নাজিৰা

 ক’ৰোনা মহামাৰীৰ ভয়াবহতাত আতঙ্কিত হৈ কেন্দ্ৰীয় চৰকাৰে সমগ্ৰ দেশতে লকডাউন ঘোষণা কৰাৰ সময়তে অতি দৃষ্টিকটুভাৱে শাসনাধিষ্ঠিত বিজেপি দলৰ একাংশ নেতা পালিনেতাই নাজিৰা নগৰত গোপনে ব্যৱসায়িক সন্থা গঠন কৰাক লৈ সমগ্ৰ নগৰখনতে তীব্ৰ প্ৰতিক্ৰিয়াৰ সৃষ্টি হৈছে৷ উল্লেখ্য যে   নাজিৰাত কিছু বছৰৰ পূৰ্বে স্থানীয় সৰু বৰ ব্যৱসায়ীসকলক লৈ ৰাজহুৱাভাৱে এখন ব্যৱসায়িক সন্থা গঠন কৰা হৈছিল যদিও এই সমিতিখনৰ ম্যাদ উকলি যোৱাৰ পিছত তথা কোনো হিচাপ পত্ৰ নিদিয়াকৈ এই সমিতিখন নিস্ক্ৰিয় হৈ থকাত লকডাউনৰ সুযোগত শাসনাধিষ্ঠিত বিজিপি দলৰ হস্তক্ষেপত পূৰ্বৰ সমিতিখনৰ দুই এজন বিষয়ববীয়াক সাৰথি ৰূপে লৈ  নাজিৰাৰ অধিকাংশ ব্যৱসায়ীৰ অজ্ঞাতে গোপনে এখন নতুন ব্যৱসায়ী সন্থা গঠন কৰাকলৈ নগৰখনত তীব্ৰ প্ৰতিক্ৰিয়াৰ সৃষ্টি হৈছে৷ আনহাতে এই সমিতিখনৰ নামত নগৰখনৰ সৰু বৰ ব্যৱসায়ীসকলৰ পৰা দুশ টকাকৈ সংগ্ৰহ কৰাকলৈও বহুতো ব্যৱসায়ীয়ে অসন্তুষ্টি ব্যক্ত কৰিছে যদিও আন বহুতে ভয়তে মুখ খোলা নাই৷ উল্লেখ্য যে এই লকডাউনৰ সময়ত চৰকাৰী নীতি নিয়ম অৱজ্ঞা কৰি শাসনাধিষ্ঠিত দলৰ দুজনমান নেতাই শিমলুগুৰিত শাক পাচলিৰ বজাৰ বহুৱাই ব্যৱসায়ীৰ পৰা অবৈধভাৱে টকা সংগ্ৰহ কাৰাৰ বাতৰি পৰিবেশন কৰাৰ বাবে নাজিৰাৰ দুজনমান সাংবাদিকো ভাবুকিৰ সন্মুখীন হ’বলগীয়া হৈছিল আৰু এনে নেতাৰ পৃষ্ঠপোষকতাতে নাজিৰাত অবৈধভাবে ব্যৱসায়ী সন্থা গঠন কৰি সৰু বৰ ব্যৱসায়ীৰ মাজত ৰাজনৈতিক বিভাজন আনিব বিচৰাটো দুৰ্ভাগ্যজনক৷

কলিয়াবৰ

প্ৰধানমন্ত্ৰী কিষাণ সন্মান নিধিৰ হিতাধিকাৰীৰ তালিকা প্ৰকাশ হোৱাৰে পৰা ক’ৰোনা সংক্ৰমণৰ সমান্তৰালকৈ ইয়ো এক চৰ্চিত বিষয়টো হৈ পৰিছে। ভয়ানক দুৰ্নীতি আৰু স্বজন-তোষণৰে ৰাজনৈতিক নেতা-পালিনেতাৰ ছত্ৰছায়াত কৃষি বিভাগে প্ৰস্তুত কৰা সন্মান নিধিৰ তালিকাত অনাকৃষকৰ পয়োভৰে সমগ্ৰ অসমতে তোলাপাৰ লগাইছে। ফলস্বৰূপে, অভিযোগ‍্য-প্ৰত‍্যাভিযোগে উত্তাল এতিয়া অসমৰ প্ৰায় প্ৰতিখন গাঁও। প্ৰধানমন্ত্ৰী কিষাণ সন্মান নিধিৰ হিতাধিকাৰীৰৰ তালিকাত হোৱা সীমাহীন দুৰ্নীতিয়ে লকডাউনৰ ফলত জীয়াতু ভোগা গাঁওবাসীৰ ক্ষোভ দুগুণে বৃদ্ধি পাইছে। এই লৈ বঞ্চিত কৃষকৰ অভিযোগৰ ভিত্তিত প্ৰকাশিত বাতৰিৰ পিছত আত্মপক্ষৰ সমৰ্থনত সাংবাদিকৰ কাষ চাপিল অভিযুক্ত পক্ষ। প্ৰধানমন্ত্ৰীৰ কৃষাণ সন্মান নিধিৰ হিতাধিকাৰীৰ তালিকাক লৈ কলিয়াবৰৰ পশ্চিম অঞ্চলৰ ৰহধলা গাঁও পঞ্চায়তৰ ৩ নং গাঁও সভাৰ সদ‍্যস‍্যাৰ দুৰ্নীতিৰ বিষয়ে এটা পক্ষই উত্থাপন কৰাৰ পিচতে উন্মোচিত হৈছে নতুন দিশ। সেই লৈ অঞ্চলটোত চৰ্চা আৰম্ভ হৈছে। ইতিমধ‍্যে অভিযুক্ত পক্ষ সোচ্ছাৰ হৈছে অভিযোগকাৰীৰ বিৰুদ্ধে। পক্ষটোৰ মতে, অভিযুক্ত অসম চৰকাৰৰ চাকৰিয়াল কলিয়াবৰৰ শিৱস্থান গাঁৱৰ জিতেন শইকীয়াৰ পৰিয়ালে স্পষ্ট কৰিলে জিতেন শইকীয়াই লোৱা নাই ৰাজ সাহায্য। জিতেন শইকীয়াৰ পৰিয়ালৰ দাবী অভিযোগকাৰীৰ পৰিয়ালৰ লোকেহে লাভ কৰিছে প্ৰধানমন্ত্ৰী কৃষাণ সন্মান নিধিৰ সাহায্য। পূৰ্বে প্ৰকাশিত বাতৰিত প্ৰকাশ হোৱা জিতেন শইকীয়াৰ নাম প্ৰধানমন্ত্ৰী কিষাণ সন্মান নিধিৰ তালিকাত থকাৰ তথ‍্য ভিত্তিহীন আৰু কোনো সত‍্যতা নাই বুলি অভিযুক্তৰ পৰিয়ালে দাবী কৰে।

তিনিচুকীয়া

তিনিচুকীয়া বৰগুৰিস্হিত সদৌ অসম মটক যুৱ-ছাত্ৰ সন্মিলনৰ কেন্দ্ৰীয় কাৰ্যালয়ৰ প্ৰাঙ্গণত মটক জনগোষ্ঠীৰ আটাইকেইটা সংগঠনৰ নেতৃত্ববৃন্দৰ উপস্থিতিত সামাজিক দূৰত্ব মানি ঐতিহাসিক মটক ৰাজ্যৰ ৰজা স্বৰ্গদেউ সৰ্বানন্দ সিংহৰ ২১৮ সংখ্যক দিৱস প্ৰতিবছৰৰ দৰে এইবাৰো চলিত বৰ্ষৰ ২৪ মে’ত কেন্দ্ৰীয়ভাৱে অনুষ্ঠিত কৰাৰ সন্দৰ্ভত এক আলোচনাত মিলিত হয়। অসম চৰকাৰৰ সাংস্কৃতিক সঞ্চালকৰ উদ্যোগত অনুষ্ঠিত হোৱা দিবস দেশ তথা বিশ্বৰ ক’ৰোনা মহামাৰী প্ৰতি লক্ষ্য ৰাখি ২০২০ বৰ্ষৰ দিৱস অনুষ্টুপীয়াকৈ পালন কৰাৰ বাবে সদৌ অসম মটক সন্মিলন, মটক ৰাজবংশ উন্নয়ন সমিতি, সদৌ অসম মটক যুৱ-ছাত্ৰ সন্মিলন, সদৌ অসম মটক যুৱ-ছাত্ৰ পৰিষদ, মটক মহিলা পৰিষদ, মটক ছাত্ৰ- সন্হাই সিদ্ধান্ত গ্ৰহণ কৰে৷ সভাৰ সিদ্ধান্ত অনুসৰি তিনিচুকীয়া, ডিব্ৰুগড়, লখিমপুৰ, শিৱসাগৰ, যোৰহাট, ধেমাজী, শোণিতপুৰ আৰু বিশ্বনাথ জিলা সমিতি, আঞ্চলিক সমিতি আৰু নামঘৰ সমূহত বিশ্বৰ দুৰ্যোগৰ সময়ত অনুষ্টুপীয়াকৈ স্বৰ্গদেউ সৰ্বানন্দ সিংহ দিৱস পালন কৰিবলৈ আহ্বান জনাই সিদ্ধান্ত গ্ৰহণ কৰে৷ লগতে ২৪ মে’ত স্বৰ্গদেউ সৰ্বানন্দ সিংহ দিৱসৰ দিনা জনগোষ্ঠীয় প্ৰতি পৰিয়ালে নিজ নিজ গৃহত বন্তি প্ৰজ্বলনৰ আহ্বান জনায়৷ চৰকাৰী উদ্যোগত অনুষ্ঠিত হোৱা স্বৰ্গদেউ সৰ্বানন্দ সিংহ দিবস খনি চৰকাৰীভাৱেও পালন কৰিবলৈ আহ্বান জনায় সংগঠনকেইটাই৷