৯৩সংখ্যক ৰঙিয়াৰ শ্ৰীমন্ত শংকৰদেৱ সংঘৰ দ্বিতীয় দিনা ৰঙিয়াৰ ভয়ৰা মৰাণজানাৰ হাতীখলা পথাৰত বৈকুণ্ঠপুৰীত পৰিণত হয় সমন্বয় ক্ষেত্ৰ । সমন্বয় ক্ষেত্ৰত অগণন ভকত-বৈষ্ণৱ, সেৱক আৰু আই-মাতৃসকলৰ মিলনৰ তীৰ্থ ভূমিত পৰিণত হোৱা অধিৱেশনত পুৱাৰে পৰা হৰিনামৰ ধ্বনি, পৰিৱেশ নিকাকৰণ, প্ৰাতঃ প্ৰসংগ আদি অনুষ্ঠিত হৈ যায়। তাৰ পিছত পুৱা ৯ বজাত প্ৰতিনিধি সভাকক্ষত জিলা শাখা সমিতিৰ সভাপতি-সম্পাদকসকলৰ সন্মিলন অনুষ্ঠিত হয়। ইফালে এই সন্মিলনৰ পিছতে দিনৰ ১১ বজাত মূল মঞ্চত সাহিত্য শাখা সমিতিৰ মুকলি সভা অনুষ্ঠিত হয়। সংঘৰ সাহিত্য শাখা সমিতিৰ সভাপতি ড০ জগত চন্দ্ৰ কলিতাই সভাপতিত্ব কৰা বাৰ্ষিক অধিৱেশনৰ মুকলি সভাখন উদ্বোধন কৰে সংঘৰ সাহিত্য শাখা সমিতিৰ প্ৰাঃ সভাপতি ড০ সুৰেশ চন্দ্ৰ বৰাই । অধিৱেশন কি দৰে চলাব লাগে তথা শংকৰ সংঘৰ আচাৰ-ব্যৱহাৰ আদি সকলো দিশ কেৱল অধিৱেশনৰ পৰা শিকিব পাৰি বুলি অসম জাতীয়তাবাদী যুৱ-ছাত্ৰ পৰিষদৰ সভাপতি পলাশ চাংমাই সভাত ভাষণ প্ৰদান কৰে। ইফালে সংঘৰ সাহিত্য সভাৰ প্ৰাক্তন সভাপতি তথা ডিব্ৰুগড় বিশ্ববিদ্যালয়ৰ পৰিবেশ্য কলাৰ অধ্যাপক মৃণাল কুমাৰ বৰুৱাই গুৰুজনাৰ সাহিত্য চৰ্চা জাতীয় দায়িত্ব বুলি গ্ৰহণ কৰিব লাগে আৰু গুৰুজনাক বাদ দি জাতীয় চেতনা অসম্ভৱ। লগতে গুৰুজনাৰ সাহিত্য অনুগামীৰ অনুপ্ৰেৰণা চিৰন্তন বিদ্যমান হৈ থাকিব বুলি উল্লেখ কৰে। সভাত উপস্থিত থাকি অসম জাতীয় পৰিষদৰ সভাপতি লুৰীণজ্যোতি গগৈয়ে এটা জাতিক মানৱীয় সভ্যতা, প্ৰমূল্য, ঐক্যবোধ গুৰুজনাই দি থৈ গৈছে । ৰামৰাজ্যৰ সপোন দেখা ভাৰতত গুৰুজনাই ৫০০ বছৰ আগতে প্ৰতিষ্ঠা কৰি থৈ গৈছে । অসমত কেৱল প্ৰেম, ভাতৃত্ববোধ গুৰুজনাই আগবঢ়াই দিছে।

অসমত গুৰুজনাক সংকটত পেলাবলৈ কিছুমান শক্তি মাজে মাজে জাগ্ৰত হয়। যি জাতীয় চেতনা কেৱল গুৰুজনাৰ সত্তা আদিক লৈ গুৰুজনাই দি যোৱা আদৰ্শ আৰু শ্ৰীমন্ত শংকৰদেৱ সংঘৰ অধিৱেশনৰ অৱদানক লৈ বিশদভাৱে আলোকপাত কৰে। আনহাতে, অধিৱেশনত বাংলাদেশ উচ্চতম ন্যায়ালয়ৰ অধিবক্তা সুবোধ চন্দ্ৰ দাস উপস্থিত থকাৰ কথা আছিল যদিও বিশেষ কাৰণবশতঃ অনুপস্থিত থকাত অধিৱেশনৰ বাবে গুৰুজনাক লৈ এক শুভেচ্ছাবাণী পঠিওৱাত পাঠ কৰি দিয়ে। আনহাতে, সভাত নিৰ্দিষ্ট বক্তাৰূপে চিলাৰায় মহাবিদ্যালয়ৰ প্ৰাক্তন অধ্যক্ষ ড০ দ্বিজেন্দ্ৰ নাথ ভকতে গুৰুজনাৰ আদৰ্শ আৰু সংস্কৃতিৰ লগতে কোচ ৰাজবংশী জনগোষ্ঠীৰ ৰজা নৰনাৰায়ণ আৰু বিশ্ব মহাবীৰ চিলাৰায়ৰ ইতিহাসক লৈ এক গুৰুত্বপূৰ্ণ ভাষণ আগবঢ়ায়। সভাত বিশিষ্ট অতিথি হিচাপে ৰবীন্দ্ৰনাথ ঠাকুৰ বিশ্ববিদ্যালয়ৰ উপাচাৰ্য অমলেন্দু চক্ৰৱৰ্তীকে ধৰি বিধায়ক ভৱেশ কলিতা, সংঘৰ কেইবাগৰাকীও বিষয়ববীয়া, অসম জাতীয় পৰিষদৰ দুলু আহমেদ, প্ৰাক্তন বিধায়ক সত্যব্ৰত কলিতা উপস্থিত থাকে।

অগণন ভকত-বৈষ্ণৱ সেৱকৰ উপস্থিতিৰে সমন্বয়স্থলী ৯৩সংখ্যক শ্ৰীমন্ত শংকৰদেৱ সংঘৰ অধিৱেশনৰ আজি দ্বিতীয় দিন। ইফালে দিনত অনুষ্ঠিত হোৱা সাহিত্য শাখা সমিতিৰ মুকলি সভাৰ পিছতে মূল মঞ্চত দিনৰ ২ বজাত সংস্কৃতি শাখা সমিতিৰ মুকলি সভা অনুষ্ঠিত হয়। এই সভাখন উদ্বোধন কৰে শ্ৰীমন্ত শংকৰদেৱ সংঘৰ প্ৰাক্তন উপ-পদাধিকাৰ বসুন্ধৰ ডেকাই । সংস্কৃতি শাখা সমিতিৰ সভাপতি পৱিত্ৰ প্ৰাণ বৰাই সভাপতিত্ব কৰা সভাখনত সন্মানীয় অতিথি হিচাপে উপস্থিত থাকি অসম বিধানসভাৰ অধ্যক্ষ বিশ্বজিৎ দৈমাৰীয়ে গুৰুজনাই সাহিত্য-সংস্কৃতিৰ লগতে জগতখনৰ বাবে বৈষ্ণৱ ধৰ্ম প্ৰচাৰ কৰিছিল। কিন্তু জগতখনৰ বাবে গুৰুজনাৰ লগতে মাধৱদেৱে যি অৱদান আগবঢ়াই থৈ গ’ল তাক বাদে অন্য দ্বিতীয়, তৃতীয় মহাপুৰুষ সৃষ্টি নহ’ল বুলি ভাষণ প্ৰসংগত উল্লেখ কৰে । সভাত নিৰ্দিষ্ট বক্তাৰূপে উপস্থিত থাকে সংস্কৃতি শাখা সমিতিৰ উপ-সভাপতি ডাঃ নৱকৃষ্ণ ৰাজখোৱাৰ লগতে বিশিষ্ট অতিথি হিচাপে ৰাজ্য চৰকাৰৰ অতিৰিক্ত মুখ্য সচিব বিশ্বৰঞ্জন শ্যামল, ডিব্ৰুগড় বিশ্ববিদ্যালয়ৰ পৰিবেশ্য কলাৰ সহযোগী অধ্যাপক ড০ যাদৱ চন্দ্ৰ বৰা, পদাধিকাৰ ভৱেন্দ্ৰ নাথ ডেকা, প্ৰাক্তন বিধায়ক সত্যব্ৰত কলিতাকে ধৰি সংঘৰ কেইবাগৰাকীও বিষয়ববীয়া উপস্থিত থাকে।

আনহাতে, অধিৱেশনৰ দ্বিতীয় দিনা কাৰ্যসূচী অনুসৰি সংস্কৃতি শাখা সমিতিৰ মুকলি সভাৰ পিছতে সন্ধিয়া সমূহীয়া প্ৰাৰ্থনা, নাম-প্ৰসংগ আৰু সাংস্কৃতিক সমাৰোহ অনুষ্ঠিত হয়। সাংস্কৃতিক সমাৰোহ মুকলি কৰে বিশিষ্ট শিল্পী তথা আৰ জে বি কলেজৰ সহযোগী অধ্যাপক ড০ মল্লিকা কন্দলীয়ে। তাৰ পিছত নিশা শংকৰদেৱ সংঘৰ অধিৱেশনৰ হাতীখলা পথাৰৰ সমন্বয় ক্ষেত্ৰৰ নাটঘৰত বায়ন বিশাৰদ বেদনিধি বৰদলৈয়ে নাট উদ্বোধন কৰাৰ লগে লগে অংকীয়া নাট প্ৰদৰ্শন হয় আৰু শেষত পদাধিকাৰ ভৱেন্দ্ৰ নাথ ডেকাৰ সভাপতিত্বত প্ৰতিনিধি সভাকক্ষত প্ৰতিনিধি সভাৰে অধিৱেশনৰ দ্বিতীয় দিনাৰ কাৰ্যসূচী সামৰণি পৰে।

সংস্কৃতিৰ নগৰী তেজপুৰ শনিবাৰে পুৱাৰ পৰা বিভিন্ন জাতি-জনগোষ্ঠীৰ গীত-নৃত্য, অসমীয়া লোককলা, শিল্পকলা, ভাওনা শিল্প আদিৰে মুখৰিত হৈ পৰিল। চৌদিশে মাথোঁ শিল্পৰ সমাহাৰ। শিক্ষাৰ্থীৰ পাৰভঙা উছাহৰ মাজত বুৰ গ’ল সমগ্ৰ তেজপুৰ চহৰ।

উল্লেখ্য যে যোৱা ৭ ফেব্ৰুৱাৰীৰ পৰা অনুষ্ঠিত হোৱা তেজপুৰ মহাবিদ্যালয়ৰ মহাবিদ্যালয় সপ্তাহৰ অন্তিম দিনটোৰ পুৱাই মহাবিদ্যালয়ৰ পৰা গজৰাজক সন্মুখত লৈ আৰম্ভ কৰা মহাবিদ্যালয়খনৰ ২১ টা বিভাগৰ প্ৰায় দুই সহস্ৰাধিক শিক্ষাৰ্থীৰ বাৰেৰহনীয়া সাংস্কৃতিক শোভাযাত্ৰাৰে মুখৰিত হৈ পৰে সমগ্ৰ তেজপুৰ চহৰ।

তেজপুৰৰ বিধায়ক পৃথ্বিৰাজ ৰাভাই আনুষ্ঠানিক ভাৱে পতাকা জোকাৰি শুভাৰম্ভ কৰাৰ পূৰ্বে অধ্যক্ষ ড॰ জ্যোতিকমল হাজৰিকা আৰু উপাধ্যক্ষ ৰীতা শইকীয়া দত্তকে ধৰি একাংশ অধ্যাপক – অধ্যাপিকাৰ উপস্থিতিত মহাবিদ্যালয়খনৰ ছাত্ৰ একতা সভাৰ সাধাৰণ সম্পাদক আদিত্য ৰাণা কাশ্যপে বিধায়ক গৰাকীক ফুলাম গামোচা আৰু ফুলাম জাপিৰে আদৰণী জনোৱাৰ পিছত বিধায়ক গৰাকীয়ে তেজপুৰ মহাবিদ্যালয় ইতিমধ্যে ৰাজ্যখনৰ বৌদ্ধিক ক্ষেত্ৰত এখন পৰিচিত মহাবিদ্যালয় হিচাপে পৰিগণিত হৈছে বুলি মন্তব্য কৰি শোভাযাত্ৰাত প্ৰদৰ্শন কৰা বিষয় সমূহে সামগ্ৰিক ভাৱে বৃহত্তৰ অসমীয়া ভাষা, সাহিত্য আৰু সংস্কৃতিৰ সমান্তৰাল ভাৱে ইতিহাসকো প্ৰতিফলিত কৰিবলৈ সক্ষম হোৱাতো এক আশাব্যঞ্জক খবৰ বুলি মন্তব্য কৰে।

ইয়াৰ পিছতেই মহাবিদ্যালয় প্ৰাংগনৰ পৰা আনন্দ উল্লাসৰ মাজেৰে আৰম্ভ হয় বাৰেৰহনীয়া সাংস্কৃতিক শোভাযাত্ৰা।
উল্লেখ্য যে, তেজপুৰ চহৰৰ তিনি কিলোমিটাৰ পৰিভ্ৰমণ কৰা এই শোভাযাত্ৰাত ছাত্ৰী নিবাসৰ দলটিয়ে “ব্ৰক্ষ্মপুত্ৰ উপনৈ সমূহ” শীৰ্ষক বিষয়ত ফেষ্টুনত সকলো উপনৈৰ নাম লিখি অগ্ৰসৰ হোৱাৰ লগতে অসমীয়া বিভাগে “অসমীয়া সংস্কৃতি” শীৰ্ষক বিষয়ত অসমীয়া সংস্কৃতিৰ সকলো দিশ প্ৰতিফলিত কৰাৰ উপৰি উদ্ভিদ বিজ্ঞান বিভাগে “বিহু” শীৰ্ষক বিষয়, বাণিজ্য প্ৰশাসন বিভাগে “ৰাসলীলা” শীৰ্ষক বিষয়ত ৰাস ভাওনাৰ সামগ্ৰিক দৃশ্যাংশ, শিক্ষা তত্ত্ব বিভাগে “বুঢ়ী আইৰ সাধুৰে মুখৰিত সোণালী শৈশৱ” শীৰ্ষক বিষয়ত বুঢ়ী আইৰ সাধুত ব্যৱ্হৃত সকলো জতুৱা ঠাঁচ, ফকৰা যোজনা, পটন্তৰ প্ৰদৰ্শনৰ লগতে বাণিজ্য বিভাগে” অনৈক্যৰ মাজত ঐক্য” শীৰ্ষক বিষয়, ভূগোল বিজ্ঞান বিভাগে “অংকীয়া নাট” শীৰ্ষক বিষয়ত সকলো অংকীয়া নাটৰ দৃশ্য, দৰ্শন বিভাগে “দৌল উৎসৱ” শীৰ্ষক বিষয়ত হোলী গীতৰ সমাহাৰ, ৰাজনীতি বিজ্ঞান বিভাগে “বাৰ মাহৰ চানেকীৰে অসমীয়া জাতীয় জীৱন” শীৰ্ষক আকৰ্ষণীয় বিষয়, অৰ্থনীতি বিভাগে “বিভিন্ন যুগ” শীৰ্ষক বিষয়ত প্ৰত্যেক যুগৰ তাৎপৰ্য প্ৰদৰ্শন, ৰসায়ন, পদাৰ্থ বিজ্ঞান আৰু প্ৰাণী বিজ্ঞান বিভাগে” অসমৰ পৰম্পৰাগত কৃষি পদ্ধতি” শীৰ্ষক বিষয়ৰ উপৰি কলা আৰু সংগীত বিভাগ, নেপালী বিভাগ, বাংলা বিভাগ, হিন্দী বিভাগ, ইংৰাজী বিভাগকে ধৰি আটাইকেইটা বিভাগে প্ৰদৰ্শন কৰা অনুষ্ঠানে তেজপুৰীয়া ৰাইজক মুগ্ধ কৰি তোলে।

আনহাতে মহাবিদ্যালয় সপ্তাহৰ প্ৰতিযোগিতামূলক ভাৱে উলিওৱা এই শোভাযাত্ৰাৰ বাবে বিচাৰক হিচাপে উপস্থিত থাকে বিশিষ্ট নাট্যশিল্পী তথা অসম নাট্য সন্মিলনৰ কেন্দ্ৰীয় উপসভাপতি মৃগেন চন্দ্র বড়া, শোণিতপুৰ প্ৰেছ ক্লাব, তেজপুৰৰ সম্পাদক তথা বাণ থিয়েটাৰৰ কাৰ্যনিৰ্বাহক সদস্য পংকজ বৰুৱা আৰু বিশিষ্ট কলা নিৰ্দেশক কুলেন বৰা।শোভাযাত্ৰাৰ পিছতেই মহাবিদ্যালয়খনৰ প্ৰেক্ষাগৃহত মহাবিদ্যালয় শীৰ্ষ গীতেৰে আৰম্ভ হয় বঁটা বিতৰণী আৰু মহাবিদ্যালয় সপ্তাহৰ মূল সভা।

মহাবিদ্যালয়খনৰ অধ্যক্ষ ড॰ জ্যোতিকমল হাজৰিকাৰ পৌৰোহিত্যত এই মূল অনুষ্ঠানত মুখ্য অতিথি ৰূপে অংশ গ্ৰহণ কৰে তেজপুৰৰ লোকপ্ৰিয় গোপীনাথ বৰদলৈ আঞ্চলিক মানসিক স্বাস্হ্য প্ৰতিষ্ঠানৰ সঞ্চালক ডাঃ শৈলেন্দ্ৰ কুমাৰ দেউৰী।

আনহাতে মহাবিদ্যালয়খনৰ পৰিচালনা আৰু উন্নয়ন সমিতিৰ সভাপতি ড॰ স্বাধীনতা মহন্তই বিশিষ্ট অতিথি ৰূপে অংশ গ্ৰহণ কৰা এই মূল সভাতে মহাবিদ্যালয় সপ্তাহ উপলক্ষে অনুষ্ঠিত হোৱা সাহিত্য, সংস্কৃতি আৰু ক্ৰীড়া প্ৰতিযোগিতা সমূহৰ বিজয়ী প্ৰতিযোগীসকলক পুৰস্কাৰ প্ৰদান কৰাৰ লগতে সদ্যঘোষিত অসম প্ৰশাসনিক সেৱাৰ পৰীক্ষাত ১৮ নম্বৰ স্থানেৰে কৃতিত্বৰ পৰিচয় দিবলৈ সক্ষম হোৱা মহাবিদ্যালয়খনৰ প্ৰাক্তন ছাত্ৰী প্ৰয়াসী গৌতমক অধ্যক্ষ ড॰ জ্যোতিকমল হাজৰিকাই অভিনন্দন পত্ৰৰে অভিনন্দন জ্ঞাপন কৰে ।আনহাতে বিয়লিৰ পৰা সন্ধিয়ালৈকে অনুষ্ঠিত আকৰ্ষণীয় সাংস্কৃতিক অনুষ্ঠান।

আখৰ পঢ়িব নজনা লোকেও কাব্যিক পৰম্পৰাৰ বাবেই কীৰ্তন ভাগৱত সহজে পঢ়িব পাৰে। অসমীয়া সাহিত্যৰ সবাতোকৈ প্ৰয়োজনীয় আৰু প্ৰচলিত অলংকাৰটোৱেই হ’ল কবিতা- পুৰণিগুদাম কবি সন্মিলনৰ “চোতালে চোতালে কবিৰ মেল” শীৰ্ষক এটি অবিৰত কবিতা পাঠৰ অনুষ্ঠানত উপস্থিত থাকি চামগুৰি মহাবিদ্যালয়ৰ অধ্যক্ষ তথা বিশিষ্ট চিন্তাশীল লেখক ড° ইন্দ্ৰজিৎ বেজবৰুৱাই শনিবাৰে এইদৰে কয়।

পুৰণিগুদাম মাজগাঁৱৰ বিশিষ্ট সমাজকৰ্মী মুকিবুৰ ৰহমানৰ আতিথ্যত আয়োজিত এই কবিৰ মেলত কবিসকলে স্বদেশ আৰু স্বজাতিক জাগ্ৰত কৰা কবিতা পাঠ কৰি পৰিৱেশ জীপাল কৰি তোলে। কবি, সাহিত্য সংগঠক দুলাল বৰাই নৱকান্ত বৰুৱাৰ “কবিতা মানুহৰ ৰখীয়া হৈ থাকিব” বোলা এই কথাষাৰ দাঙি ধৰি ৰাছিয়া-ইউক্ৰেইনৰ যুদ্ধৰ বিৰোধিতাৰে স্বৰচিত কবিতা পাঠ কৰি ৰাছিয়া চৰকাৰৰ ৰোষত পৰা ৰাছিয়াৰ যুৱ কবি অৰ্তময় কৰমদিনে যুদ্ধবিৰোধী কবিতা পাঠ কৰাৰ অপৰাধত আদালতে সাত বছৰৰ কাৰাদণ্ডৰ বিধান দিয়া বাতৰিটোত বিশ্বৰ সচেতন মহলক আঘাত দিয়াৰ লগতে পুৰণিগুদাম কবি সন্মিলনকো আঘাত দিছে বুলি মন্তব্য কৰে।

চামগুৰি মহাবিদ্যালয়ৰ অধ্যাপক হিৰণ্য কুমাৰ শৰ্মাই আঁত ধৰা কবিৰ মেলত পুৰণিগুদাম কবি সন্মিলনৰ সভাপতি নবীন কলিতা, কাৰ্যকৰী সভাপতি প্ৰফুল্ল বৰা, সম্পাদক হেমন্ত কুমাৰ বৰা, কুমাৰ বিভূতি, বসন্ত কৌশিক ভাগৱতী, দ্বীপজ্যোতি বৰা, প্ৰদীপ কুমাৰ শইকীয়া, বিপুল মজিন্দাৰ, দ্বিজেন্দ্ৰ মোহন শইকীয়া, শেৱালী বৰা, বিনু হাজৰিকা, হাৰুনাৰ ৰচিদ, লক্ষেশ্বৰ শৰ্মা, নিজৰা বৰা, মোচ্চাছিক হুছেইন, বিচিত্ৰ নাৰায়ণ বৰা, আবু মনচুৰল হক, জগত চন্দ্ৰ বৈৰাগী, অসীম বৰা, খগেন গায়ন, অমিয়া বৰা, কবিতা দাস, জয়ন্তী বৰা, কাবেৰী মহন্ত, অনু কোঁৱৰ, কবীন পাটৰ, নাৰায়ণ দাসকে ধৰি প্ৰায় অৰ্ধ শতাধিক কবিয়ে অংশগ্ৰহণ কৰে।

অনুষ্ঠানত কবি, গায়িকা হেলেন পণ্ডিত, প্ৰফুল্ল বৰাই গীত পৰিৱেশন কৰি সকলোকে মোহিত কৰে। উল্লেখযোগ্য যে, এই কবিমেলতে বিশিষ্ট কবি লেখক লক্ষেশ্বৰ শৰ্মাৰ “অস্তিত্বৰ সময় – ২” শীৰ্ষক এখনি কাব্যগ্ৰন্থ উন্মোচিত হৈ যায়। উক্ত গ্ৰন্থখনি ড° ইন্দ্ৰজিৎ বেজবৰুৱাই উন্মোচন কৰে।