক্ষী বিষয়া মানিক বৰমুদৈকে ধৰি কৰ্মৰত স্বাস্থ্যকৰ্মী, নাৰ্চ তথা আৰক্ষীৰ জোৱানসকলক প্ৰত্যেককে গামোছাৰে সম্বৰ্ধনা জনাই উৎসাহিত কৰাৰ লগতে সত্যসন্ধ্যা মহিলা সমিতিৰ বিষয়ববীয়া, সদস্যাসকলে মাস্ক প্ৰদান কৰে৷ লকডাউনৰ সম্পূৰ্ণ নীতি নিয়ম পালন কৰি সামাজিক দূৰত্ব বৰ্তাই ৰাখি সম্বৰ্ধনা আৰু মাস্ক বিতৰণৰ এই কাৰ্যসূচীত সত্যসন্ধ্যা মহিলা সমিতিৰ সভানেত্ৰী নিৰু শৰ্মা, সম্পাদিকা বৰষা গোস্বামী ভাগৱতী, উপদেষ্টা সুৰ বৰুৱা, উপ সভানেত্ৰী ফুল মহন্ত, সহকাৰী সম্পাদিকা ৰুমী দেৱী, সদস্যা জুৰি বৰা, নাৰী সুৰক্ষা সভানেত্ৰী ৰুমী কটকী আৰু যুৱ সমাজকৰ্মী ৰাজেশ শৰ্মাও উপস্থিত আছিল৷ আনহাতে পূৱ মুঢ়াদল গাঁও পঞ্চায়তৰ জীৱিকা সখী মালা বৰাইও প্ৰশংসনীয় পদক্ষেপ গ্ৰহণ কৰিচে৷ জীৱিকা সখীগৰাকীয়ে শিয়ালমাৰী গাঁৱত কণ কণ শিশু আৰু গৰ্ভৱৰ্তী মহিলাক শতাধিক মাস্ক আৰু পৰিয়ালবোৰক ছেনিটাইজাৰ বিতৰণ কৰে৷ মাস্ক কিদৰে ব্যৱহাৰ কৰিব লাগে আৰু ছেনিটাইজৰৰে কিদৰে হাত ধোৱ লাগে শিশু তথা গৰ্ভৱতী মহিলাসকলক তাৰো প্ৰশিক্ষণ দিয়ে জীৱিকা সখি মালা বৰাই৷
জামুগুৰিহাটৰ সত্যসন্ধ্যা মহিলা সমিতিৰ উদ্যোগত চিকিৎসক, আৰক্ষীক সম্বৰ্ধনা : মাস্ক-ছেনিটাইজাৰ বিতৰণ
দিছপুৰ প্ৰেছ ক্লাবৰ উদ্যোগত বশিষ্ট মন্দিৰৰ কপিকুলৰ মাজত খাদ্য সামগ্রী বিতৰণ
গুৱাহাটীদিছপুৰ প্ৰেছ ক্লাবৰ উদ্যোগত সোমবাৰে বশিষ্ট মন্দিৰৰ কপিকুলৰ মাজত খাদ্যসামগ্রী বিতৰণ কৰা হয়। এই কাৰ্যসূচীত দিছপুৰ প্ৰেছ ক্লাবৰ সম্পাদক কুঞ্জ মোহন ৰায়, জ্যেষ্ঠ সাংবাদিক চন্দ্ৰ শইকীয়া, ধ্ৰুৱজ্যোতি পাঠক, ধ্ৰুৱজ্যোতি দাস, সমাজকৰ্মী সুকমল বসুমতাৰী, সাংবাদিক লীনা গগৈ, হালিমা বেগম, অনুপমা ডেকা, মাইনা গোস্বামী, কৰবী বৰশইকীয়া আদি উপস্থিত থাকে। মন্দিৰ প্ৰাংগণত থকা কপিকুলৰ লগতে ছাগলী, পাৰ চৰাই আৰু তাত উপস্থিত কিছুসংখ্যক দুখীয়া লোকৰ মাজতো বুট, কল,পাউৰুটি আদি বিতৰণ কৰা হয়।
লকডাউনত শিৱসাগৰত আৰ্তজনক খাদ্য সামগ্ৰী বিতৰণ ফিনিক্স ক্ৰিকেট কচিং ক্লাবৰ
শিৱসাগৰ শিৱসাগৰৰ অন্যতম ক্ৰীড়া অনুষ্ঠান ফিনিক্স ক্ৰিকেট কচিং ক্লাবে দেওবাৰে দিন হাজিৰা কৰি জীৱন নিৰ্বাহ কৰা আৰু অতি দৰিদ্ৰ পৰিয়ালৰ মাজত অত্যাৱশ্যকীয় সামগ্ৰী বিতৰণ কৰে। ফিনিক্স ক্ৰিকেট কচিং ক্লাবৰ সকলো সদস্য তথা প্ৰশিক্ষাৰ্থীসকলে নিজাববীয়া কৈ অৰ্থ সংগ্ৰহ কৰি চেণ্টাৰৰ প্ৰশিক্ষক পবিত্ৰ দত্তৰ উদ্যোগত দেওবাৰে শিৱসাগৰৰ মেটেকা অঞ্চলৰ প্ৰায় ২৫ টা দিন হাজিৰা কৰা তথা দৰিদ্ৰ পৰিয়ালৰ মাজত চাউল, দাইল, মিঠাতেল, নিমখ, চাবোন, বিস্কুট আদি অত্যাৱশ্যকীয় সামগ্ৰী বিতৰণ কৰে। লকডাউনৰ সময়ত ফিনিক্স ক্ৰিকেট কচিং ক্লাবে কেৱল খেলৰ লগতে জড়িত নহৈ আৰ্তজনক সহায় আগবঢ়োৱা কাৰ্যক শিৱসাগৰবাসীয়ে প্ৰশংসা কৰিছে।
বোকাখাত আঞ্চলিক ছাত্ৰ সন্থাৰ উদ্যোগত ৰাজ্যিক ভিত্তিত ছাত্ৰ ছাত্ৰীৰ মাজত বিশেষ অনলাইন মেধা পৰীক্ষা সম্পন্ন
বোকাখাতকভিড-১৯ক ৰোধিবলৈ দেশত চলি থকা তৃতীয় পৰ্যায়ৰ লকডাউনে সমাজৰ বৌদ্ধিক অগ্ৰগতিক স্থবিৰ কৰাৰ পথত। সেয়েহে সম্প্ৰতি ঘৰতে সোমাই থাকি টেলিফোন আৰু ইণ্টাৰনেটক সাৰথি কৰি লৈছে সমাজৰ সচেতন নাগৰিকে। ৰাজ্যখনৰ অনেক স্থানত এতিয়া ছাত্ৰ-ছাত্ৰীৰ বাবে অনলাইন শ্ৰেণী আৰু পৰীক্ষা পাতিছে শিক্ষা বিভাগে। কিয়নো লকডাউনৰ শেষ হোৱাৰ পাছৰ পৰিস্থিতিয়ে যাতে অনৰ্থক ইতি পেলাব নোৱাৰে ছাত্ৰ-ছাত্ৰীৰ এটাকৈ সোণালী শিক্ষাবৰ্ষ। এই ক্ষেত্ৰত অগ্ৰণী ভূমিকা গ্ৰহণ কৰিছে গোলাঘাট জিলা মাধ্যমিক শিক্ষা বিভাগে। তদ্ৰুপ ব্যৱস্থাৰে ছাত্ৰ ছাত্ৰীৰ মেধা শক্তি আৰু প্ৰতিভাক উজ্জীৱিত কৰাৰ প্ৰচেষ্টাৰে বোকাখাত আঞ্চলিক ছাত্ৰ সন্থাৰ উদ্যোগত অনুষ্ঠিত হৈ গ’ল নৱম আৰু দশম শ্ৰেণীৰ ছাত্ৰ ছাত্ৰীৰ বাবে ৰাজ্যিক ভিত্তিত বিশেষ অনলাইন মেধা পৰীক্ষা। লক-ডাউনৰ সময়ত ছাত্ৰ ছাত্ৰীৰ সময়ৰ যাতে সদ্ব্যৱহাৰ হয় আৰু শৈক্ষিক দিশত আগবাঢ়িব পাৰে সেই উদ্দেশ্যেই অনুষ্ঠিত কৰা হৈছিল এই বিশেষ মেধা পৰীক্ষা। যোৱা ৩ মে’ৰ পুৱা দহ বজাৰ পৰা ৰাজ্যখনৰ বিভিন্ন বিদ্যালয়সমূহৰ নৱম আৰু দশম শ্ৰেণীৰ ছাত্ৰ-ছাত্ৰীৰ মাজত সাধাৰণ গণিত, সাধাৰণ বিজ্ঞান, ইংৰাজী আৰু সাধাৰণ জ্ঞান বিষয়ত অনলাইন পদ্ধতিৰে অনুষ্ঠিত হোৱা এই মেধা পৰীক্ষাত তিনি শতাধিক ছাত্ৰ-ছাত্ৰীয়ে অংশগ্ৰহণ কৰে। অসমীয়া আৰু ইংৰাজী দুয়োটি মাধ্যমতে অনুষ্ঠিত কৰা হৈছিল এই অনলাইন পৰীক্ষা। উল্লেখ্য যে এই মেধা পৰীক্ষাত প্ৰথম, দ্বিতীয় আৰু তৃতীয় স্থান প্ৰাপ্তসকলক একোটিকৈ কিতাপৰ টোপোলা আৰু একোখনিকৈ মানপত্ৰৰে সম্বৰ্দ্ধনা জনোৱা হ’ব আৰু এই পৰীক্ষাত অৱতীৰ্ণ হোৱা প্ৰতি গৰাকী পৰীক্ষাৰ্থীলৈ স্বীকৃতি হিচাপে একোখনিকৈ মানপত্ৰ প্ৰদান কৰা হ’ব বুলি ছাত্ৰ সংগঠনটোৰ তৰফৰ পৰা জানিবলৈ দিছে। বোকাখাত আঞ্চলিক ছাত্ৰ সন্থাৰ এনে মহৎ প্ৰচেষ্টাৰ বোকাখাতৰ লগতে ৰাজ্যখনৰ সচেতন মহলে শলাগ লৈছে।
তৃতীয় পৰ্যায় লকডাউনৰ সময়ত বোকাজানত জনসমাগম : ৰাস্তাত গাড়ী মটৰৰ পয়োভৰ
বোকাজান
ক’ৰ’ণা ৰোধৰ বাবে পৰা তৃতীয় পৰ্যায় লকডাউনৰ আৰম্ভণি সময়ত বোকাজানৰ ৰাস্তা-ঘাট, হাতে-বজাৰে ৰাইজৰ জনসমাগম দেখিবলৈ পোৱা গৈছে। স্বতঃস্ফূৰ্তভাৱে একাংশ লোকে দুচকীয়া, চাৰিচকীয়া বাহন লৈ বোকাজান মূল নগৰৰ লগতে বিভিন্ন স্থানত ভিৰ কৰি বজাৰ সমাৰো কৰা দেখা গৈছে। কিছু দায়িত্ব জ্ঞান নথকা ব্যক্তিয়ে অকৰ্তৃত্বশীলভাৱে দুচকীয়া বাহনত দুজন কৈ আৰোহী যাত্ৰা কৰাৰ লগতে ছুপাৰ মাৰ্কেট, ইকৰাণী বস্তি আদিত সৰুকৈ হ’লেও পাচলিৰ বজাৰ বহা পৰিলক্ষিত হৈছে। ইফালে চৰকাৰে ঘৰৰ বাহিৰলৈ ওলালে ই মুখত মাস্ক পৰিধান কৰাতো বাধ্যতামূলক কৰিছে যদিও বহু লোকে এই নিৰ্দেশ অমান্য কৰি আৰক্ষীৰ কৰ্কথনা-সতৰ্কৰ সন্মুখীন হ’ব লগীয়া হৈছে। অৱশ্যে কাৰ্বি আংলং জিলা গ্ৰীণ জ’নত থকাত জিলা প্ৰশাসনে জিলাখনত কেতবোৰ ব্যৱস্থাত প্ৰয়োজনীয় শিথিলতা প্ৰদান কৰিছে যদিও আইন উলংঘাকাৰীক কঠোৰ শাস্তি বিহাৰ বাবে কৰ্তৃপক্ষক নিৰ্দেশ দিয়া বুলি জানিব পৰা গৈছে।
গোলাঘাটত সৰ্বভাৰতীয় পৰ্যায়ৰ অনলাইন কুইজ প্ৰতিযোগিতা
গোলাঘাটদেশজুৰি চলি থকা লকডাউনৰ পৰিপ্ৰেক্ষিতত সকলো লোক নিজৰ ঘৰৰ ভিতৰতে আবদ্ধ হৈ থাকিবলগীয়া হৈছে। নিজ নিজ কৰ্মব্যস্ততাৰ পৰা দীৰ্ঘদিন ধৰি আঁতৰি থাকি বহুলোকে বিৰক্ত অনুভৱ কৰিবলৈ ধৰিলে। বিশেষকৈ যুৱচামৰ বাবে ঘৰৰ ভিতৰতে সোমাই থকাটো বৰ কষ্টকৰ হৈ পৰিছে৷ এনে প্ৰেক্ষাপটত গোলাঘাটৰ কেইজনমান কুইজপ্ৰেমী যুৱকে ঘৰৰ ভিতৰতে আবদ্ধ হৈ থাকিবলগীয়া হোৱাসকলৰ কিছু মানসিক উৎকৰ্ষ সাধনৰ উদ্দেশ্যে গ্ৰহণ কৰিলে এক ব্যতিক্ৰমী পদক্ষেপ। গোলাঘাটৰ বিশ্বজিৎ পূজাৰী, চায়েদ নেকিব আৰু শৰৎ চেতিয়াৰ দ্বাৰা গঠিত ইকুইনক্স নামৰ কুইজ ক্লাবৰ উদ্যোগত সৰ্বভাৰতীয় পৰ্যায়ত অনুষ্ঠিত কৰা হ’ল ‘জ্ঞান মন্থন ১.০’ শীৰ্ষক এখনি হোম কোৱাৰেণ্টাইন অনলাইন কুইজ প্ৰতিযোগিতা। এই প্ৰতিযোগিতাত অসমৰ লগতে ভাৰতৰ বিভিন্ন ৰাজ্যৰ কুইজ প্ৰতিযোগীয়ে অংশগ্ৰহণ কৰে। প্ৰতিযোগীসকলৰ বিনামূলীয়া অনলাইন পঞ্জীয়ন কৰা হয় আৰু যোৱা ৩ মে’, দেওবাৰে দুপৰীয়া ১২ বজাত প্ৰতিযোগিতাখন অনুষ্ঠিত কৰা হয়। মুঠ ৪৫ মিনিট সময়ৰ এই অনলাইন কুইজ প্ৰতিযোগিতাখনত প্ৰতিযোগীসকলে গুগল লিংক যোগে প্ৰশ্নসমূহ নিজৰ ই মেইলত লাভ কৰে আৰু উত্তৰসমূহ কৰি একেটা লিংকৰ জৰিয়তে ইকুইনক্সলৈ প্ৰেৰণ কৰে। আজি উদ্যোক্তাসকলে কুইজ প্ৰতিযোগিতাখনৰ ফলাফল ঘোষণা কৰে। ফলাফল অনুসৰি প্ৰথম তিনিটা স্থান অধিকাৰ কৰে তেজপুৰ বিশ্ববিদ্যালয়ৰ ছাত্ৰ ক্ৰমে ৰাজীৱ উল আৱাল, মৃদুল শৰ্মা আৰু অভিলাষ দাসে। আনহাতে টপ টেন স্থান লাভ কৰাসকল হৈছে ক্ৰমে গোলাঘাট ৰিলায়েন্স কনিষ্ঠ মহাবিদ্যালয়ৰ আকাশ আলী হাজৰিকা, শংকৰদেৱ শিশু নিকেতন গোলাঘাটৰ লয়ন জ্যোতি দত্ত, ডি আৰ কলেজ গোলাঘাটৰ স্বাগত প্ৰতীম বৰা, আইডল গুৱাহাটী বিশ্ববিদ্যালয়ৰ নেহা শৰ্মা, বাংগালোৰৰ ইনফ’চিছত কৰ্মৰত ভাৰ্গৱ শইকীয়া, গুৱাহাটী বিশ্ববিদ্যালয়ৰ আইন মহাবিদ্যালয়ৰ অশ্বিনী কুমাৰ শৰ্মা, দৰং কলেজৰ অভিজিৎ শৰ্মা আৰু ডিব্ৰুগড় বিশ্ববিদ্যালয়ৰ জ্ঞানদীপ কলিতা। বিজয়ী প্ৰতিযোগীসকলৰ লগতে এই অনলাইন কুইজ প্ৰতিযোগিতাখনত অংশ গ্ৰহণ কৰা সকলোকে উদ্যোক্তাসকলে ধন্যবাদ আৰু কৃতজ্ঞতা জ্ঞাপন কৰে। ইকুইনক্স কুইজ ক্লাবৰ এনে ব্যতিক্ৰমী প্ৰচেষ্টাৰ শলাগ লৈছে সকলোৱে।
লকডাউনৰ মাজতো মঙলদৈত মানৱতাৰ জয়গান : ইউনিটিৰ ৫২ সদস্যৰ ৰক্তদান
মঙলদৈ বিশ্ব চৌদিশে ক’ৰ’ণা ভাইৰাছৰ প্ৰাদুৰ্ভাৱৰ মাজতো ‘ইউনিটি- উই দ্যা ব্লাড ড’নাৰছ’- নামৰ স্বেচ্ছাসেৱী সংগঠনটোৱে গাইছে মানৱতাৰ জয়গান। লকডাউনৰ সময়ছোৱাত আজিলৈ ৫২ জন সদস্যই মঙলদৈ অসামৰিক চিকিৎসালয়, গোলাঘাট অসামৰিক চিকিৎসালয় আৰু গুৱাহাটীৰ বিভিন্ন হাস্পতাললৈ গৈ মৃত্যুমুখী ৰোগীক ৰক্তদান কৰি জীয়াই থকাৰ প্ৰেৰণা যোগাইছে। ৩৫ সংখ্যক জন্মদিনত জীৱনত প্ৰথমবাৰলৈ ৰক্তদান কৰিছে মঙলদৈ উপহুপাৰা নিবাসী তৃষ্ণা হাজৰিকাই। মঙলদৈ অসামৰিক চিকিৎসালয়লৈ আহি হাস্যবদনে ৰক্তদান কৰি তৃষ্ণা হাজৰিকাই কয়, জীৱনত বহু ধৰণে জন্মদিন পালন কৰিছো যদিও ৰক্তদান কৰি জন্মদিন পালন কৰাৰ দৰে সুখানুভূতি কাহানিও পোৱা নাই। আনহাতে লকডাউনৰ সময়ছোৱাত ইউনিটিৰ সভাপতি দীপক কুমাৰ ডেকা, সদস্য ক্ৰমে তাপস শৰ্মা, চিণ্টুমণি ডেকা, বিতুপন ডেকা, নব কুমাৰ শৰ্মা, হিমাংশু চহৰীয়া, মানসপ্ৰতীম ভৰদ্বাজ, দ্বীপজ্যোতি বৰুৱা, দিলীপ চহৰীয়া, বিজয় চান্দ, পাপ্পু ৰাভা, সুজিত শৰ্মা, ভাস্কৰজ্যোতি ডেকা, ৰিকিবুল হুছেইন, প্ৰণব বৰুৱা, জিতু কলিতা, দ্বীপজ্যোতি শৰ্মা, মৃদুল ডেকা, জগদীশ মণ্ডল, দীপক কলিতা, বিশ্বজিৎ নাথ, কমল কৃষ্ণ নাথ, তাপস ডেকা, সুমন ডেকা, ৰিতুল ৰহমান, কুশল ডেকা, পাৰ্থপ্ৰতিম দাস, মনচুৰাং বড়ো, জিতুমণি দাস, প্ৰণব বৰুৱা, প্ৰণব চহৰীয়া, হিমাংশু নাৰায়ণ দেৱ, জয় প্ৰকাশ কলিতা, দুৰ্গা ডেকা, প্ৰবণ শৰ্মা, বিপুল বৰা, ধনমণি ডেকা, টিমল চৌহান, অনুপজ্যোতি শইকীয়া, প্ৰশান্ত বণিয়া, দ্বীপেন বৰুৱা, ৰেবজিৎ বৰা, ৰিদিপ বৰুৱা, ভাস্কৰজ্যোতি ডেকা, বিকাশ বৰুৱা, গকুল কলিতা, নিৰুপমা ভৰদ্বাজ, দ্বীপেন ডেকা, ধনমণি দাস, ফনীন্দ্ৰ ডেকাই ৰক্তদান কৰি মানৱতাৰ নিদৰ্শন দাঙি ধৰে। ইউনিটি – উই দ্যা ব্লাড ড’নাৰ’ছ গ্ৰুপৰ এনে প্ৰশংসনীয় কাৰ্যৰ বাবে গ্ৰুপটোৰ সম্পাদক সুব্ৰত শীলক তেওঁৰ ৩৫ সংখ্যক জন্মদিনত দৰং জিলা ক্ৰীড়া সাংবাদিক সংস্থাৰ সম্পাদক গণেশ দত্তই ফুলাম গামোচাৰে সম্বৰ্ধনা জ্ঞাপন। উল্লেখ্য যে এই গ্ৰুপটোৱে ৰক্তদান কৰাৰ উপৰি শুভাকাংক্ষীৰ সহযোগত লকডাউনৰ সময়ছোৱাত দৰিদ্ৰ লোকৰ লগতে মৎস্য, পশু-পক্ষীলৈ খাদ্য সামগ্ৰী যোগান ধৰি সচেতন ৰাইজৰ প্ৰশংসা বুটলিবলৈ সক্ষম হৈছে।
গুৱাহাটীৰ অমিয় নগৰত দৰিদ্ৰ লোকক সাহায্য ইণ্ডিয়ান বেংকৰ
গুৱাহাটীভাৰতৰ জনগণ ক’ভিড-১৯ ৰোধ কৰাৰ যুঁজ অব্যাহত ৰাখিছে৷ আনহাতে ক’ভিড-১৯ক ৰোধ কৰাৰ অৰ্থে দেশজুৰি লকডাউন অব্যাহত আছে৷ সোমবাৰৰ পৰা তৃতীয় পৰ্যায়ৰ লকডাউন আৰম্ভ হৈছে৷ ইপিনে, লকডাউন অব্যাহত থকাত দৰিদ্ৰ লোকসকলৰ অৱস্থা শোচনীয় হৈ পৰিছে৷ এনে সময়ত দৰিদ্ৰ লোকসকলক বিভিন্ন ব্যক্তি আৰু সংগঠন, অনুষ্ঠান প্ৰতিষ্ঠানে সহায়ৰ হাত আগবঢ়াইছে৷ উল্লেখ্য যে সোমবাৰে ইণ্ডিয়ান বেংকৰ তৰফৰ পৰা গুৱাহাটী মহানগৰীৰ অমিয় নগৰৰ হিল টপত দৰিদ্ৰ লোকক সাহায্য প্ৰদান কৰে৷ ইণ্ডিয়ান বেংকৰ গুৱাহাটী মহানগৰী শাখা আৰু মাণ্ডলীক কাৰ্যালয়ৰ তৰফৰ পৰা এই সাহায্য প্ৰদান কৰা হয়৷ ইণ্ডিয়ান বেংকৰ গুৱাহাটী মহানগৰী শাখাৰ প্ৰবন্ধক আৰু মাণ্ডলীক প্ৰবন্ধকে উক্ত স্থানৰ দৰিদ্ৰ সীমাৰেখাৰ তলৰ লোকক বিভিন্ন খাদ্য সামগ্ৰী বিতৰণ কৰে৷ বেংকটোৰ তৰফৰ পৰা এনেদৰে সাহায্য বিতৰণ কৰাত বিভিন্ন লোকে ভূয়সী প্ৰশংসা কৰিছে৷
জামুগুৰিহাটৰ শলগুৰিত দুৰ্ঘটনাত চালকসহ আহত ২
জামুগুৰিহাটলকডাউনৰ নীতি নিয়ম বহুখিনি শিথিল কৰাৰ প্ৰথম দিনটতেই জামুগুৰিহাটৰ শলগুৰিৰ ১৫ নং ৰাষ্ট্ৰীয় ঘাইপথত এক পথ দুৰ্ঘটনা সংঘটিত হয়৷ জামুগুৰিহাটৰ পৰা তেজপুৰ অভিমুখী এএছ-০১-ডিএন ৩১৩৩ নম্বৰৰ তীব্ৰ বেগী এখন ছুইফট ডিজায়াৰ গাড়ী নিয়ন্ত্ৰণ হেৰুৱাই ৰাষ্ট্ৰীয় ঘাইপথৰ কাষৰ গছত খুন্দা মৰাত গুৰুতৰভাৱে আহত হয় চালক নলবাৰীৰ চন্দন বৰ্মণ (৩৬) আৰু ৰঙীয়াৰ দ্বীপেন তালুকদাৰ (৩২)৷ তীব্ৰবেগী গাড়ীখনৰ খুন্দাৰপৰা অৱশ্যে কথমপি ৰক্ষা পৰে স্থানীয় এগৰাকী লোক৷ আহত লোক দুজনক আৰক্ষীয়ে উত্তৰ জামুগুৰি প্ৰাথমিক চিকিৎসালয়ত ভৰ্ত্তি কৰায়৷ চালকজনে মদ্যপান কৰি গাড়ী চলোৱাৰ বাবেই দুৰ্ঘটনাটো সংঘটিত হয় বুলি স্থানীয় ৰাইজে মত প্ৰকাশ কৰিছে৷ জানিব পৰা মতে ছুইফট ডিজায়াৰখন জামুগুৰিহাট দিশৰপৰা ৰঙাপাৰলৈ গৈছিল৷
অৱসৰপ্ৰাপ্ত শিক্ষক বিশিষ্ট সমাজ কৰ্মী ৰামচন্দ্ৰ বৰুৱাৰ মৃত্যু
শিৱসাগৰ
জোলাটুপ প্ৰাথমিক বিদ্যালয়ৰ অৱসৰপ্ৰাপ্ত প্ৰধান শিক্ষক ৰামচন্দ্ৰ বৰুৱাৰ সোমবাৰে পুৱা ১০ বজাত ডিমৌমুখ চেঁচাসত্ৰৰ নিজা বাসগৃহত মৃত্যু হয়। মৃত্যুৰ সময়ত ৰামচন্দ্ৰ বৰুৱাৰ বয়স আছিল ৬৬ বছৰ। কিছুদিন ধৰি ৰামচন্দ্ৰ বৰুৱা বহুমূত্ৰ ৰোগত আক্ৰান্ত হৈ আছিল। জীৱিত কালত ৰামচন্দ্ৰ বৰুৱাই সৃজনী মইনা পাৰিজাতৰ প্ৰতিষ্ঠাপক বিষয়ববীয়া আৰু স্থানীয় শ্ৰীশ্ৰী শংকৰদেৱ কৃষ্টি বিকাশ কেন্দ্ৰৰ ৰাস পৰিচালনা সমিতিৰ অন্যতম বিষয়ববীয়া হিচাপেও অৰিহণা যোগাইছিল৷ ঐতিহাসিক অসম আন্দোলনৰ সময়ত দিচাং ধাইআলি অঞ্চলত বৰুৱাই আন্দোলনত অংশ গ্ৰহণ কৰি আন্দোলনৰ এজন সমৰ্থক ৰূপে পৰিচিত হৈছিল। ৰামচন্দ্ৰ বৰুৱাৰ মৃত্যুত দিচাংমুখ প্ৰেছ ক্লাব, গ্ৰাম্য সাংবাদিক সন্থা, মৰিয়া ছাত্ৰ সন্থাৰ শিৱসাগৰ জিলা সমিতি, সদৌ অসম ছাত্ৰ সন্থাৰ দিচাংধাই আলি আঞ্চলিক সমিতি, আটাছুৰ দিচাং ধাই আলি আঞ্চলিক সমিতি , চুতীয়া জাতি সন্মিলনীৰ বিষয়ববীয়া পৰাগ শইকীয়া, ডিমৌমুখ হাইস্কুলৰ শিক্ষক বৃন্দ, সৰবৰহী মহিলা ৰুচিমাই বেগম, চেচঁসত্ৰ নামঘৰ পৰিচালনা সমিতি আদি বহু অনুষ্ঠান প্ৰতিষ্ঠানে শোক প্ৰকাশ কৰিছে। মৃত্যুৰ সময়ত বৰুৱাই পত্নীসহ তিনিজন পুত্ৰ, এগৰাকী বোৱাৰী আৰু দুই নাতি-নাতিনীক এৰি থৈ গৈছে।