মঙলদৈ

 সমগ্র বিশ্বত ছানি ধৰা ক’ভিড-১৯ৰ কবলৰ পৰা দেশবাসীক সুৰক্ষিত কৰি ৰখাৰ স্বাৰ্থত ১৭ মে’ পৰ্যন্ত লকডাউন বাহাল ৰাখিবলৈ নিৰ্দেশনা জাৰি কৰিছে৷ এই নিৰ্দেশনাৰ সমান্তৰালকৈ দৰং জিলাৰ দণ্ডাধীশে সমগ্র জিলাখনত সন্ধিয়া ৬ বজাৰ পৰা পুৱা ৬ বজালৈকে ভাৰতীয় দণ্ডবিধি ১৪৪ ধাৰাৰ অধীনত সান্ধ্য আইন জাৰি কৰিছে৷ সেই সময়খিনিত জনসাধাৰণৰ চাল চলনত কঠোৰভাৱে নিষেধাজ্ঞা জাৰি কৰিছে। এই ক্ষেত্ৰত চিকিৎসা, আৰক্ষী, অগ্নিনিৰ্বাপণ, টেলিকম তথা বিদ্যুৎ  বিভাগৰ দৰে জৰুৰীকালীন সেৱাসমূহক  ৰেহাই  দিয়া হ’ব৷ সামগ্ৰী কঢ়িওৱা যান-বাহনৰ ক্ষেত্ৰত এই নিষেধাজ্ঞা প্ৰযোজ্য নহ’ব৷

যোৰহাট ক’ৰ’ণা ভাইৰাছ সংক্ৰমণ ৰোধৰ বাবে সমগ্ৰ দেশৰ লগতে অসমতো অব্যাহত আছে তৃতীয় পৰ্যায়ৰ লকডাউন৷ ইয়াৰ প্ৰতি লক্ষ্য ৰাখি যোৰহাট জিলা দণ্ডাধীশে ফৌজদাৰী কাৰ্যবিধি আইনৰ ১৪৪ ধাৰাৰ অধীনত  এক আদেশ যোগে জিলাখনত নৈশ সান্ধ্য আইন জাৰি কৰিছে৷ সন্ধিয়া ৬ বজাৰ পৰা পুৱা ৬ বজালৈকে এই সান্ধ্য আইন বলবৎ থাকিব৷ অৱশ্যে এই আদেশৰ পৰা স্বাস্থ্য সেৱা, আৰক্ষী, অগ্নিনিৰ্বাপক, জৰুৰীকালীন সেৱাত জড়িত টেলিকম সেৱা, বিদ্যুৎ সেৱা আদিক ৰেহাই দিয়া হৈছে৷ এই সেৱা জিলাখনত তৎকালে বলবৎ হৈছে আৰু পুনৰ আদেশ নিদিয়া পৰ্যন্ত বলবৎ থাকিব বুলি যোৰহাট জিলা তথ্য আৰু জনসংযোগ বিষয়া শাৰদী গগৈয়ে জনাইছে৷

জামুগুৰিহাটলকডাউনৰ মাজতে জামুগুৰিহাটৰ দক্ষিণ পশ্চিম প্ৰান্তৰ লুঙি বজাৰত এজন অসম আৰক্ষীৰ জোৱানে এগৰাকী ১৫ বছৰীয়া কিশোৰী ধৰ্ষণ কৰা ঘটনাই সমগ্ৰ অঞ্চলজুৰি তীব্ৰ চাঞ্চ্যল্যৰ সৃষ্টি কৰিছে। এই ধৰ্ষিতা কিশোৰীগৰাকীৰ পৰিয়ালৰ তৰফৰ পৰা জামুগুৰি আৰক্ষী থানাত দাখিল কৰা এজাহাৰ দাখিল কৰে৷ এজাহাৰত উল্লেখ কৰা অনুসৰি কালি সন্ধিয়া অঞ্চলটোৰ লুঙি বজাৰত থকা জামুগুৰি আৰক্ষী থানাৰ অস্থায়ী শিবিৰৰ কৰ্মৰত ১১নং বেটেলিয়নৰ অসম আৰক্ষী জোৱান ফুলেন ডেকাই বতিয়ামাৰী ভৈৰৱীৰ ১৫ বছৰীয়া কিশোৰীগৰাকীক ফুচুলাই নিৰ্জন স্থানলৈ লৈ যায়৷ ইয়াৰ পাছত লুঙি বজাৰৰ সমীপত কিশোৰীগৰাকীক জোৱানজনে উপযুপৰি ধৰ্ষণ কৰে। পিছত কিশোৰীগৰাকী ঘৰলৈ গৈ পৰিয়ালৰ লোকৰ আগত ঘটনাৰ সবিশেষ বিৱৰি কয়৷ প্ৰকৃত ঘটনা পোহৰলৈ অহাত পৰিয়ালৰ ফালৰ পৰা জামুগুৰি আৰক্ষী থানাত এজাহাৰ দাখিল কৰে। আজি পুৱা জামুগুৰি আৰক্ষী ঘটনাস্থলীত উপস্থিত হৈ অভিযুক্ত জোৱানজনক গ্ৰেপ্তাৰ কৰি জামুগুৰি আৰক্ষী থানালৈ লৈ অনাৰ লগতে ধৰ্ষিতা কিশোৰীগৰাকীক স্বাস্থ্য পৰীক্ষাৰ বাবে তেজপুৰলৈ প্ৰেৰণ কৰে৷ ঘটনা সন্দৰ্ভত জামুগুৰি আৰক্ষীয়ে তদন্ত অব্যাহত ৰাখিছে৷

শিৱসাগৰ শিৱসাগৰৰ অন্যতম ক্ৰীড়া অনুষ্ঠান ফিনিক্স ক্ৰিকেট কচিং ক্লাবে দেওবাৰে দিন হাজিৰা কৰি জীৱন নিৰ্বাহ কৰা আৰু অতি দৰিদ্ৰ পৰিয়ালৰ মাজত অত্যাৱশ্যকীয় সামগ্ৰী বিতৰণ কৰে। ফিনিক্স ক্ৰিকেট কচিং ক্লাবৰ সকলো সদস্য তথা প্ৰশিক্ষাৰ্থীসকলে নিজাববীয়া কৈ অৰ্থ সংগ্ৰহ কৰি চেণ্টাৰৰ প্ৰশিক্ষক পবিত্ৰ দত্তৰ উদ্যোগত দেওবাৰে শিৱসাগৰৰ মেটেকা অঞ্চলৰ প্ৰায় ২৫ টা দিন হাজিৰা কৰা তথা দৰিদ্ৰ পৰিয়ালৰ মাজত চাউল, দাইল, মিঠাতেল, নিমখ, চাবোন, বিস্কুট আদি অত্যাৱশ্যকীয় সামগ্ৰী বিতৰণ কৰে। লকডাউনৰ সময়ত ফিনিক্স ক্ৰিকেট কচিং ক্লাবে কেৱল খেলৰ লগতে জড়িত নহৈ আৰ্তজনক সহায় আগবঢ়োৱা কাৰ্যক শিৱসাগৰবাসীয়ে প্ৰশংসা কৰিছে।

বোকাখাতকভিড-১৯ক ৰোধিবলৈ দেশত চলি থকা তৃতীয় পৰ্যায়ৰ লকডাউনে সমাজৰ বৌদ্ধিক অগ্ৰগতিক স্থবিৰ কৰাৰ পথত। সেয়েহে সম্প্ৰতি ঘৰতে সোমাই থাকি টেলিফোন আৰু ইণ্টাৰনেটক সাৰথি কৰি লৈছে সমাজৰ সচেতন নাগৰিকে। ৰাজ্যখনৰ অনেক স্থানত এতিয়া ছাত্ৰ-ছাত্ৰীৰ বাবে অনলাইন শ্ৰেণী আৰু পৰীক্ষা পাতিছে শিক্ষা বিভাগে। কিয়নো লকডাউনৰ শেষ হোৱাৰ পাছৰ পৰিস্থিতিয়ে যাতে অনৰ্থক ইতি পেলাব নোৱাৰে ছাত্ৰ-ছাত্ৰীৰ এটাকৈ সোণালী শিক্ষাবৰ্ষ। এই ক্ষেত্ৰত অগ্ৰণী ভূমিকা গ্ৰহণ কৰিছে গোলাঘাট জিলা মাধ্যমিক শিক্ষা বিভাগে। তদ্ৰুপ ব্যৱস্থাৰে ছাত্ৰ ছাত্ৰীৰ মেধা শক্তি আৰু প্ৰতিভাক উজ্জীৱিত কৰাৰ প্ৰচেষ্টাৰে বোকাখাত আঞ্চলিক ছাত্ৰ সন্থাৰ উদ্যোগত অনুষ্ঠিত হৈ গ’ল নৱম আৰু দশম শ্ৰেণীৰ ছাত্ৰ ছাত্ৰীৰ বাবে ৰাজ্যিক ভিত্তিত বিশেষ অনলাইন মেধা পৰীক্ষা। লক-ডাউনৰ সময়ত ছাত্ৰ ছাত্ৰীৰ সময়ৰ যাতে সদ্ব্যৱহাৰ হয় আৰু শৈক্ষিক দিশত আগবাঢ়িব পাৰে সেই উদ্দেশ্যেই অনুষ্ঠিত কৰা হৈছিল এই বিশেষ মেধা পৰীক্ষা। যোৱা ৩ মে’ৰ পুৱা দহ বজাৰ পৰা ৰাজ্যখনৰ বিভিন্ন বিদ্যালয়সমূহৰ নৱম আৰু দশম শ্ৰেণীৰ ছাত্ৰ-ছাত্ৰীৰ মাজত সাধাৰণ গণিত, সাধাৰণ বিজ্ঞান, ইংৰাজী আৰু সাধাৰণ জ্ঞান বিষয়ত অনলাইন পদ্ধতিৰে অনুষ্ঠিত হোৱা এই মেধা পৰীক্ষাত তিনি শতাধিক ছাত্ৰ-ছাত্ৰীয়ে অংশগ্ৰহণ কৰে। অসমীয়া আৰু ইংৰাজী দুয়োটি মাধ্যমতে অনুষ্ঠিত কৰা হৈছিল এই অনলাইন পৰীক্ষা। উল্লেখ্য যে এই মেধা পৰীক্ষাত প্ৰথম, দ্বিতীয় আৰু তৃতীয় স্থান প্ৰাপ্তসকলক একোটিকৈ কিতাপৰ টোপোলা আৰু একোখনিকৈ মানপত্ৰৰে সম্বৰ্দ্ধনা জনোৱা হ’ব আৰু এই পৰীক্ষাত অৱতীৰ্ণ হোৱা প্ৰতি গৰাকী পৰীক্ষাৰ্থীলৈ স্বীকৃতি হিচাপে একোখনিকৈ মানপত্ৰ প্ৰদান কৰা হ’ব বুলি ছাত্ৰ সংগঠনটোৰ তৰফৰ পৰা জানিবলৈ দিছে। বোকাখাত আঞ্চলিক ছাত্ৰ সন্থাৰ এনে মহৎ প্ৰচেষ্টাৰ বোকাখাতৰ লগতে ৰাজ্যখনৰ সচেতন মহলে শলাগ লৈছে।