অসম আন্দোলনৰ অগ্ৰণী নেতা, অসম সাহিত্য সভাৰ প্ৰাক্তন ভাৰপ্ৰাপ্ত সম্পাদক প্ৰধান, বিশিষ্ট সমাজ সংগঠক প্ৰয়াত সমীৰণ বৰদলৈদেৱৰ ৬৬ তম জন্মবাৰ্ষিকী উপলক্ষে সোমবাৰে সমীৰণ বৰদলৈ স্মৃতিৰক্ষা সমিতি আৰু সদৌ যোৰহাট জিলা ছাত্ৰ সন্থায়ে যৌথভাৱে প্ৰয়াত সমাজপ্ৰাণ ব্যক্তিগৰাকীৰ সশ্ৰদ্ধ সোঁৱৰণত যোৰহাট তাৰকাগৃহৰ প্ৰেক্ষাগৃহত ‘সমাজৰ দিন’ শীৰ্ষক কাৰ্যসূচী অনুষ্ঠিত কৰে। স্মৃতি ৰক্ষা সমিতিৰ সম্পাদক বিজয় শংকৰ বৰদলৈয়ে আঁত ধৰা সভাখনত যৌথভাৱে সঞ্চালনা কৰে স্মৃতিৰক্ষা সমিতিৰ সভাপতি ললিত বৰা আৰু সদৌ যোৰহাট জিলা ছাত্ৰ সন্থাৰ সভাপতি সংকল্প গগৈয়ে।

কাৰ্যসূচীৰ আৰম্ভণিতে প্ৰয়াত সমীৰণ বৰদলৈদেৱৰ সহধৰ্মিনী শিখা বৰদলৈয়ে সমীৰণ বৰদলৈদেৱৰ প্ৰতিচ্ছবিত বন্তি প্ৰজ্বলন কৰে। ইয়াৰ পাছতে পংকজ বৰুৱাই মংগলাচৰণ আৰু প্ৰয়াত সমীৰণ বৰদলৈৰ জীয়াৰী অভিলেখা বৰদলৈয়ে প্ৰাৰ্থনা পৰিৱেশন কৰাৰ পাছতেই জাঁজী হেমনাথ শইকীয়া মহাবিদ্যালয়ৰ অসমীয়া বিভাগৰ প্ৰবক্তা ড° মণ্টু কুমাৰ বৰাই নিৰ্দিষ্ট বক্তাৰূপে উপস্থিত থাকি প্ৰয়াত সমীৰণ বৰদলৈৰ জাতীয় জীৱন আৰু যোৰহাটৰ সমাজ জীৱনলৈ অনবদ্য অৱদান, উত্তৰ প্ৰজন্মৰ বাবে ৰাখি থৈ যোৱা চানেকিসমূহৰ সম্পৰ্কে বক্তব্য ৰাখে।

লগতে ড° বৰাই কয়, সমাজৰ বিভিন্ন ক্ষেত্ৰক অসংগঠিত যোগাত্মক দিশ সমূহক সংগঠিত কৰাৰ ক্ষেত্ৰত বৰদলৈ দেৱে মুখ্য ভূমিকা পালন কৰিছিল ৷ উত্তৰ প্ৰজন্মৰ মাজত প্ৰয়াত বৰদলৈদেৱৰ চৰ্চা অব্যাহত ৰখাৰ স্বাৰ্থত দীপাংকৰ বিদ্যাপীঠৰ পঞ্চম শ্ৰেণীৰ ছাত্ৰী অভিনন্দা বৰপূজাৰীয়ে সুন্দৰভাৱে বৰদলৈদেৱৰ জীৱন বৃত্তান্তৰ ওপৰত আলোকপাত কৰি বক্তব্য ৰাখে।

অনুষ্ঠানটোৰ মূল আকৰ্ষণৰ কেন্দ্ৰবিন্দু হিচাপে বিবেচিত সদৌ যোৰহাট জিলা ছাত্ৰ সন্থা আৰু সমীৰণ বৰদলৈ স্মৃতিৰক্ষা সমিতিৰ পূৰ্ব নিৰ্দ্ধাৰিত কাৰ্যসূচী হিচাপে ‘সমাজপ্ৰাণ প্ৰয়াত সমীৰণ বৰদলৈ সমাজহিতৈষী বঁটা’ ২০২৪, মৰিগাঁও জিলাৰ জিলা আয়ুক্ত তথা সৰ্বভাৰতীয় কেঞ্চাৰ কেয়াৰ ফাউণ্ডেশ্যনৰ অধ্যক্ষ, দিপশিখা ফাউণ্ডেশ্যনৰ প্ৰতিষ্ঠাতা দেৱাশীষ শৰ্মাক প্ৰদান কৰা হয়।

উক্ত বঁটাটি এখনি সম্বৰ্ধনা পত্ৰ ,চেলেং চাদৰ , গামোচা , জাপি , এখন সঁফুৰা , এটি স্মাৰক আৰু নগদ দহ হাজাৰ টকাৰে সম্বলিত। অসম চৰকাৰৰ এগৰাকী উচ্চপদস্থ বিষয়া হৈও ২০০৪ চনৰ পৰা দীপশিখা ফাউণ্ডেশ্যন প্ৰতিষ্ঠাৰে পৰা বৰ্তমানৰলৈকে ডেৰ লক্ষাধিকতকৈও অধিক কৰ্কটৰোগী আৰু অভিভাৱকক নিঃস্বাৰ্থভাৱে সেৱা প্ৰদান কৰি উপকৃত অহা মানৱদৰদী ব্যক্তিজনক সমাজলৈ আগবঢ়োৱা এই অৱদানৰ বাবে এই বৰ্ষৰ বঁটা প্ৰদান কৰা হয়।

বঁটাটি লাভ কৰি বঁটাপ্ৰাপকগৰাকীয়ে কয় , প্ৰয়াত সমীৰণ বৰদলৈৰ পৱিত্ৰ সোঁৱৰণত প্ৰদান কৰা এই বঁটা নিজ গৃহ জিলাত গ্ৰহণ কৰি নিজকে ধন্য মানিছোঁ আৰু উৎসাহিত হোৱাৰ লগতে যথেষ্ট অনুপ্ৰেৰণা লাভ কৰিছোঁ । লগতে কয় , ছাত্ৰ সন্থা আৰু স্মৃতি ৰক্ষা সমিতিৰ এই মহৎ পদক্ষেপক শলাগ লোৱাৰ লগতে প্ৰয়াত বৰদলৈদেৱৰ সান্নিধ্য সুঁৱৰি যোৰহাটৰ সমাজ জীৱনত সমীৰণ বৰদলৈ সদায় ধ্ৰুৱতৰা হৈ জিলিকি ৰ’ব বুলি ব্যক্ত কৰে । বঁটা প্ৰাপক গৰাকীয়ে বৰদলৈদেৱৰ জীৱনৰ শেষৰচোৱা সময়ৰ সান্নিধ্য সুঁৱৰি কৰ্কটৰোগৰ সজাগতাৰ উপৰতো বক্তব্য ৰাখে৷

ভাল চিন্তা আৰু ভাল কৰ্মৰাজি বিয়পাই নিয়াৰ চিন্তাৰে সমৃদ্ধ সমীৰণ বৰদলৈৰ জীৱন এক মাইলৰ খুঁটি বুলি তেওঁ অভিহিত কৰে। অনুষ্ঠানটোত উপস্থিত থাকি প্ৰয়াত সমীৰণ বৰদলৈদেৱৰ সহধৰ্মিনী শিখা বৰদলৈয়ে ছাত্ৰ সন্থা আৰু স্মৃতিৰক্ষা সমিতিৰ এইয়া এক মহৎ প্ৰচেষ্টা বুলি ব্যক্ত কৰাৰ লগতে সমীৰণ বৰদলৈদেৱক সমাজজীৱনত জীয়াই ৰখাৰ ক্ষেত্ৰত এনে প্ৰচেষ্টা হাতত লোৱা ছাত্ৰ সন্থাক ধন্যবাদ জ্ঞাপন কৰে। সভাখনত সদৌ অসম ছাত্ৰ সন্থাৰ সাহিত্যিক সম্পাদিকা নিহাৰিকা শইকীয়া, অসম উন্নতি সভাৰ সম্পাদক জুল খাউণ্ড, যোৰহাট মহকুমা পৰিষদৰ প্ৰাক্তন সচিব বিমান বৰুৱা, জ্যেষ্ঠ ক্ৰীড়া সংগঠক ননী দত্ত, জগন্নাথ বৰুৱা মহাবিদ্যালয়ৰ প্ৰাক্তন অধ্যক্ষ ড° বিমল চন্দ্ৰ বৰী, সমীৰণ বৰদলৈদেৱৰ একালৰ সতীৰ্থ প্ৰাক্তন ছাত্ৰনেতা ৰাজা চক্ৰৱৰ্তী হেমন্ত কলিতা আদিকে ধৰি ডেৰ শতাধিক ব্যক্তি চক্ৰৱৰ্তী উপস্থিত থাকে।

বাতৰি কাকতলৈ প্ৰেৰণ কৰা এক প্ৰেছ বিবৃতিত স্মৃতিৰক্ষা সমিতিৰ সাধাৰণ সম্পাদক বিজয় শংকৰ বৰদলৈয়ে কয় , জাতীয়তাবাদৰ পুৰোধা ব্যক্তি, যোৰহাটৰ সমাজজীৱনৰ এক উজ্জ্বল নক্ষত্ৰ, সমাজ সংগঠক তথা ক্ৰীড়া সংগঠক প্ৰয়াত সমীৰণ বৰদলৈদেৱৰ কৰ্মৰাজি, আদৰ্শ আৰু অসাধাৰণ-অনন্য চিন্তা চেতনাৰ প্ৰচাৰ আৰু প্ৰসাৰেই হৈছে আজিৰ ‘সমাজৰ দিন’ আৰু ‘সমাজপ্ৰাণ প্ৰয়াত সমীৰণ বৰদলৈ সমাজসেৱা বঁটা’ প্ৰদানৰ মুখ্য উদ্দেশ্য।

প্ৰয়াত বৰদলৈদেৱৰ চিন্তাৰ বাটেদি সমাজ উপকৃত হ’ব পৰাকৈ সমাজখনৰ সৈতে নিবিড়ভাৱে সংপৃক্ত হৈ থকা যি সমল তেওঁ এৰি গৈছে তাৰ দ্বাৰা যাতে নতুন প্ৰজন্মই এক গতি লাভ কৰিব পাৰে সেই চিন্তাৰ লগতে সমীৰণ বৰদলৈ দেৱক চিৰসজীৱ কৰি সমাজত জীয়াই ৰখাৰ উদ্দেশ্য আগত ৰাখিয়েই পুনৰ ছাত্ৰ সন্থা আৰু সমীৰণ বৰদলৈ স্মৃতিৰক্ষা সমিতিয়ে তেওঁৰ ৬৬ তম জন্মবাৰ্ষিকী আজি ৰাজহুৱা পৰিৱেশত উদযাপন কৰিছে। আগন্তুক দিনটো অধিক নতুনত্ব আৰু গতিশীলতাৰে এই অনুষ্ঠান আগুৱাই নিয়া হ’ব বুলিও তেওঁ ব্যক্ত কৰে।

সভাতেই ছাত্ৰ সন্থাই ইতিমধ্যে প্ৰয়াত সমীৰণ বৰদলৈৰ স্মৃতি চিৰযুগমীয়া কৰি ৰখাৰ ক্ষেত্ৰত উত্থাপন কৰা দাবীসমূহ কাৰ্যকৰীকৰণৰ বাবে পুনৰ দোহাৰে। অনুষ্ঠানত বঁটাপ্ৰাপক দেৱাশীষ শৰ্মাক যোৰহাট জিলা সাহিত্য সভা, অসম বকুলবন সমাজ, যোৰহাট মহকুমা ছাত্ৰ সন্থা, অসম সেনা, অসম উন্নতি সভা, আজু, যোৰহাট জিলা সমিতি,জ্যোতি চিনে ক্লাৱ, যোৰহাট সাংস্কৃতিক মঞ্চ, সুৰৰ দেউল সংগীত বিদ্যালয়, অসম জাতীয়তাবাদী যুৱ ছাত্ৰ পৰিষদ, যোৰহাট জিলা ক্ৰীড়া সন্থা, যোৰহাট জিলা পেৰালিম্পিক সন্থা, যোৰহাট জিলা লেখিকা সমাৰোহ সমিতি, যোৰহাট জিলা লেখিকা সমাজ, বিহু শিল্পী সংস্থা, দিশ, সাহস, সতীৰ্থ-৯১, বন্ধু-৮৯, উজনি অসম চেম্বাৰ্চ অব কমাৰ্চ, আগ্ৰৱাল যুৱ সমাজ, শিখ য়ুথ এচ’চিয়েশ্যন, চুতীয়া জাতি যুৱ সন্মিলন, শংকৰদেৱ বিদ্যা নিকেতন, যোৰহাট গ্ৰেটাৰ লায়ন্স ক্লাৱ, কৃষ্টিৰ কঠীয়া, যোৰহাট মৎস্য বজাৰ ব্যৱসায়ী সন্থা, যোৰহাট জিলা টাইকোৱাণ্ডো সন্থা, জয়হিন্দ মহিলা সমিতি, বড়িগাঁও ছাত্ৰ সমাজ, নৱোদয় ক্লাৱ, যোৰহাট আঞ্চলিক ছাত্ৰ সন্থা, পূব যোৰহাট আঞ্চলিক ছাত্ৰ সন্থা, পশ্চিম যোৰহাট আঞ্চলিক ছাত্ৰ সন্থা, বালিগাঁও আঞ্চলিক ছাত্ৰ সন্থা, টিয়ক আঞ্চলিক ছাত্ৰ সন্থা, কাকজান আঞ্চলিক ছাত্ৰ সন্থা, অনুসূচীত জাতি যুৱ ছাত্ৰ পৰিষদ, যোৰহাট জিলা দেউৰী ছাত্ৰ সন্থা, উত্তৰ-পশ্চিম যোৰহাট ফাৰ্মাচ প্ৰডিউচাৰ কোম্পানী, ড° ভূপেন হাজৰিকা পূৰ্ণাংগ প্ৰতিমূৰ্তি নিৰ্মাণ সমিতিকে ধৰি যোৰহাটৰ বিভিন্ন অনুষ্ঠান-প্ৰতিষ্ঠান , ৰাজহুৱা অনুষ্ঠান, বিভিন্ন দল-সংগঠনে সম্বৰ্ধনা জ্ঞাপন কৰে।

ৰূপান্তৰহে জগত সুন্দৰ কৰে। পৃথিৱীক ধুনীয়া কৰিব হলে কাব্য, সাহিত্য আৰু শিল্পই সুন্দৰ কৰি তুলে। মানুহৰ জীৱন সাৰ্থক হ’ব মানুহে অন্তৰংগ ভাবে আৰু নিবিড় ভাবে সৌন্দৰ্য্যৰ সম্ভাৰ গঢ়ি তুলিব লাগিব। তাৰ উপৰিও চিন্তাৰ আন্দোলনে কাব্য প্ৰতিভাৰ উন্মেষ ঘটায়। সোমবাৰে ৰঙাপৰা মহাবিদ্যালয়ৰ ডিজিটেল প্ৰেক্ষাগৃহত সাহিত্য একাডেমীৰ উদ্যোগত আৰু ৰঙাপৰা মহাবিদ্যালয়ৰ সহযোগত অনুষ্ঠিত হোৱা কাব্যিক অৰ্ন্তদৃষ্টি আৰু জীৱন শীৰ্ষক আলোচনাচক্ৰত উপস্থিত থাকি এনেদৰে মন্তব্য কৰে সুবক্তা, দাৰ্শনিক দিগন্ত বিশ্ব শৰ্মাই।

পুৱা ১০ বজাত আৰম্ভ হোৱা অনুষ্ঠানটোৰ আতঁ ধৰে মহাবিদ্যালয় খনৰ অধ্যাপক প্ৰশান্ত বড়োয়ে আৰু অনুষ্ঠানটোৰ আদৰণি ভাষণ পাঠ কৰে মহাবিদ্যালয়ৰ অধ্যক্ষ ড॰ ৰঞ্জন কলিতাই। নিজৰ আদৰণি ভাষণত অধ্যক্ষ ড॰ ৰঞ্জন কলিতাই কয় যে ৰঙাপৰা মহাবিদ্যালয়ৰ বাবে আজিৰ দিনটো এক ঐতিহাসিক দিন। তেওঁৰ কাৰ্যকালৰ বিগত ৬ বছৰত এইখনে এনেধৰণৰ প্ৰথম আলোকপাতচক্ৰ।এই বছৰৰ শেষৰফালে এনে ধৰণৰ আলোচনাচক্ৰ আকৌ অনুষ্ঠিত কৰা হ’ব বুলি তেওঁ কয়। সাহিত্যৰ মাজেদি অতীতক বিচাৰি পোৱা যায় আৰু বৰ্তমানৰ সমস্যা সাহিত্যৰ মাজেদি প্ৰতিফলিত হয় বুলি তেওঁ মন্তব্য কৰে।

সাহিত্য একাডেমী কলিকতাৰ আঞ্চলিকৰ সম্পাদক দেবেন্দ্ৰ কুমাৰ দেবেশে নিজৰ ভাষণ প্ৰসংগত উল্লেখ কৰি কয় যে বৰ্তমান সমাজ ব্যৱস্থাত চলি থকা বিভিন্ন সমস্যাৰ অনুভুতি সমুহ সাহিত্যিক আৰু কবি সকলে দাঙি ধৰাৰ প্ৰয়াস কৰি আহিছে। পৃথিৱীত থকা সমস্যা সমুহ মানৱীয় অনুভূতিৰে সমাধানৰ দিশত সমাধান হ’ব বুলি আশা কৰিব পাৰি।

তাৰোপৰি তেখেতে উল্লেখ কৰি কয় যে অহা মাৰ্চ মাহত সাহিত্য একাডেমী অনুষ্ঠানটোৱে ৭০ বছৰত ভৰি দিব।বৰ্তমান একাডেমীয়ে ভাৰতৰ ২৪ টা ভাষাত শিশু, যুৱক, সাহিত্য অনুবাদ, নাৰী সমাজ, প্ৰতিবন্ধক সকলৰ বাবে কাম কৰি ৮০০০ পুস্তিকা প্ৰকাশ কৰিছে। তাৰোপৰি সাহিত্য একাডেমীয়ে বছৰত ১৫০ টা গ্ৰন্থ মেলাত অংশগ্ৰহণ কৰে।

লগতে অনুষ্ঠানটোৱে নিজৰ কাকত প্ৰকাশ কৰা বুলি কয়। বৰ্তমান ইন্টাৰনেটত সাহিত্য একাডেমীৰ বহু তথ্য সময়ে সময়ে অনুষ্ঠানটোৱে প্ৰেৰণ কৰি আহিছে। গতিকে কবি আৰু সাহিত্যিকসকলে নিজৰ প্ৰতিভাৰে সমাজখনক আগবঢ়াই নিয়ে আৰু এই ক্ষেত্ৰত সাহিত্য একাডেমীয়ে নিজৰ অৱদান আগবঢ়াই গৈছে। সাহিত্য উৎসৱ গ্ৰামলোক নামৰ এটা অনুষ্ঠান গাঁৱত কৰা হয় বুলি তেওঁ কয়।

ইতিমধ্যে কাৰ্বি ভাষাতো এনে অনুষ্ঠান কৰা হৈছে বুলি তেওঁ উল্লেখ কৰে। অনুষ্ঠানত মহাবিদ্যালয়ৰ পৰিচালনা সমিতিৰ সভানেত্ৰী চাৰু চহৰীয়া নাথ উপস্থিত থাকি অনুষ্ঠানটোৰ শুভেচ্ছামুলক বক্তব্য আগবঢ়াই আৰু এনে ধৰণৰ আলোচনাচক্ৰই অধ্যাপক অধ্যাপিকা সকলক উপকৃত কৰিব বুলি আশা প্ৰকাশ কৰে।

ইপিনে কবিসন্ধি নামৰ কবিতাৰ অনুষ্ঠানত যশস্বী কবি বিপুল জ্যোতি শইকীয়াই তেখেতৰ সাহিত্য যাত্ৰা আৰু শেহতীয়া সাহিত্য কৰ্মৰ বিষয়ে বক্তৃতা দিয়ে। অনুষ্ঠানত অঞ্চলটোৰ বিশিষ্ট কবি ভৱেশ মিশ্ৰ, কমলা বেগম,জয়া শইকীয়া দাস,আৰ কে বেজবৰুৱা,অসিত ভট্টাচাৰ্য্য, ৰঙাপৰা উচ্চতৰ মাধ্যমিক বিদ্যালয়ৰ অধ্যক্ষ মোহন গোস্বামীৰ লগতে ৰঙাপৰা মহাবিদ্যালয় আৰু বালিপৰা মডেল মহাবিদ্যালয়ৰ অধ্যাপক অধ্যাপিকা উপস্থিত থাকে।

গণশিল্পী মঘাই ওজা কলাক্ষেত্ৰ অসমে তেওঁলোকৰ শ্ৰেষ্ঠ বঁটা ‘গণশিল্পী মঘাই ওজা সোঁৱৰণী বঁটা’ এইবাৰ অসমৰ মুখ্যমন্ত্ৰী ড॰ হিমন্ত বিশ্ব শৰ্মালৈ আগবঢ়াইছে। এটা প্ৰেছ বিজ্ঞপ্তিত এইকথা ঘোযণা কৰিছে যোৰহাটৰ হাতীগড় অৱস্থিত কলাক্ষেত্ৰ সমিতিয়ে।

যোৱা ২৫ ফ্ৰেব্ৰুৱাৰীৰ অনুষ্ঠানত গণশিল্পী মঘাই ওজা কলাক্ষেত্ৰৰ সাধাৰণ সভাই সৰ্বসন্মত ভাৱে এই সিদ্ধান্ত গ্ৰহণ কৰে। বিজ্ঞপ্তিটোত কলাক্ষেত্ৰৰ সভাপতি ৰাতুল চৰণ বৰা আৰু মুখ্য সম্পাদক নীলমণি বৰাই কয় যে পঞ্চাশৰ দশকতে অসমৰ লোকবাদ্য ঢোলক বিশ্বত প্ৰতিষ্ঠা কৰিবলৈ সক্ষম হৈছিল গণশিল্পী মঘাই ওজাই।

সুধাকণ্ঠ ড॰ ভুপেন হাজৰিকাৰ লগত একেলগে ভাৰতবৰ্ষৰ বিভিন্ন ঠাইত অনুষ্ঠান পৰিৱেশন কৰি ঢোলক বিশ্ব দৰবাৰত প্ৰতিষ্ঠা কৰিছিল। বিপ্লৱী চেতনাৰে গণশিল্পী মঘাই ওজাই সমাজ আৰু দেশৰ অন্যায় অবিচাৰ, শোষণৰ বিৰুদ্ধে ঢোলত ৰগৰ দিয়েই প্ৰতিবাদ কৰিছিল।

কলাগুৰু বিষ্ণুপ্ৰসাদ ৰাভা যেতিয়া ভাৰতীয় গণনাট্য সংঘৰ অসম শাখাৰ সভাপতি আছিল একে সময়তে গণশিল্পী মঘাই ওজা আছিল আছিল উপসভাপতি। গণশিল্পী মঘাই ওজাই ঢোলক বিশ্ব দৰবাৰত প্ৰতিষ্ঠা কৰাৰ সুদীৰ্ঘ ষাঠিটা বছৰৰ পিছত ২০২৩ বৰ্ষত মুখ্যমন্ত্ৰী ড॰ হিমন্ত বিশ্ব শৰ্মাই পুনৰবাৰ ঢোলবাদ্যক বিশ্বত প্ৰতিষ্ঠা কৰি গ্ৰীনিজ বুকত নাম খোদিত কৰাই।

তদুপৰি ঢুলীয়া শিল্পীসকলৰ প্ৰতিও উপযুক্ত মাননী আগবঢ়াই সন্মান প্ৰদৰ্শন কৰে। “মঘাই ওজাবিহীন বিহু নহয় সিমান মধুৰ” বুলি গীত গাই খেদ প্ৰকাশ কৰিছিল সুধাকণ্ঠই। সেই বিহুকো অসমৰ মুখ্যমন্ত্ৰীগৰাকীয়ে বিশ্বত প্ৰতিষ্ঠা কৰিলে। এই মহৎ কামৰ বাবেই মুখ্যমন্ত্ৰীজনলৈ গণশিল্পী মঘাই ওজা কলাক্ষেত্ৰ অসমে তেওঁৰ প্ৰতি সন্মান প্ৰদৰ্শন কৰি এই বঁটাটো আগবঢ়াই বুলি বিজ্ঞপ্তিটোত উল্লেখ কৰে।