বাইহাটা চাৰিআলি

কামৰূপ জিলাৰ বাইহাটা চাৰিআলিৰ নিকটৱৰ্তী মদনপুৰত এজনৰ দেহত ক’ৰ’ণা পজিটিভ পোৱাৰ পিছত সমগ্ৰ অঞ্চলটোৰ লগতে জিলাখনত আতংকময় পৰিবেশ বিৰাজ কৰিছে৷ প্ৰাপ্ত বাতৰি অনুসৰি, কৰ্মসূত্ৰে চাংসাৰি আৰক্ষী থানাৰ অন্তৰ্গত মদনপুৰত ভাড়া ঘৰত বসবাস কৰা দেৱৰাজ আচাৰ্য নামৰ কোভিড-১৯ পজিটিভ লোকজন যোৱা ৬ মে’ তাৰিখে পশ্চিম বংগৰ শিলিগুৰিৰ পৰা গুৱাহাটীলৈ আহিছিল৷ ঘটনাৰ বিৱৰণী মতে, প্ৰকৃততে কলকতাৰ বাসিন্দা দেৱৰাজ আচাৰ্যই পৰিয়ালসহ শিলিগুৰিৰ চাৰ্চ ৰোডৰ ভাড়া ঘৰত বসবাস কৰে তথা কামৰূপ জিলাৰ মদনপুৰস্থিত টাটা টি কনজুমাৰ প্ৰডাক্ট নামৰ কোম্পানীটোৰ কৰ্মচাৰী সূত্ৰে মদনপুৰৰ ৰূপেশ্বৰ দাস নামৰ অৱসৰপ্ৰাপ্ত আৰক্ষী এগৰাকীৰ ঘৰহ ভাড়া থাকে৷ তৃতীয় পৰ্যায়ৰ লকডাউন কিছু শিথিল হোৱাৰ পিছত যোৱা ৬ মে’ তাৰিখে শিলিগুৰিৰ পৰা দুই বন্ধু সহ ডব্লিউবি ৭৪ এএইচ ৪৭৪৭ নম্বৰৰ ইন’ভা গাড়ীখন নিজে চলাই গুৱাহাটীত উপস্থিত হৈছিল৷ গুৱাহাটীৰ সৰুসজাইস্থিত কোৱাৰেণ্টাইন গৃহত তিনিওগৰাকী লোকৰ তেজৰ নমুনা সংগ্ৰহ কৰি কোৱাৰেণ্টাইন কৰাৰ নিৰ্দেশ দিছিল চিকিৎসকে৷ কিন্তু ৰহস্যজনকভাৱে তেজ পৰীক্ষাৰ ফলাফল আহি নোপোৱাকৈ লোকজনে দুই বন্ধু সহ উপস্থিত হয় মদনপুৰত৷ ইফালে বৃহস্পতিবাৰে নিশাৰ ভাগত চিকিৎসা কৰ্মী আৰু আৰক্ষীৰ লোকে দেৱৰাজ আচাৰ্যক সৰুসজাই কোৱাৰেণ্টাইন গৃহলৈ লৈ যায় তথা তেওঁৰ দুই বন্ধু পশ্চিম বংগৰ গৌতম মিশ্ৰ আৰু বিটু গোপেক কামৰূপ জিলাৰ শিঙিমাৰী চিকিৎসালয় কোৱাৰেণ্টাইন গৃহত ৰখাৰ ব্যৱস্থা কৰে৷ ইফালে শুকুৰবাৰে আৰক্ষী প্ৰশাসন আৰু চিকিৎসা বিভাগৰ কৰ্মী আহি মদনপুৰস্থিত দুমহলীয়া আবাস গৃহটো চীল কৰে৷ এই ঘৰটোত থকা অন্য আবাসীসকলকো কোৱাৰেণ্টাইন কৰাৰ ব্যৱস্থা কৰিছে প্ৰশাসনে৷ আনহাতে দেৱৰাজ আচাৰ্যৰ সৈতে এটা আৱাসত একেলগে থকা অন্য আঠজন ব্যক্তিক ৰঙিয়া আদৰ্শ চিকিৎসালয়ত কোৱাৰেণ্টাইন কৰা হৈছে৷ এই আঠজন ক্ৰমে কোচবিহাৰৰ পংকজ বৰ্মন (২২), বিহাৰৰ ৰাম প্ৰৱেশ পণ্ডিত (৩২), চৰাইদেউ জিলাৰ ধ্ৰুৱ কোঁৱৰ (৩১), ৰাজু বৰুৱা (৩০) আৰু বিজু বৰুৱা(৩০), পশ্চিম বংগৰ অৰূপ কুমাৰ চৰ্দাৰ (২৭), উত্তৰপ্ৰদেশৰ সমীৰণ ভট্টাচাৰ্য (২৫) আৰু কোচবিহাৰৰ ৰাহুল বৰ্মণ(১৮)৷ আনহাতে আৱাসিক এলেকাটোৰ ৰান্ধনী মদনপুৰৰ সোমে নাথ আৰু তেওঁৰ পুত্ৰ উৎপল নাথকো ১০৮ যোগে ৰঙিয়াৰ আদৰ্শ চিকিৎসালয়ত কোৱাৰেণ্টাইনৰ বাবে প্ৰেৰণ কৰা হৈছে৷

ডিৰাক সীমান্ত

কেন্দ্ৰীয় চৰকাৰৰ এশ শতাংশ অনুদানেৰে ৰূপায়িত প্ৰধানমন্ত্ৰী কৃষক সন্মান নিধিৰ সাহায্যৰ নামত ৰাজ্যত সংঘটিত হৈছে ব্যাপক দুৰ্নীতি৷ চৰকাৰে প্ৰকাশ কৰা তালিকা দেখি চকু কপালত উঠিছে সচেতন মহলৰ লগতে প্ৰকৃত কৃষকসকলৰ। ভুৱা কৃষকৰ তালিকাৰে ভৰি পৰিছে সাহায্যৰ তালিকা৷ ফলত বঞ্চিত হৈছে প্ৰকৃত কৃষক৷ কাকপথাৰ উন্নয়ন খণ্ডৰ অন্তৰ্গত ১ নং সৰুমেচাই, ২ নং সৰুমেচাই, ৩ নং সৰুমেচাই, ১ নং সৰুডিৰাক, ২ নং সৰুডিৰাক আদিকে ধৰি প্ৰায় প্ৰতিখন গাঁৱৰ বিপৰীতে প্ৰকাশ পোৱা তালিকাত অলেখ অপৰিচিত অৰ্থাৎ অস্তিত্বহীন কৃষকৰ নাম সন্নিবিষ্ট হৈছে। এনে কৃষকৰ নাম তালিকাত কোনে অন্তৰ্ভুক্ত কৰিলে সেয়া এক ডাঙৰ ৰহস্য। এই বিয়াগোম কেলেংকাৰীৰ আঁৰত এটা যে এক বৃহৎ চক্ৰ জড়িত হৈ আছে সেয়া নিশ্চিত। এই আঁচনিৰ অধীনত কৃষকলৈ ৬০০০ টকাৰ বাৰ্ষিক অনুদান আগবঢ়োৱা হয়। প্ৰকৃত কৃষক ৰাইজক বঞ্চিত কৰি অস্তিত্বহীন লোক লোকক নিৰ্বাচন কৰা হৈছে হিতাধিকাৰী হিচাপে  https://pmkisan.gov.in/Rpt_BeneficiaryStatus_pub.aspx এই লিংকত গৈ নিজ গাঁৱৰ কৃষকৰ তালিকাখন দেখি স্তম্ভিত হৈছে সচেতন মহলে। এই সমগ্ৰ বিষয়টোৰ এক নিৰপেক্ষ তদন্ত হলে জালত পৰিব চৰকাৰৰ বিয়াগোম বিষয়া কৰ্মচাৰী সেয়া নিশ্চিত।

গুৱাহাটী

 দিল্লীৰ নিজামুদ্দিন মাৰ্কাজৰ পিছত গণ সংক্ৰমণ হ’ল ৰাজস্থানৰ আজমেৰ দৰগাহ ফেৰতৰ মাজত।যোৱা দুই মে’ৰ পৰা যাত্ৰা আৰম্ভ কৰা ৪৬ জনক কঢ়িয়াই অনা দুখন বাছ উপস্থিত হৈছিল শিলচৰত। এই বাছত ফৰিদুল ইছলাম নামৰ গাড়ী চোৰ এটাৰ জৰিয়তে ক’ৰ’ণা বিয়পিল। নিজৰ পৰিচয় গোপন কৰি বিশ্বনাথৰ ফৰিদুল পালেগৈ কাছাৰ। বৃহস্পতিবাৰে এই বাছত অহা চাৰিজন ক’ৰ’ণাক্ৰান্ত হোৱাৰ পিছত শুকুৰবাৰে একেখন বাছৰ তিনি যাত্ৰীও আক্ৰান্ত হৈছে। অন্য প্ৰায় দুকুৰীজনৰ স্বাস্থ্য পৰীক্ষা কৰা হৈছে সকলোকে শিলচৰ মেডিকেল কলেজত ৰখা হৈছে। ইফালে গুৱাহাটীত কালি চাৰিজন ক’ৰ’ণাক্ৰান্ত ওলাইছে। ইয়াৰে এগৰাকী হ’ল জিএমচিএইছৰ চিকিৎসক ডাঃ লিথিকেশ দি এছ।আন তিনিগৰাকী হ’ল বাইহাটাৰ দেবৰাজ আশ্চাৰ্য, খাৰঘূলিৰ বৰদা দাস আৰু বিৰুবাৰীৰ দিপীকা নাথ।ইয়াৰে দিপীকাৰ আক্ৰান্তৰ তথ্য সদৰী হৈছে মৃত্যুৰ পিছতহে। এনেকৈয়ে ৰাজ্যত ক’ৰ’ণাক্ৰান্তৰ সংখ্যা হৈছেগৈ ৫৬ জন। সুস্থ হৈছে ৩৪, মৃত্যু ২, হাস্পতালত আছে ২১ জন। 

জামুগুৰিহাট

ক’ৰ’ণা মহামাৰীয়ে সর্বত্ৰ বিভীষিকাৰ সৃষ্টি কৰাৰ মুহূর্তত বৃহস্পতিবাৰে সন্ধ্যা প্ৰায় ৭ বজাত এখন ট্রাকত তিনিজন যুৱক আহি জামুগুৰিহাটৰ মাজমজিয়াত উপস্থিত হোৱা এক ঘটনাই অঞ্চলটোৰ সচেতন মহলত শংকাৰ সৃষ্টি কৰিছে৷ উল্লেখ্য যে সন্ধ্যা ৬ বজাৰ পৰা বলবৎ হৈ থকা সান্ধ্য আইনৰ সময়ত এইদৰে গাড়ীৰ পৰা নামি নিজ গৃহলৈ যাব বিচৰা যুৱক কেইজনক দেখি সন্দেহ ওপজাত ডেকাসুন্দৰ গাঁৱৰ সচেতন তিনি যুৱক ক্রমে মিংকু কলিতা, পবিত্র বৰুৱা আৰু হেমন্ত হাজৰিকাই যুৱক কেইজনক আবদ্ধ কৰি প্রশ্ন কৰাত এক হৃদয়বিদাৰক কাহিনী সন্মুখলৈ আহে৷ উক্ত যুৱক কেইজন ক্রমে জামুগুৰিহাটৰ বকুলৰতলৰ শ্ৰীমন্ত ঠাকুৰীয়া (১৬), মাজগাঁৱৰ বিকি দাস (১৯) আৰু পানপুৰৰ ৰিংকল দাস৷ বিগত বৰ্ষৰ ডিচেম্বৰ মাহৰ পৰা অৰুণাচল প্রদেশৰ তেজুস্থিত আইটিবিপি কেম্পত আটাইকেইগৰাকী শ্রমিক হিচাপে নিয়োজিত আছিল৷ আটাইকেইজন শ্রমিকক বঙালমৰাৰ ঠিকাদাৰ জনৈক হুছেইনে উক্ত শিবিৰত নির্মাণ কার্যৰ শ্রমিক হিচাপে নিযুক্তি দিছিল৷ শ্রমিক কেইজনে প্রায় তিনি মাহ কাম কৰাৰ পাছত লকডাউন আৰম্ভ হোৱাত কাম বন্ধ হৈ পৰে যদিও ঘৰলৈ অহাৰ কোনো ব্যৱস্থা নথকাত উক্ত শিবিৰতে আবদ্ধ হৈ পৰে৷ মনকৰিবলগীয়া যে ঠিকাদাৰ  হুছেইনে এই শ্রমিকসকলক মাহে ১২,০০০ টকাকৈ পাৰিতোষিক দিয়াৰ বন্দবস্তিৰে কামত নিয়োজিত কৰিছিল যদিও কাম আৰম্ভ হোৱাৰ পৰা তিনি মাহ ওকলি যোৱাৰ পাচতো এটকাও নিদি লকডাউন আৰম্ভ হোৱাৰ পৰা যোগাযোগো বন্ধ কৰি দিয়ে৷ ইপিনে শ্রমিক কেইগৰাকীৰ হাতত নিয়া টকাকেইটাও  শেষ হোৱাত এক অভাৱনীয় পৰিস্থিতিৰ সৃষ্টি হোৱাত যোৱা ৪ তাৰিখৰ পৰা খোজ কাঢ়ি নিজ গৃহলৈ উভতি আহে৷ সম্পুর্ণ ৫ দিন খোজ কাঢ়ি কালি পুৱা নাৰায়ণপুৰত উপস্থিত হৈ সৌভাগ্যক্রমে এখন ট্রাকত উঠি সন্ধ্যা জামুগুৰি পাইহি৷ যুৱককেইজনৰ তথ্য অনুসৰি নাৰায়ণপুৰত তেওঁলোকক স্বাস্থ্য পৰীক্ষা কৰা হৈছিল যদিও মাত্র এজনৰ স্বাস্থ্য পৰীক্ষাৰ প্রমাণপত্র পোৱাৰ বিপৰীতে আন এজনৰ হাতত ষ্টাম্প পোৱা যায়৷ এনে ত্রুটিপুর্ণ স্বাস্থ্য পৰীক্ষা দেখি আবদ্ধ কৰি ৰখা যুৱককেইজনে তাৎক্ষণিকভাৱে জামুগুৰি আৰক্ষী নিবেশৰ লগত যোগাযোগ কৰাৰ লগতে জামুগুৰি পৰিপুৰক স্বাস্থ্যকেন্দ্রৰ স্বাস্থ্য বিষয়া ডাঃ হৰেন শইকীয়াৰ লগতো যোগাযোগ কৰে৷ স্বাস্থ্য বিষয়াগৰাকীৰ পৰামর্শক্রমে পৰৱর্তী সময়ত স্বাস্থ্য কেন্দ্রলৈ নি স্বাস্থ্য পৰীক্ষা কৰা হয় আৰু ১৪ দিনৰ বাবে স্ব-গৃহত আবদ্ধ হৈ থাকিবলৈ স্বাস্থ্য বিভাগৰ পৰা নির্দেশ জাৰি কৰা৷ মন কৰিবলগীয়া যে এইদৰে যদি নিশাৰ ভাগত অন্য ৰাজ্যত থকা লোকসকল আহি সকলোৰে অজ্ঞাতে নিজ গৃহলৈ প্রত্যাৱর্তন ঘটিছে তেন্তে অঞ্চলটোত এক ভয়াবহ বিপদৰ সন্মুখীন হোৱাৰ সম্ভাৱনাই দেখা দিব৷ জানিবপৰা মতে জামুগুৰি কেন্দ্রস্থলত গাঁওৰক্ষী বাহিনীৰ ব্যৱস্থা আছে যদিও  নিশাৰ ভাগত তেওঁলোকক দেখা নাযায়৷ আনহাতে পূর্বতে জামুগুৰি ব্যৱসায়ী সন্থাৰ নিজাকৈ নৈশ প্ৰহৰাৰ ব্যৱস্থা আছিল যদিও সেই ব্যৱস্থাও বর্তমান অচল৷ এনে সময়ত নিশাৰ ভাগত বাছ আস্থানৰ আশে-পাশে অাৰু গাঁওবোৰত প্রহৰাৰ ব্যৱস্থা গ্রহণ নকৰিলে সমগ্র ৰাজ্যতে ক’ৰ’ণাই ভয়াবহ ৰূপ ধাৰণ কৰিব বুলি ৰাইজে সন্দেহ প্রকাশ কৰিছে৷