নাজিৰা : যোৱা ২৫ জুনত ঘোষিত উচ্চতৰ মাধ্যমিক শিক্ষা সংসদৰ চূড়ান্ত পৰীক্ষাৰ ফলাফলত নাজিৰা মহকুমা বালিঘাটস্হিত ‘বেদ’ একাডেমীৰ দুই ছাত্ৰ ক্ৰমে চৈয়দ তাকদীছ নাচিম আৰু মানস প্ৰতীম দত্তই সকলো বিষয়ত লেটাৰ নম্বৰসহ ডিষ্টিংচন লাভ কৰি শিক্ষানুষ্ঠানখনৰ লগতে নাজিৰা মহকুমালৈ গৌৰৱ কঢ়িয়াই আনিছে ।মহাবিদ্যালয়খনৰ পৰা ৫৮ জনে পৰীক্ষাত অৱতীৰ্ণ হৈ ১১ জনে ষ্টাৰসহ ৫২ জনে প্ৰথম, ৫ জনে দ্বিতীয় আৰু ১ জনে তৃতীয় স্হান দখল কৰি এশ শতাংশ ফলাফল কৰিবলৈ সক্ষম হয়৷ মহাবিদ্যালয়খনৰ পৰা পৰীক্ষাত অৱতীৰ্ণ হৈ নাজিৰা নগৰৰ নিবাসী চৈয়দ নেচিম আহমেদ আৰু চৈয়দা তাজ ৰেহিমা খাতুনৰ একমাত্ৰ পুত্ৰ চৈয়দ তাকদীছ নেচিম আৰু নাজিৰা মহকুমাৰ ধিতাইপুখুৰীৰ নিবাসী ৰঞ্জিত দত্ত আৰু জলী দত্তৰ পুত্ৰ মানস প্ৰতীম দত্তই ডিষ্টিংচন লাভ কৰি মহাবিদ্যালয়খনৰ লগতে নাজিৰা মহকুমালৈ গৌৰৱ কঢ়িয়াই আনিছে৷ চৈয়দ তাকদীছ নেচিমে ইংৰাজী, ঐচ্ছিক ইংৰাজী, ৰাসায়ন বিজ্ঞান, পদাৰ্থ বিজ্ঞান আৰু জীৱ বিজ্ঞানত লেটাৰ নম্বৰসহ ডিষ্টিংচন লাভ কৰিবলৈ সক্ষম হয়। নেচিমৰ উত্তীৰ্ণৰ হাৰ হৈছে ৮৪.৪% আনহাতে মানস প্ৰতীম দত্তই অসমীয়া, ৰাসায়ন বিজ্ঞান, পদাৰ্থ বিজ্ঞান আৰু ভূ-বিজ্ঞানত লেটাৰ নম্বৰসহ ডিষ্টিংচন লাভ কৰিবলৈ সক্ষম হয়। মানস প্ৰতীম দত্তৰ উত্তীৰ্ণৰ হাৰ হৈছে ৮৪.৬%। ছাত্ৰ দুজনৰ এনে সফলতাত মহাবিদ্যালয়ৰ শিক্ষক-শিক্ষয়িত্ৰী সকলৰ লগতে নাজিৰা নগৰ আৰু ধিতাইপুখুৰীবাসীয়ে সন্তুষ্টি প্ৰকাশ কৰিছে।

নাজিৰা : হাইস্কুল শিক্ষান্ত পৰীক্ষাত অসমৰ ভিতৰত শীৰ্ষ স্থান লাভ কৰা শিৱসাগৰ জিলাত আনন্দোল্লাসৰ মাজতে ২৫ জুনত ঘোষিত উচ্চতৰ মাধ্যমিকৰ চূড়ান্ত পৰীক্ষাৰ ফলাফল অনুসৰি একেবাৰে দ্বিতীয় বৰ্ষতো সমগ্ৰ অসমৰ ভিতৰত শিৱসাগৰ জিলাই বিজ্ঞান শাখাত শীৰ্ষ স্থান লাভ কৰিবলৈ সক্ষম হৈছে। জিলাখনত বিজ্ঞান শাখাত ৯৫.৯৭ শতাংশ উত্তীৰ্ণৰ হাৰেৰে প্ৰথম স্থান অধিকাৰ কৰাৰ বিপৰীতে কলা শাখাত ৮৮.৬৬ শতাংশ উত্তীৰ্ণৰ হাৰেৰে দ্বিতীয় স্থান আৰু বাণিজ্য শাখাত ৯৫.৫০ শতাংশ উত্তীৰ্ণৰ হাৰেৰে তৃতীয় স্থান অধিকাৰ কৰিবলৈ সক্ষম হয়। শিৱসাগৰ জিলাৰ পৰা বিজ্ঞান শাখাত ১,১৬৭ গৰাকী পৰীক্ষাৰ্থী অৱতীৰ্ণ হোৱাৰ বিপৰীতে ১,১২০ গৰাকী পৰীক্ষাৰ্থী উত্তীৰ্ণ হ’বলৈ সক্ষম হয়। ইয়াৰে প্ৰথম বিভাগত ৭২১ গৰাকী, দ্বিতীয় বিভাগত ৩৩৫ গৰাকী আৰু তৃতীয় বিভাগত ৬৪ গৰাকী উত্তীৰ্ণ হয়। কলা শাখাত জিলাখনৰ পৰা মুঠ ৪,৮২৩ গৰাকী পৰীক্ষাৰ্থী অৱতীৰ্ণ হোৱাৰ বিপৰীতে প্ৰথম বিভাগত ৮৯৯ গৰাকী, দ্বিতীয় বিভাগত ১,৬০৪ গৰাকী আৰু তৃতীয় বিভাগত ১,৭৭২ গৰাকী পৰীক্ষাৰ্থী উত্তীৰ্ণ হয়। আনহাতে বাণিজ্য শাখাত জিলাখনৰ পৰা ৩৩৩ গৰাকী পৰীক্ষাৰ্থী অৱতীৰ্ণ হয়। ইয়াৰে ১০০ গৰাকীয়ে প্ৰথম বিভাগ, ১২০ গৰাকীয়ে দ্বিতীয় বিভাগ আৰু ৯৮ গৰাকীয়ে তৃতীয় বিভাগত উত্তীৰ্ণ হয়। এই সামগ্ৰিক ফলাফলত শিৱসাগৰ জিলাৰ শিক্ষাৰ্থীসকলৰ লগতে অভিভাৱক সকল উৎফুল্লিত হৈ পৰিছে। আনহাতে হাইস্কুল আৰু উচ্চতৰ মাধ্যমিকৰ চূড়ান্ত পৰীক্ষাত উত্তীৰ্ণ হোৱা জিলাখনৰ সমূহ ছাত্র-ছাত্ৰীকে অসম চৰকাৰৰ মন্ত্ৰী যোগেন মহন, অসম বিধান সভাৰ বিৰোধী দলপতি দেৱব্ৰত শইকীয়া,  জিলা শিক্ষা বিষয়া আব্দুল জেলিলে অভিনন্দন জনাইছে। 

উজনি-মাজুলী : ক’ৰণা ভাইৰাচৰ প্ৰভাৱত সমগ্ৰ বিশ্বতেই শিক্ষা আৰু অর্থনীতিৰ ক্ষেত্ৰখনত যথেষ্ট সংকটৰ সন্মুখীন হৈছে৷ এই মহামাৰীয়ে আটাইতকৈ বেছি প্ৰভাৱিত কৰিছে শিক্ষাৰ্থীসকলক৷ বহুতেই ইতিমধ্যে এটা শিক্ষাবৰ্ষ হেৰুৱাই দিয়াৰ আশংকাত ভুগিছে৷ এনে সময়ত বিভিন্ন বৃত্তিমুখী প্ৰশিক্ষণ লৈ থকা প্ৰশিক্ষাৰ্থী সকলো যথেষ্ট লোকচানৰ সন্মুখীন হৈছে৷ তাৰ মাজতে কম্পিউটাৰ আৰু বৃত্তিমুখী শিক্ষাৰ অগ্ৰণী প্ৰতিষ্ঠান আই.চি.ই.য়ে লৈ আহিছে কেইবাটাও সুখবৰ৷ প্ৰথমেই তলাবন্ধৰ সময়চোৱাত তেওঁলোকে প্ৰশিক্ষাৰ্থীসকলক অনলাইন মাধ্যমেৰে পাঠদান কৰি প্ৰশিক্ষাৰ্থী সকলৰ লোকচান যথাসম্ভৱ কম কৰিছে৷ শেহতীয়াকৈ যিকোনো বয়সক লোকেই যাতে ঘৰতে থাকিয়েই কম্পিউটাৰৰ প্ৰশিক্ষণ গ্ৰহণ কৰিব পাৰে তাৰো ব্যৱস্থা কৰিছে প্ৰতিষ্ঠানটোৱে৷ অনলাইন আৰু অফলাইন দুয়োটা ধৰণেৰে উপলব্ধ এই প্ৰশিক্ষণলানিক তেওঁলোকে দুটা ভাগত ভাগ কৰিছে৷ বিদ্যালয় পৰ্যায়ত অধ্যয়নৰত ছাত্ৰ-ছাত্ৰীসকলৰ বাবে তেওঁলোকৰ পাঠ্যক্ৰমৰ ভিত্তিত সজাই তোলা এটা ক’ৰ্চ আৰু পেচাদাৰী ব্যক্তিসকলেও তেওঁলোকৰ কার্যালয়ৰ কাম-কাজ সুচাৰুৰূপে চলাই নিব পৰাকৈ প্ৰয়োজনীয় বিষয় সন্নিবিষ্ট কৰি সজাই তোলা এটা ক’ৰ্চ আগবঢ়াইছে৷ গৃহিণীকে ধৰি অন্যান্য আগ্ৰহীসকলেও এই ক’ৰ্চত নামভৰ্তি কৰাৰ লগতে সন্তানৰ গৃহকৰ্মকে আদি কৰি কম্পিউটাৰৰ সহযোগত কৰিবলগীয়া কামবোৰৰ বাবে অভিভাৱকসকলো এই ক’ৰ্চ দুটিৰ পৰা সমানেই উপকৃত হ’ব৷ প্ৰশিক্ষণৰ সফল সমাপ্তিত স্বীকৃত প্ৰতিষ্ঠানটিৰ কিউ.আৰ.কোড. সম্বলিত প্ৰমাণপত্ৰও লাভ কৰিব পাৰিব৷ অধিক জানিবলৈ বা নামভৰ্তি কৰিবলৈ ৭০৮৬৭৪৮৭৪৮ এই নাম্বাৰত যোগাযোগ কৰিব পাৰিব অথবা https://www.iceeskill.com/our-courses এই লিংকটোত ৰেজিষ্ট্ৰাৰ কৰিব পাৰিব৷ আইচিইৰ প্ৰায়বোৰ শাখাতেই এই ক’ৰ্চ উপলব্ধ হ’ব বুলি সঞ্চালক ধ্ৰুৱজ্যোতি তামুলীয়ে আমাক জানিৱলৈ দিয়ে৷