উজনি-মাজুলী : উজনি মাজুলী ফুলনি আৰক্ষী চকীৰ অন্তৰ্গত কোটাই নাহৰণিৰ নিৱাসী দুলাল বৰাৰ পুত্ৰ   নিত্যানন্দ বৰা ( ৪৮)  নামৰ লোকজন পানীত পৰি অকাল মৃত্যুক সাৱতি  লয় ৷ ঘটনা অনুসৰি কালি  সন্ধ্যা ঘৰৰ পৰা কিবা কাম থকা বুলি ওলাই যোৱা লোকজন বহু নিশালৈকে  ঘৰলৈ নহাত কোনো পৰিয়ালৰ লোকে নিশা বিচাৰিও কোনো খবৰ নাপালে ৷ ৰাতিপুৱা বিচাৰিম বুলি আছিল যদিও ৰাতিপুৱা স্থানীয় লোকে শুকানসুঁতি নৈত  এখন খালি নাঁওসহ   উপঙি থকা অৱস্থাত এটি  মৃতদেহটো প্ৰত্যক্ষ কৰে ৷ আৰক্ষীক দিয়া খবৰৰ ভিত্তিত  ঘটনা স্থলীত ফুলনি আৰক্ষী চকীৰ বিষয়া উৎপল দাস সহ এটি আৰক্ষীৰ দল উপস্থিত হৈ  মৃতদেহ টো পানীৰ পৰা  পাৰলৈ আনে  ৷ আৰক্ষী বিষয়া জনে আমাক এই মৃত্যু সম্পৰ্কত প্ৰাৰম্ভিক অনুসন্ধান আৰম্ভ কৰা বুলি জানিবলৈ দিয়াৰ লগতে   ইতিমধ্যে মৃহদেহটো মৰনোত্তৰ পৰীক্ষাৰ বাবে ডিব্ৰুগড় চিকিৎসা মহাবিদ্যালয়লৈ পঠোৱা বুলি জনাই ৷  মৃত্যুৰ সময়ত লোকজনে পত্নী সহ এজন  পুত্ৰ আৰু দুগৰাকী কন্যা আত্মীয় স্বৰ্জনক এৰিথৈ যায় ৷

কলিয়াবৰ : এতিয়া ৰাজ‍্যত বছৰৰ দ্বিতীয়টো বানৰ সংহাৰ। ব্ৰহ্মপুত্ৰ আৰু ইয়াৰ উপনৈৰ বাঢ়নী পানীয়ে ৰাজ‍্যৰ প্ৰায় কেইখন জিলাতে তাণ্ডৱ অব‍্যাহত ৰাখিছে। নেৰা-নেপেৰা বৰষুণৰ ফলত পৰিস্থিতি অধিক অৱনতি ঘটিছে বহুকেইখন জিলাত। নগাঁও জিলাৰ কলিয়াবৰতো লুইতৰ বাঢ়নী পানীয়ে বুৰাই পেলাইছে বৰঘূলী অঞ্চলৰ বহুকেইখন গাঁও। গৰাখহনীয়াত বিপৰ্যস্ত বৰঘূলীত এইবাৰ তাণ্ডৱ। জলমগ্ন কলিয়াবৰৰ বৰঘূলীৰ বিস্তীৰ্ণ অঞ্চল। বৰলুইতৰ বাঢ়নি পানীয়ে বুৰাই পেলাইছে দুই নম্বৰ, তিনি নম্বৰ, এক নম্বৰ, সাত নম্বৰ বৰঘূলিৰ  প্ৰায় আশী শতাংশ এলেকা। বানত বুৰ গৈছে সহস্ৰাধিক পৰিয়ালৰ ঘৰ-বাৰী, খেতি-পথাৰ। নষ্ট হৈছে আহু ধান, মৰাপাট, শাক-পাচলি। মানুহ, পশুধনে একেলগে আশ্ৰয় লৈছে মথাউৰিৰ অস্থায়ী চালিত। জীৱন-সম্পত্তিৰ নিৰাপত্তাৰ তাগিদাত দিহিঙে-দিপাঙে ঢপলিয়াইছে একাংশ বানাক্ৰান্ত ৰাইজ।

জামুগুৰিহাট : জামুগুৰিহাটৰ অন্তৰ্গত মুঢ়াদল গাঁও নিবাসী তথা উত্তৰ জামুগুৰি উচ্চতৰ মাধ্যমিক বিদ্যালয়ৰ অৱসৰপ্ৰাপ্ত কৃতি শিক্ষক প্ৰফুল্ল হাজৰিকাৰ আজি পুৱা পৰলোকপ্ৰাপ্তি ঘটে। মৃত্যুৰ সময়ত হাজৰিকাৰ বয়স আছিল ৭২ বছৰ। কোনো ধৰণৰ বিশেষ শাৰীৰিক অসুস্থতা নাছিল যদিও যোৱাকালি হঠাৎ হৃদৰোগত আক্ৰান্ত হোৱাত পৰিয়ালৰ লোকে তেজপুৰস্থিত ইএমএম হস্পিটালত ভৰ্তি কৰাই যদিও আজি পুৱতি নিশা প্ৰায় ৩.৩০ বজাত চিকিৎসালয়খনতে মৃত্যুক আঁকোৱালি লয় হাজৰিকাই। উল্লেখ্য যে কৃতি শিক্ষকগৰাকীয়ে ধলাইবিলস্থিত উত্তৰ জামুগুৰি উচ্চ মাধ্যমিক বিদ্যালয়তে অধ্যয়ন কৰি প্ৰৱেশিকা পৰীক্ষাত সুখ্যাতিৰে উত্তীৰ্ণ হৈ ১৯৭৮ চনত নিজে অধ্যয়ন কৰা বিদ্যালয়খনতে সহকাৰী শিক্ষক হিচাপে চাকৰি জীৱন আৰম্ভ কৰি ২০০৭ বৰ্ষত একেখন বিদ্যালয়ৰ পৰাই অৱসৰগ্ৰহণ কৰিছিল। অতিকৈ অমায়িক আৰু এজন আৰ্দশৱান কৃতী শিক্ষক হিচাপে পৰিচিত হাজৰিকা আছিল সুদক্ষ অভিনেতা, চিত্ৰশিল্পী আৰু সমাজ সংগঠকো ৷ নদুৱাৰ জাতীয় বিদ্যালয়ৰ বৰ্তমানৰ অধ্যক্ষ, শ্ৰীমন্ত শংকৰদেৱ সংঘৰ একান্ত সঙ্গী আৰু ইতিবাচক চিন্তাৰে সমাজক সন্মুখৰ পৰা নেতৃত্ব দি অহা হাজৰিকা বিজেপি নদুৱাৰ মণ্ডলৰ এগৰাকী সক্ৰীয় সদস্যও আছিল৷ শিক্ষকতাৰ সমান্তৰালকৈ অঞ্চলটোৰ বিভিন্ন সামাজিক অনুষ্ঠানৰ লগত জড়িত হাজৰিকাৰ মৃত্যুৰ খৱৰ বিয়পি পৰাৰ লগে লগে মূঢ়াদলস্থিত বাসগৃহত অনেক গুণমুগ্ধই ভিৰ কৰেহি৷ হাজৰিকাৰ নশ্বৰ দেহ তেজপুৰৰ পৰা বাসগৃহ আহি পোৱাৰ লগে লগেই চতিয়া সমষ্টিৰ বিধায়ক পদ্ম হাজৰিকাও উপস্থিত হৈ পুষ্পাঞ্জলি অৰ্পণ কৰাৰ লগতে এনে এগৰাকী সমাজ সচেতক ব্যক্তিক হঠাৎ হেৰুৱাব লগীয়া হোৱাতো জামুগুৰিহাটৰ বাবেই এক বৃহৎ ক্ষতি বুলি উল্লেখ কৰে বিধায়ক হাজৰিকাই ৷ ইয়াৰোপৰি উত্তৰ জামুগুৰি উচ্চতৰ মাধ্যমিক বিদ্যালয়ৰ অধ্যক্ষ ক্ষেমৰাজ ঢাকাল সহিতে শিক্ষক গোট, মূঢ়াদল গাঁও উন্নয়ন সমিতি, বেবেজীয়া গাঁও উন্নয়ন সমিতি, মূঢ়াদল গাঁও যুৱক সংঘ, কুঁহিপাত সংঘকে ধৰি বহু সংখ্যক অনুষ্ঠান প্ৰতিষ্ঠানৰ লগতে ব্যক্তি বিশেষেও হাজৰিকাৰ নশ্বৰ দেহত পুষ্পাঞ্জলি অৰ্পণ কৰি শেষ শ্ৰদ্ধা নিবেদন কৰে ৷ হাজৰিকাৰ মৃত্যুত সদৌ জামুগুৰি ছাত্ৰ সন্থা, অসম জাতীয়তাবাদ যুৱ ছাত্ৰ পৰিষদৰ জামুগুৰি আঞ্চলিক সমিতি, অসমীয়া সাহিত্য সন্মিলনীয়েও শোক প্ৰকাশ কৰাৰ লগতে শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিছে ৷ মৃত্যুৰ সময়ত হাজৰিকাই পত্নী, একমাত্ৰ পুত্ৰ, জিয়ৰী নাতিনীসহ এক ভৰা সংসাৰ এৰি থৈ যায়। হাজৰিকাৰ মৃত্যুত সমগ্ৰ জামুগুৰিহাটত শোকৰ ছাঁ পৰিছে ৷