মৰিগাঁও জিলাত ৰূপায়িত বান আৰু খহনীয়া প্ৰতিৰোধী প্ৰকল্পসমূহ পৰিদৰ্শন জিলা আয়ুক্তৰ

বান আৰু খহনীয়া প্ৰতিৰোধী আঁচনিৰ কাম খৰতকীয়া কৰাৰ নিৰ্দেশ

মৰিগাঁৱৰ জিলা আয়ুক্ত দেৱাশীষ শৰ্মাই আজি জিলাখনৰ বিভিন্ন ঠাইত সমাগত বাৰিষাৰ বতৰত বানৰ আশংকা থকা অঞ্চলসমূহ পৰিদৰ্শন কৰি বান প্ৰতিৰোধী প্ৰকল্পসমূহৰ কামৰ অগ্ৰগতিৰ বুজ লয়। তেওঁ জিলাখনত ব্ৰহ্মপুত্ৰৰ খহনীয়া প্ৰতিৰোধৰ বাবে এছিয়ান ডেভেলপমেণ্ট বেংক চমুকৈ এডিবিৰ ২৫০ কোটি টকা অৰ্থসাহায্যৰে নিৰ্মাণ কৰিবলগীয়া জিঅ’বেগ প্ৰকল্পৰ কামৰ সবিশেষ বুজ লয়। এই প্ৰকল্পৰ কাম কিছু আগবাঢ়িছে যদিও অহা নৱেম্বৰ মাহৰ পিছৰ পৰাহে পূৰ্ণগতিত চলিব। জিলা আয়ুক্তগৰাকীয়ে জলসম্পদ বিভাগৰ দ্বাৰা জিলাখনৰ বিভিন্ন ঠাই যেনে বৰডুবাটোপ, নাথগাঁও, কছাৰী গাঁও, গৰুবন্ধা, কাঠনি আদিত ৰূপায়িত বান আৰু খহনীয়া প্ৰতিৰোধী আঁচনিসমূহ পৰিদৰ্শন কৰে।

তেওঁ জলসম্পদ বিভাগৰ কাৰ্যবাহী অভিযন্তাক লগত লৈ কৰা এই পৰিদৰ্শনকালত উক্ত অঞ্চলসমূহত ৰূপায়িত কামসমূহ খৰতকীয়া কৰিবলৈ নিৰ্দেশ দিয়ে যাতে সম্ভাব্য বানৰ মোকাবিলা কৰিব পৰা যায়। তেওঁ কামৰ মানক লৈ কোনো ধৰণৰ আপোচ নকৰিবলৈও নিৰ্দেশ দিয়ে। অৱশ্যে তেওঁ বিভাগৰ কামৰ অগ্ৰগতিত সন্তুষ্টি প্ৰকাশ কৰে। স্মৰ্তব্য যে মৰিগাঁও জিলাত জলসম্পদ বিভাগে ৰূপায়ন কৰা বান আৰু খহনীয়া প্ৰতিৰোধী আঁচনিসমূহৰ বাবে বিগত বৰ্ষত জিলাখনত বান পৰিস্থিতিৰ উদ্ভৱ নহ’ল। এইবাৰো জিলাখনত বান পৰিস্থিতিৰ সৃষ্টি নহ’ব বুলি আশা কৰা হৈছে।

উল্লেখ্য যে মৰিগাঁও জিলাৰ ব্যাপক খহনীয়াপ্ৰৱন লাহৰীঘাট, মায়ং আৰু ভূৰাগাঁও ৰাজহ চক্ৰৰ নৈপৰীয়া ৰাইজৰ বাবে সুখবৰ কঢ়িয়াই আনি জলসম্পদ বিভাগে এ ডি বিৰ অৰ্থসাহায্যৰে জিঅ’বেগ প্ৰকল্প ৰূপায়ণৰ কাম অব্যাহত ৰাখিছে। প্ৰকল্পটো ৰূপায়ন হ’লে তিনিওটা ৰাজহ চক্ৰৰ ১৫ খন গাঁও প্ৰত্যক্ষভাৱে আৰু অৰ্ধশতাধিক গাঁও পৰোক্ষভাৱে উপকৃত হ’ব। তাৰ ভিতৰত লাহৰীঘাট ৰাজহ চক্ৰৰ অধীনৰ কাঠনি, বগলীপাৰা আৰু পামবৰি, ভূৰাগাঁও ৰাজহ চক্ৰৰ অধীনৰ দীঘলীআটি, বৰহলৌকান্দা, বতাবাৰী, বালিডোঙাপাম, ভূৰাগাঁও ৰাজহ নগৰ, মহমাৰী পথাৰ, কপটিমাৰি আৰু টেঙাগুৰিকা চাৰিগাঁও আৰু মায়ং ৰাজহ চক্ৰৰ পাভকাটি, গৰুবন্ধা, বৰামাৰি গাঁও আৰু বৰমাৰিপাম গাঁও প্ৰত্যক্ষভাৱে উপকৃত হ’ব। এই প্ৰকল্প ৰূপায়ন হ’লে লাহৰীঘাট ৰাজহ চক্ৰৰ অধীনৰ দক্ষিণ চেনীমাৰি, ৰজাগাধোৱা আদি গাঁৱৰ হাজাৰ হাজাৰ লোক তথা ভূৰাগাঁও আৰু মায়ং ৰাজহ চক্ৰৰ অৰ্ধশতাধিক গাঁৱৰ ৰাইজ পৰোক্ষভাৱে সুৰক্ষিত হ’ব।

ৰাজ্যৰ অধিকাংশ স্থানত মুৰ্গী-হাঁহৰ গড়ালৰ ভিতৰত হোৱা সৰ্প দংশনৰ খবৰ পোহৰলৈ আহিছে” – এই মন্তব্য সৰ্প বিশেষজ্ঞ সৌৰভ বৰকটকীৰ। উল্লেখ্য যে যোৱা ২২ মে’ত তেজপুৰৰ দ পৰ্বতীয়াৰ সাউদৰ চুবুৰীৰ এঘৰ ব্যক্তিৰ ঘৰৰ মুৰ্গীৰ গড়ালৰ পৰা এটি বিষাক্ত ফেঁটী সাপ উদ্ধাৰ কৰি বৰকটকীয়ে সংবাদ মাধ্যমক এনেদৰে কয়। ঘটনাৰ বিৱৰণী অনুসৰি -২১ মেত তেজপুৰৰ দ পৰ্বতীয়াৰ সাউদৰ চুবুৰীৰ ৰাজেন বৰা নামৰ এজন যুৱকৰ ঘৰত এডাল ফেঁটী সাপ দেখিবলৈ পোৱা যায়। ফেঁটী সাপডাল ৰাজেন বৰাৰ ঘৰৰ মুৰ্গীৰ গৰালত প্ৰথম প্ৰত্যক্ষ কৰে তেওঁৰ মাতৃয়ে। উল্লেখ্য যে ফেঁটী সাপডালে মুৰ্গীৰ গৰালত সোমাই মুৰ্গীৰ কণী ভক্ষণ কৰি থকা দেখা পাইছিল ৰাজেন বৰাৰ মাতৃয়ে।

লগে-লগে মাতৃয়ে ৰাজেন বৰাক সাপডালৰ বিষয়ে কোৱাত ৰাজেন বৰাই পলম নকৰি সৰ্প বিশেষজ্ঞ সৌৰভ বৰকটকীলৈ ফোন কৰে। খবৰৰ ভিত্তিত বৰকটকীয়ে সেই স্থানত উপস্থিত হৈ সাপটো উদ্ধাৰ কৰে আৰু সৰ্প বিষয়ক সজাগতা বাৰ্তাৰে কয় – সাপে দংশন কৰাৰ পিছত চিকিৎসা প্ৰদান কৰিলে ব্যক্তি গৰাকী সুস্থ হৈ পৰাটো নিশ্চিত। চিকিৎসা বিজ্ঞানত এণ্টিভেনমৰ প্ৰয়োগ যেতিয়াৰ পৰাই হৈছে তেতিয়াৰ পৰাই সাপে দংশন কৰা বহু ব্যক্তি মৃত্যুৰ দুৱাৰ দলিৰ পৰা উভটি আহিছে। কিন্তু শৰীৰৰ যি স্থানত বিষাক্ত সাপে দংশন কৰে সেই ঠাইখিনি শুকাবলৈ বহু সময় লাগে। এদিন-দুদিন নহয় কেতিয়াবা বছৰ ধৰি সাপে দংশন কৰা ঠাই ডোখৰ নুশুকাই।

সেয়েহে বিষাক্ত সাপৰ পৰা যিমান পাৰে দূৰত্ব বৰ্তাই ৰাখক। সাপৰ বিষয়ে জ্ঞান আহৰণ কৰক। আনহাতে যিসকল ব্যক্তিৰ ঘৰত মুৰ্গী,পাৰ, হাঁহ পোহা হয় বা গড়াল আছে তেওঁলোকে বিশেষ সতৰ্কতা অৱলম্বন কৰাটো উচিত। ৰাতি দিন বুলি কোনো কথা নাই, সাৱধান হৈ গড়ালত প্ৰৱেশ কৰে যেন। পাৰিলে ভৰিত গামবুট পিন্ধি লওক। বিষাক্ত সাপ গড়ালৰ ভিতৰৰ সজাত আহি বহি থাকিব পাৰে। বিশেষকৈ ৰাতিৰ সময়ত গড়াললৈ গ’লে মুখেৰে শব্দ নকৰি টৰ্চ লাইটৰ ব্যৱহাৰ কৰা উচিত। চলিত বৰ্ষৰ মে’ মাহত ৰাজ্যৰ বিভিন্ন জিলাৰ পৰা সৰ্প দংশনৰ কেইবাটাও তথ্য পোহৰলৈ আহিছে । তাৰে অধিকাংশ মুৰ্গী, হাঁহৰ গড়ালত পোৱা বিষাক্ত সাপৰ দ্বাৰা মানুহৰ দংশন হোৱা খবৰ মোলৈ আহিছে। সেয়ে আমি সকলোৱে সৰ্তকতা অৱলম্বন কৰাটো উচিত।