তিনিচুকীয়া : এ.আই.চি.চি.টি.ইউৰ অসম ৰাজ্যিক তথা অন্যতম সৰ্বভাৰতীয় সম্পাদক সুভাষ সেনে প্ৰেছ বিবৃতি যোগে বৃহত্তৰ বিজয়ৰ বাবে বৃহত্তৰ সংগ্ৰাম আৰু বৃহত্তৰ সংগ্ৰামৰ বাবে বৃহত্তৰ ঐক্য গঢ়ি তোলাৰ লক্ষ্যত মোদীৰ দেশ বিক্ৰীৰ অভিযানৰ নীতিৰ বিৰুদ্ধে শ্ৰমিকৰ দেশ বচাওঁক তথা “ভাৰতবৰ্ষক ৰক্ষা কৰা”ৰ নীতিৰ বহুল প্ৰচাৰৰ জৰিয়তে ট্ৰেড ইউনিয়ন যৌথ মঞ্চৰ আহ্বানত “ভাৰত ত্যাগ দিৱস”ত দেশ জোৰা ৯ আগষ্টৰ পৰিবৰ্তে অসমত (উক্ত দিনা দেওবাৰত লক ডাউন জাৰি থকাৰ বাবে) ১০ আগষ্টত জেল ভৰো বিক্ষোভ প্ৰদৰ্শন আদি কাৰ্যসূচী সফল কৰিবলৈ সংগঠিত, অসংগঠিত খণ্ডৰ শ্ৰমিক সহ ক্ষেত মজদুৰ, গ্ৰামীণ দৰিদ্ৰ, আঁচনিভুক্ত আশা, অঙ্গনৱাদী, মধ্যাহ্ন ভোজন কৰ্মীসহ সমূহ ৰাইজকো আহ্বান জনাইছে। বিবৃতিটোত উল্লেখ কৰা হৈছে যে উদ্যোগ ৰক্ষা কৰা, অসম ৰক্ষা কৰা আদিৰ পূৰ্ব চৰ্ত হৈছে মোদী শাসনৰ অৱসান ঘটোৱা, মোদীশাহীৰ ফান্দৰ পৰা ভাৰতবৰ্ষক মুক্ত কৰা। আৰু কোৱা হয় যে মোদীৰ “আত্মনিৰ্ভৰ ভাৰত” এক মস্ত আভুৱা, ভাৰতবৰ্ষক বিক্ৰী কৰাৰ এক ধ্বংসাত্মক শ্ল’গানহে। ১০ আগষ্টৰ জেল ভৰো আন্দোলনৰ দাবীসমূহ ক্ৰমে মজদুৰ, গ্ৰামীণ শ্ৰমিক আৰু অসমলৈ (নিজ ৰাজ্যলৈ) ঘূৰি অহা পৰিযায়ী শ্ৰমিক আদি অসংগঠিত খণ্ডৰ শ্ৰমিকক অহা ছমাহলৈকে প্ৰতি মাহত ১০,০০০ টকাকৈ লকডাউন ভাট্টা প্ৰদান কৰক। শ্ৰমিক ছাটাই, মজুৰি সংকোচন বা কৰ্তন, ডি.এ. বন্ধ কৰা আৰু সামাজিক নিৰাপত্তা দুৰ্বল বা হ্ৰাস কৰা বন্ধ কৰক। জাতীয় সম্পদ বিক্ৰী কৰা বন্ধ কৰক। ব্যক্তিগতকৰণ, নিগমীকৰণ আৰু নিৰ্বিনিয়োজন বন্ধ কৰক। কৃষক বিৰোধী, কৰ্পৰেটমুখী, বজাৰমুখী নীতি আৰু নতুন শিক্ষানীতি, পৰিবেশিক প্ৰভাৱ নিৰূপণ কৰা অধ্যাদেশসমূহ বাতিল কৰক! বিজেপি শাসিত ৰাজ্য আৰু আন আন ৰাজ্যত শ্ৰম আইন প্ৰত্যাহাৰৰ সিদ্ধান্ত বাতিল কৰক, শ্ৰমিকক ক্ৰীতদাসলৈ পৰিণত কৰাৰ লক্ষ্যত যুগুত কৰা শ্ৰমসংহিতা (Codification of Labour Laws) বাতিল কৰক। ১২ ঘণ্টীয়া কৰ্মদিৱসৰ নিয়ম বন্ধ কৰক। শ্ৰমিক তথা ৰাইজৰ অধিকাৰ কাঢ়ি নিয়া বন্ধ কৰক, চৰকাৰী নীতিক সমালোচনাকাৰীক জেলত বন্দী কৰি ৰখা বন্ধ কৰক। নিবনুৱা সমস্যাৰ সমাধান কৰক, এনৰেগা শ্ৰমিকৰ বছৰত ২০০ দিনৰ কাম আৰু দৈনিক ৫০০.০০ টকাকৈ মজুৰি প্ৰদান কৰক, মূল্যবৃদ্ধি ৰোধ কৰক, মজুতকাৰীসকলক শাস্তি বিহক, খাদ্য সুৰক্ষা আইন আৰু অত্যাৱশ্যকীয় সামগ্ৰী আইন ৰদ কৰাৰ চক্ৰান্ত বন্ধ কৰক। স্বাস্থ্যসেৱা সম্পূৰ্ণৰূপে বিনামূলীয়া আৰু সাৰ্বজনীন কৰক, আঁচনিভুক্ত শ্ৰমিক-কৰ্মচাৰীক চৰকাৰী কৰ্মচাৰীৰ স্বীকৃতি আৰু মাননীৰ পৰিবৰ্তে প্ৰতিমাহত ২১ হেজাৰ টকাকৈ দৰমহা দিয়ক। ক’ৰোণা পৰিস্থিতিত কৰ্মহীন হৈ পৰা অসংগঠিত খণ্ডৰ শ্ৰমিকক মাহিলী ৭,৫০০.০০ টকাকৈ সাহায্য প্ৰদান কৰক, চাহ শ্ৰমিকক দৈনিক ৩৫১.০০ টকাকৈ মজুৰি দিয়ক, কৃষিভূমি অধিগ্ৰহণ আইন বাতিল কৰক, অসমৰ বান-খহনীয়াক ৰাষ্ট্ৰীয় সমস্যাৰ স্বীকৃতি দিয়ক, স্থায়ী সমাধানৰ ব্যৱস্থা কৰক, বান-খহনীয়া আক্ৰান্ত ৰাইজক পৰিয়াল সাহায্য প্ৰদান কৰক।

মুদৈজান : অসমৰ অন্যান্য ঠাইৰ লগতে যোৰহাট জিলাৰ টীয়কতো এতিয়া সহজলভ্য হৈ পৰিছে নিষিদ্ধ ড্ৰাগছ। ইমানেই উঠি অহা যুৱ প্ৰজন্ম ড্ৰাগছৰ প্ৰতি আসক্তি বাঢ়ি গ’ল যে দেওবাৰে অত্যাধিক ড্ৰাগছ সেৱণ কৰাৰ ফলত মৃত্যুক সাৱটি ল’বলগীয়া হ’ল টীয়ক বামুণপুখুৰীৰ উৎপল বৰুৱা নামৰ এজন যুৱক। টীয়কত গঢ় লৈ উঠা নিষিদ্ধ ড্ৰাগছৰ ঘাটি আৰু এই অবৈধ ব্যৱসায়ৰ লগত জড়িত ব্যক্তিসকলক তৎকালীনভাৱে গ্ৰেপ্তাৰ কৰাৰ দাবীৰে কালি টীয়ক ৰাজহ চক্ৰ বিষয়াক আছু, যুৱ ছাত্ৰ পৰিষদ আৰু চুতীয়া ছাত্ৰ সন্থাৰ এটি দলে সাক্ষাৎ কৰি যোৰহাট জিলা উপায়ুক্ত আৰু আৰক্ষী অধীক্ষকলৈ স্মাৰকপত্ৰ প্ৰেৰণ কৰিছে। টীয়ক আঞ্চলিক ছাত্ৰ সন্থাৰ সভাপতি ৰন্টু ভূঞা, সাধাৰণ সম্পাদক প্ৰীতমজ্যোতি শইকীয়া, শিমলুগুৰি মৌজা আঞ্চলিক ছাত্ৰ সন্থাৰ সভাপতি দেৱব্ৰত শইকীয়া, ভা: সাধাৰণ সম্পাদক পবিত্ৰ বৰা, অসম জাতীয়তাবাদী যুৱ ছাত্ৰ পৰিষদৰ টীয়ক আঞ্চলিক সমিতিৰ সভাপতি হিমাংশু বৰুৱা, সাধাৰণ সম্পাদক প্ৰশান্ত দত্ত আৰু টীয়ক আঞ্চলিক চুতীয়া ছাত্ৰ সন্থাৰ সভাপতি পাৰ্থ প্ৰতিম চুতীয়া, সম্পাদক বিশ্বজিৎ বৰা স্বাক্ষৰিত পৃথক স্মাৰকপত্ৰ টীয়ক ৰাজহ চক্ৰ বিষয়াৰ জৰিয়তে প্ৰেৰণ কৰিছে। স্মাৰকপত্ৰখনিত উল্লেখ থকা অনুসৰি যোৱা ২১ জুলাইত টীয়ক আৰক্ষীয়ে আটক কৰি অনা ৫ জন ড্ৰাগছ আসক্ত যুৱকক কি কাৰণত উক্ত দিনাই ৰহস্যজনকভাৱে মুকলি কৰি দিলে সেয়াও ৰহস্যৰ আৱৰ্তত, তাৰ লগতে দেওবাৰে অত্যধিক ড্ৰাগছ আসক্তিৰ ফলত মৃত্যু হোৱা উৎপল বৰুৱাৰ লগত থকা আনকেইজন যুৱকক তৎকালীনভাৱে গ্ৰেপ্তাৰ কৰিবলৈ দাবী জনাইছে সংগঠনকেইটাই। আনহাতে এক বিবৃত্তিত সদৌ যোৰহাট জিলা ছাত্ৰ সন্থাৰ সাধাৰণ সম্পাদক জিতু নেওগে অতি ক্ষোভেৰে কয়, অত্যাধিক ড্ৰাগছ আসক্তিৰ ফলত দেওবাৰে মৃত্যু হোৱা উৎপল বৰুৱাৰ দৰে যাতে উঠি অহা নৱপ্ৰজন্ম ধ্বংসৰ গৰাহলৈ নাযায় এইক্ষেত্ৰত প্ৰশাসনে কঠোৰ ব্যৱস্থা গ্ৰহণ কৰাৰ প্ৰয়োজনীয়তা আছে। তাৰ লগতে টীয়ক আৰক্ষী থানাৰ ভাৰপ্ৰাপ্ত আৰক্ষী বিষয়াজনৰ নেতৃত্বত অবৈধ ব্যৱসায় চলি থকাৰ কথা ছাত্ৰ সন্থাই বাৰম্বাৰ জনাই অহাৰ পাছত এইটোৱেই আকৌ প্ৰমাণিত কৰিলে কিদৰে কমিচনৰ অংকত চলি থাকিব পাৰে ড্ৰাগছৰ দৰে অবৈধ ব্যৱসায়।

টিংখাং : কৃষক মুক্তি সংগ্ৰাম সমিতি অসমৰ ডিব্ৰুগড় জিলা সমিতিৰ যুটীয়া সম্পাদকদ্বয় শশী শেনছোৱা আৰু হেমন্ত কোঁৱৰক দেওবাৰৰ নিশা জিলাখনৰ টিংখাং আৰক্ষীয়ে গ্ৰেপ্তাৰ কৰে। গ্ৰেপ্তাৰ কৰি নিশা টিংখাং থানাত ৰখাৰ পাছত আজি পুৱাই  দুয়োগৰাকী নেতাকে জিলা কাৰাগাৰলৈ আৰক্ষীয়ে লৈ যায়। জানিব পৰা মতে টিংখাঙৰ শালমাৰী অঞ্চলৰ এখন গাঁৱৰ এটা নামঘৰত কাৰাৰুদ্ধ কৃষক মুক্তিৰ সংগ্ৰাম সমিতিৰ নেতা অখিল গগৈৰ সুস্বাস্থ্যৰ কামনা কৰাৰ লগতে অতিশীঘ্ৰ মুক্তি ‘কা’ বাতিলৰ দাবীত দেওবাৰৰ সন্ধিয়া বন্তি প্ৰজ্বলন কৰাৰ পাছতে আৰক্ষীয়ে দুয়োগৰাকী নেতাক গ্ৰেপ্তাৰ কৰে। আৰক্ষীয়ে টিংখাং থানাত ১৮৫/২০২০ নম্বৰৰ এটা গোচৰ পঞ্জীয়ন কৰিছে। দুয়োগৰাকী নেতাৰ বিৰুদ্ধে ভাৰতীয় দণ্ড বিধি আইনৰ ১৮৮/১২৪(এ)১৫৩(এ)২৬৯/২৭০/১৭৭ ধাৰাৰ লগতে আৰ/ডব্লিউ ৫১(বি)৫২ ডি এম এক্ট ২০০৫ প্ৰয়োগ কৰা বুলি জানিব পৰা গৈছে। কৃষক মুক্তিৰ দুগৰাকী নেতাক আৰক্ষীয়ে গ্ৰেপ্তাৰ কৰি জেল হাজোতলৈ প্ৰেৰণ কৰাৰ কাৰ্যত সংগঠনটোৱে তীব্ৰ ক্ষোভ প্ৰকাশ কৰাৰ লগতে বিনা চৰ্তে মুক্তিৰ দাবী কৰিছে। ইপিনে ‘কা’ বাতিল আৰু কাৰাবন্দী কৃষক মুক্তি সংগ্ৰাম সমিতি নেতা অখিল গগৈৰ মুক্তিৰ দাবীত টিংখাং ব্লক কংগ্ৰেছ কমিটীয়ে টিংখাঙৰ ৰাজগড়ত এক প্ৰতিবাদী শোভাযাত্ৰা কাৰ্যসূচী গ্ৰহণ কৰে। এই কাৰ্যসূচীত শতাধিক দলটোৰ নেতা কৰ্মীয়ে অংশগ্ৰহণ কৰি ভাৰতীয় জনতা পাৰ্টি নেতৃত্বাধীন কেন্দ্ৰীয় আৰু ৰাজ্য চৰকাৰৰ বিৰুদ্ধে শ্ল’গান দিয়া দেখা যায়। আনহাতে আজি সদৌ ডিব্ৰুগড় জিলা ছাত্ৰ সন্থাই জিলাখনৰ বিভিন্ন ঠাইৰ লগতে টিংখাং, ৰাজগড়ত ‘কা’ বাতিলৰ দাবীত এক বিশাল মটৰ চাইকেল শোভাযাত্ৰা কৰে। সহস্ৰাধিক মটৰ চাইকেলেৰে জিলাখনৰ মৰাণ নাহৰকটীয়া পথৰে ৰাজগড়, টিংখাং অঞ্চল অতিক্ৰম কৰা সদৌ অসম ছাত্ৰ সন্থাৰ শোভাযাত্ৰাকাৰী দলটোৱে ‘কা’ বাতিলৰ লগতে চৰকাৰ বিৰোধী বিভিন্ন শ্ল’গান দি ৰাজপথ উত্তালেৰে আকাশ বতাহ মুখৰিত কৰি তোলে।

উজনি-মাজুলী : সমগ্ৰ বিশ্বৰ লগতে আমাৰ ৰাজ্যখনতো বৰ্তমান ক’ৰণাই মহামাৰী ৰূপ ধাৰণ কৰাৰ সময়তে ৰাজ্যখনৰ প্ৰায়বোৰ জিলাতেই বানপানীয়ে যথেষ্ট ক্ষতি সাধন কৰিছে। বানপানীত ক্ষতিগ্ৰস্ত লোকসকলক ৰাজ্যখনৰ বিভিন্ন দল-সংগঠনে সহায়ৰ হাত আগবঢ়াই আহিছে। মাজুলীৰ তেনে এক অন্যতম মঞ্চ পূৱ মাজুলীৰ অগ্ৰণী অনুষ্ঠান ‘কলাগুৰু উদীয়মান যুৱ মঞ্চ’ বনগাঁও, মাজুলীয়ে বানপীড়িত লোকক কিছু সহায়ৰ হাত আগবঢ়াইছে। সংগঠনটোৱে কালি নামনি মাজুলীৰ দুই শতাধিক পৰিয়ালৰ মাজত খাদ্য সামগ্ৰী বিতৰণ কৰাৰ পাছত আজি উজনি মাজুলীৰ প্রায় শতাধিক ছাত্র-ছাত্রীৰ মাজত কাগজ, কলম আৰু খাদ্য সামগ্ৰী বিতৰণ কৰে। মানৱতা যে এতিয়াও শেষ হৈ যোৱা নাই তাকেই যেন পুনৰ এবাৰ প্ৰমাণ কৰি দেখুৱালে মাজুলী কলাগুৰু উদীয়মান যুৱ মঞ্চই।