অসম আৰু অসমীয়া জাতীয় জীৱনৰ বাপুতী সাহোন ভোগালী বিহুৰ উৰুকাৰ নিশা সকলো ডেকা গাভৰু, পুৰুষ – মহিলা মিলি ভেলাঘৰত হাঁহে মাহে এসাঁজ তিপ্তিৰে খাই আনন্দ উপভোগ কৰাৰ পৰম্পৰা বিশ্ব জনবিদিত । সমগ্ৰ অসমৰ বিভিন্ন প্ৰান্তৰ লগতে নাজিৰাৰ এখন গাঁৱৰ ৰাইজৰ সাজিলে ভেলাঘৰ। নিশা অঞ্চলটোৰ তিনি শতাধিক ডেকা গাভৰু , পুৰুষ মহিলা মিলি এসাঁজ খাই ঢোলে ডগৰে বিহু মাৰি আনন্দ উপভোগৰ মাজেৰে পাৰ কৰি কাহিলি পুৱাতে বশিষ্ঠ গংগাৰ জলধাৰাত নিৰ্মিত ভেলাঘৰৰ লগতে মেজিত জুই লগাই সমাজৰ অসুয়া অমংগল নাশৰ বাবে প্ৰাৰ্থনা জনাই নেদেখা জনৰ ওপৰত । নদীৰ মাজত সজা ভেলাঘৰে দৃষ্টি কাঢ়িলে সকলোৰে।
জ্ঞানজ্যোতি গ্ৰন্থগাৰৰ পঞ্চম প্ৰতিষ্ঠা দিৱস “কিতাপৰ দিন” উদযাপন
মাজুলী তথা অসমৰ সমাজ জীৱনৰ এটা পৰিচিত অনুষ্ঠান জ্ঞানজ্যোতি গ্ৰন্থাগাৰৰ পঞ্চম প্ৰতিষ্ঠা দিৱস “কিতাপৰ দিন” জ্ঞানজ্যোতি গ্ৰন্থাগাৰৰ বাকৰিত অনুষ্ঠিত হৈছে। প্ৰথম দিনৰ কাৰ্যসূচী হিচাপে পুৱা ভাগত গ্ৰন্থাগাৰ প্ৰতিষ্ঠা কালৰ এজন ব্যক্তি টংকেশ্বৰ বৰুৱাক নিজ গৃহত সম্বৰ্ধনা জনোৱা হয়। তাৰ পিছতে পতকা উত্তোলন কৰে জ্ঞানজ্যোতি গ্ৰন্থাগাৰ পৰিচালনা সমিতিৰ সভাপতি ৰাজু বৰুৱা আৰু উদযাপন সমিতিৰ সভাপতি অনিল ফুকনে। গ্ৰন্থ অধ্যয়নক জনমুখী কৰাৰ উদ্দেশ্যে উলিওৱা শোভাযাত্ৰা উন্মোচন কৰে সমাজকৰ্মী তথা জ্ঞানজ্যোতিৰ উপদেষ্টা বীৰেন শইকীয়াই। স্থানীয় কেশৱৰাম বৰা উচ্চতৰ মাধ্যমিক বিদ্যালয়, মধ্যমাজুলী পাৰিজাত উচ্চতৰ মাধ্যমিক বিদ্যালয়, ৰূপবৰ্ণম চিত্ৰকলা বিদ্যালয়ৰ লগতে বহু অনুষ্ঠান প্ৰতিষ্ঠানে এই শৈক্ষিক শোভাযাত্ৰাত অংশগ্ৰহণ কৰে।
ইয়াৰ পিছতে বিমান দত্ত আৰু দীপাংকৰ দত্তৰ সম্পাদনাত প্ৰকাশ পোৱা জ্ঞানজ্যোতিৰ বাৰ্ষিক প্ৰাচীৰ পত্ৰিকা উন্মোচন কৰে শ্বহীদ পিয়লি ফুকন মহাবিদ্যালয়ৰ সহকাৰী অধ্যাপক ড° পাপু কুমাৰ ঙাটে। বিয়লি ভাগত সদৌ মাজুলী ভিত্তিত কুইজ আৰু বক্তৃতা প্ৰতিযোগিতা অনুষ্ঠিত হয়। যুৱ সাংবাদিক , জনপ্ৰিয় কবি তথা মাজুলী জিলা কবি সন্মিলনৰ সম্পাদক পাপু বৰাই উদ্বোধন কৰা প্ৰতিযোগিতা খনত মাজুলীৰ বিভিন্ন শৈক্ষিক অনুষ্ঠানৰ ছাত্ৰ-ছাত্ৰী সকলে অংশগ্ৰহণ কৰে। কিতাপৰ দিনত দ্বিতীয় দিনৰ কাৰ্যসূচীত চিত্ৰাংকণ প্ৰতিযোগিতা আৰু মুকুলি সভা অনুষ্ঠিত হব। মুকলি সভাত দুটা গুৰুত্বপূৰ্ণ বিষয়ৰ ওপৰত ডিব্ৰুগড় বিশ্ববিদ্যালয়ৰ ড° বিনোদ চন্দ্ৰ বৰা আৰু যোৰহাট মহাবিদ্যালয়ৰ ড° সৌমিত্ৰ পূজাৰীয়ে বক্তব্য প্ৰদান কৰিব বুলি কিতাপৰ দিন উদযাপন সমিতিৰ সম্পাদক দিপুমণি শইকীয়াই জানিবলৈ দিছে।
হাতীমূৰীয়া মিচিং গাওঁত হেঁপাহৰ ভোগালী আৰু ৰঙে-ৰসে এদিন উৎসৱ
নদীদ্বীপ জিলা মাজুলীৰ শ্ৰীৰাম পঞ্চায়তৰ অন্তৰ্গত হাতীমূৰীয়া মিচিং গাওঁত দ্বিভাষিক তিনিমহীয়া আলোচনী দৃৰবৃ বন্ধন অসমৰ উদ্যোগত আৰু হাতীমূৰীয়া মিচিং গাঁৱৰ যুৱক সঙ্ঘৰ সহযোগত এইবাৰ ভোগৰ উৎসৱ ভোগালীক এক ব্যতিক্ৰম অনুষ্ঠানেৰে আদৰাৰ লক্ষ্যেৰে হেঁপাহৰ ভোগালী আৰু ৰঙে-ৰসে এদিন শীৰ্ষক এখনি ব্যতিক্ৰম অনুষ্ঠান যোৱা ইংৰাজী ১৩ জানুৱাৰী ২০২২ তাৰিখে অৰ্থাৎ উৰুকাৰ ৰাতিত আয়োজন কৰে। দৃৰবৃ বন্ধন আলোচনীৰ সম্পাদক ভাস্কৰজ্যোতি কুটুমে আঁতধৰা অনুষ্ঠানটি সঞ্চালনা কৰে কবি জয়ন্ত হাজৰিকা । মাজুলীৰ কৃৰ্তী শিক্ষক অতুল চন্দ্ৰ বৰাৰ এটি সুন্দৰ কবিতাৰে শুভাৰম্ভ কৰা অনুষ্ঠানত গাঁৱৰ প্ৰথমজনা চৰকাৰী চাকৰিয়াল ভোলাৰাম নৰহ আৰু জেষ্ঠ সমাজ সংগঠক দেৱেন কামানক দৃৰবৃ বন্ধন আৰু হাতীমূৰীয়া গাঁৱৰ যুৱক সঙ্ঘৰ সহযোগত এখনি প্ৰশংসা পত্ৰেৰে সম্বৰ্ধনা জনায়। উক্ত অনুষ্ঠানটিত মূখ্যঅতিথি ৰূপে উপস্থিত থাকে অসমৰ জনপ্ৰিয় দৈনিক বাতৰি কাকত দৈনন্দিন বাৰ্তাৰ কাৰ্যবাহী সম্পাদক তথা কবি ডিম্পুল চুতীয়াই মাজুলীৰ এটা ভিতৰুৱা অঞ্চল হাতীমূৰীয়া গাওঁত এনে এক ব্যতিক্ৰম অনুষ্ঠান দেখি আপ্লুত হোৱাৰ কথা ব্যক্ত কৰে। লগতে ভৱিষ্যৎ দিনত এনেদৰে মিলাপ্ৰীৰ্তি আৰু সমন্বয়ৰ বান্ধোনেৰে অসমীয়া ভাষা সাহিত্যক সংস্কৃতিক জীয়াই ৰাখিবলৈ হাতীমূৰীয়া গাওঁখনলৈ অনুৰোধ জনায়। চুতীয়াই তেখেতৰ স্ব-ৰচিত তুমি কোন শীৰ্ষক কবিতা পাঠেৰে সকলোকে আপ্লুত কৰে। অনুষ্ঠানত উপস্থিত থাকি ঢকুৱাখনাৰ নিউজ লাইভৰ সাংবাদিক তথা বিশিষ্ট কবি ৰাজীৱ বৰুৱাই কবিতা পাঠ কৰাৰ উপৰিও গীত পৰিবেশন কৰি এক সুন্দৰ পৰিৱেশৰ সৃষ্টি কৰে। মাজুলী জিলা কবি সন্মিলনৰ সম্পাদক তথা জনপ্ৰিয় কবি পাপু বৰাই অনুষ্ঠানত উপস্থিত থাকি মিচিং ভাষাত অইনিতম কলি আৰু স্ব-ৰচিত কবিতা পাঠ কৰি অনুষ্ঠানত উপস্থিত সকলোকে আপ্লুত কৰে। তদুপৰি বিশিষ্ট গল্পকাৰ তথা কৃৰ্তী শিক্ষক মৃণালী দেৱী ডাঙৰীয়ানীয়ে মাজুলীৰ মিচিং অধ্যোহিত হাতীমূৰীয়া মিচিং গাওঁত এনেধৰনৰ অনুষ্ঠান দেখি অভিভুত হোৱাৰ কথা ব্যক্ত কৰাৰ উপৰিও স্বৰচিত কবিতাৰে উপস্থিত সকলোকে উৎসাহিত কৰে। উক্ত অনুষ্ঠানত জেংৰাইমূখ আঞ্চলিক লেখিকা সমাৰোহ সমিতিৰ সভাপতি কবিতা মৰাং পেগু উপস্থিত থাকি অইনিতম আৰু কবিতা পাঠ কৰাৰ সমান্তৰালকৈ জেংৰাইমূখৰ নিৱাসী, কবি তথা দৃৰবৃ বন্ধনৰ সদস্যা শুভ্ৰা দলে বাইদেৱেই মিচিং ভাষা আৰু অসমীয়া ভাষাৰ কবিতা পাঠ কৰি সকলোকে উৎসাহিত কৰাৰ উপৰিও বহুমুলীয়া ভাষণ প্ৰদান কৰে। অনুষ্ঠানটি সুচাৰুভাৱে সঞ্চালনাৰ দায়িত্ব থাকি কবি জয়ন্ত হাজৰিকাই এটি কবিতাৰে অনুষ্ঠানত উপস্থিত আল্লাহদিত হোৱাৰ কথা ভালদৰে বৰ্ণনা কৰে। উক্ত অনুষ্ঠানত মাজুলীৰ যুৱনেতা তথা উদীয়মান কবি অঞ্জন শইকীয়া, ৱাৰ্ড সদস্য কুশল কামান, গাওঁ ৰক্ষীক বাহিনীৰ হৈ মৰুটজ্যোতি কুটুম, প্ৰবীন নৰহ, কমল কামান, চন্দ্ৰকমল নৰহ, ধৰ্মেশ্বৰ নৰহ,প্ৰদীপ নৰহ, চুমি কুটুম,বৃষ্টিৰেখা নৰহ, ৰূণজুন নৰহৰ লগতে গাঁৱৰ সকলো বিশিষ্ট ব্যক্তি আৰু বুঢ়া- মেথা উপস্থিত থাকে।
মাজুলীত চাং ঘৰত মাঘৰ মালিতা
মাজুলীৰ অগ্ৰণী ক’লা সাহিত্যৰ, সংস্কৃতি মূলক অনুষ্ঠান ত্ৰিহৃদয় গোষ্ঠীৰ উদ্যোগত আজি পুৱা ১০ বজাৰ পৰা ওপৰ সোনোৱাল গাঁৱৰ নিবাসী কবি-চিত্ৰশিল্পী শ্যামন্ত পায়েংৰ চাং ঘৰত গীত আৰু কবিতাৰ এক মনোৰম অনুষ্ঠান সম্পন্ন হয়। দৈনন্দিন বাৰ্তা কাকতখনৰ কাৰ্যবাহী সম্পাদক দিম্পল চুতীয়াই মুখ্য অতিথিৰূপে উপস্থিত থকা অনুষ্ঠানটিৰ সঞ্চালনা কৰে মাজুলী জিলা কবি সন্মিলনৰ সম্পাদক, কবি-সাংবাদিক পাপু বৰাই।অনুষ্ঠানটি সঞ্চালনা কৰি অসমৰ জনপ্ৰিয় কবি পাপু বৰাই কয়, কবিতা হৃদয়ৰ স্বপ্নিল অনুভৱ lকবিতাই মানুহৰ জীৱনৰ কথা কয় l
উদিয়মান কবি তথা কণ্ঠশিল্পী ত্ৰিপুৰাজ দলেৰ আধুনিক গীতেৰে শুভাৰম্ভ হোৱা অনুষ্ঠানটিৰ উদ্দেশ্য ব্যাখ্যা কৰে ত্ৰিহৃদয় গোষ্ঠীৰ সহযোগি সম্পাদক শ্যামন্ত পায়েঙে। অনুষ্ঠানটিত ঢকুৱাখনাৰ বিশিষ্ট কবি -সাংবাদিক ৰাজীৱ বৰুৱা, দিম্পল চুতীয়া, পাপু বৰা, লক্ষীপ্ৰসাদ ৰেগন, উপেন চিন্তে, শ্যামন্ত পায়েং, ত্ৰিপুৰাজ দলে, গৌতম শইকীয়া, দিব্যজ্যোতি পায়েং, প্ৰশান্ত পেগু আদিয়ে কবিতা পাত আৰু গীত পৰিৱেশন কৰে।
মুখ্যমন্ত্ৰীলৈ আহ্বান,অন্তত: খাই জীয়াই থাকিবলৈ ৰেচনকাৰ্ড,নিশাটো শুবলৈ এটা গৃহৰ প্ৰয়োজন
চৰকাৰে পঞ্চায়ত ব্যৱহাৰ জৰিয়তে গ্ৰামাঞ্চলৰ দুখীয়া দৰিদ্ৰ লোক সকলৰ জীৱনধাৰণত সহায়ক তথা সকাহ দিয়াৰ উদ্দেশ্যে বছৰি ৰাজকোষৰ কোটি কোটি টকা পঞ্চায়ত সমূহলৈ আৱন্টন দি আহিছে। কিন্তু আশ্বৰ্যজনক ভাবে পঞ্চায়তৰ এচাম কৰ্মচাৰী আৰু প্ৰতিনিধিৰ অনিয়ম অনীতিৰ বাবে বছৰ বছৰ ধৰি সমাজৰ অৱহেলিত দুখীয়া দৰিদ্ৰ, বুভুক্ষু সকল দুৰ্ভাগ্যজনক ভাবে বঞ্চিত হৈ আহিছে।ইয়াৰ উদাহৰণ হিচাপে দৰঙৰ ছিপাঝাৰৰ উন্নয়ন খণ্ডৰ চেঙেলীয়াঝাৰ গাঁও পঞ্চায়তৰ কৰাকে ক’ব পাৰি। য’ত একাংশ দুখীয়া দৰিদ্ৰলোকই ঘৰ ঘৰ , চাউল চাউল বুলি কান্দি থাকিবলগীয়া হৈছে। অভিযোগ অনুসৰি দুৰ্নীতি অনিয়মৰ ৰম্যপুৰীলৈ গতি কৰিব লোৱা পঞ্চায়ত খনৰ নাওপোটা – দুৰদুৰীয়াত বঞ্চিত হৈ আছে একাংশ ডাল দুখীয়া দৰিদ্ৰ।যি সকলক পঞ্চায়তৰ কৰ্মচাৰী-প্ৰতিনিধিয়ে দেখা নোপোৱাৰ অভিযোগ উত্থাপন হৈছে।
নাওপোটাৰ উপেন ডেকা নামৰ লোক গৰাকীয়ে দিনত ভিক্ষা মাগিব নগলে আখলত নজ্বলে জুই।পত্নীৰ অসুখত সাধাৰণ বড়ী এটা কিনি দিব নোৱাৰি হাহাকাৰ কৰি ফুৰা এই গৰাকী বুভুক্ষুৰ নাই ৰেচনকাৰ্ড।থাকিবলৈ নাই এটা ভাল ঘৰ।দুখজনক কথা যে ভোগালী বিহুত ওচৰ চুবুৰীয়া সকলে মাছে- মঙহে এসাঁজ ভালকৈ খোৱাৰ সময়ত উপেন ডেকাই মাছ মাংসৰ কথা বাদেই ভিক্ষামাগি অনা চাউলেৰে কৰা চুঙা পিঠা খাবলৈয়ো যোগাৰ কৰিব নোৱাৰিলে অলপ গাখীৰ।যাৰ বাবে ৰঙা চাহেৰেই চুঙাপিঠা খাই পালন কৰিলে ভোগালীৰ ভোগ।খাবলৈ নাই পানী।আনৰ ঘৰৰ পৰা পানী আনি আজিও সেৱন কৰি আছে।দুৰ্ভাগ্য জনক কথা যে পঞ্চায়তত কৰ্মচাৰীয়ে গৃহ নোপোৱা লোক সকলৰ ঘৰ চাৰ্ভে কৰা সময়ত উপেন ডেকাৰ গৃহ দেখা নোপোৱাৰ বিষয়টোৱে ৰাইজক আশ্বৰ্যম্বিত কৰি তুলিছে। গৰিহণা যোগ্য যে গাঁও খনত পূৰ্বতে চৰকাৰী গৃহ থকা লোকৰো তালিকাত নাম অহাৰ পিছত উপেন ডেকাৰ গৃহ কিয় চাৰ্ভে নহ’ল ই এক ডাঙৰ প্ৰশ্ন ৰাইজৰ বাবে।আনহাতে নিকটৱৰ্তী মধু ডেকাৰো নাই থাকিবলৈ এটা ভাল ঘৰ,পাবলৈ সৌভাগ্য নহ’ল ৰেচনকাৰ্ড।
যি গৰাকী লোকৰ চাবন,তেল কিনিবলৈ সমৰ্থ নহয়, জৰাজীৰ্ণ ফুটাটিনৰ এঢলীয়া চালিত তলত বাসকৰা এই গৰাকী বুভুক্ষুৰ ভোগালী বিহুত যোগাৰ কৰা নহ’ল খাদ্য সম্ভাৰ।এক যন্ত্ৰণাময় জীৱন অতিবাহিত কৰা এই সকল দৰিদ্ৰ বুভুক্ষুৰ কথা কিয় বাৰু এবাৰকৈ পঞ্চায়ত প্ৰতিনিধি, কৰ্মচাৰীয়ে চিন্তা কৰাৰ আহৰি নাপায় ! তেওঁলোকৰ চকুত উপেন- মধু মানুহ নহয় নেকি ? পঞ্চায়তখনৰ সচেতন লোক সকলে মুখ্যমন্ত্ৰীৰ জৰুৰী দৃষ্টি কামনা কৰি উপেন-মধুক মানৱীয়তাৰ স্বাৰ্থত শীঘ্ৰে চৰকাৰী গৃহ, ৰেচনকাৰ্ডৰ ব্যৱস্থা গ্ৰহন কৰিবলৈ অনুৰোধ জনাইছে। পঞ্চায়তখনত উপেন-মধুৰ দৰে বহু দৰিদ্ৰলোক চৰকাৰী আঁচনিৰ পৰা আজিও বঞ্চিত হৈ থকাৰ অভিযোগ উত্থাপন হৈছে।সচেতন লোক সকলে সচিব ৰমেশ বেজবৰুৱাক প্ৰতিনিধিৰ মুখৰ কথাত কাম নকৰিবলৈয়ো আহ্বান জনাই জবকাৰ্ডত হৈ থকা ব্যাপক অনিয়মৰ ওপৰত ব্যৱস্থা গ্ৰহন কৰিছিল দাবী জনাইছে ।ইফালে পঞ্চায়তখনত এনৰেগাত তয়ো খা, মোকো দি নীতি চলি থকাৰ অভিযোগ উত্থাপন হৈছে।
ওদালগুৰি জিলা মাধ্যমিক শিক্ষক আৰু কৰ্মচাৰী সন্থাৰ দ্বিবার্ষিক অধিবেশন
ওদালগুৰি জিলা মাধ্যমিক শিক্ষক আৰু কৰ্মচাৰী সন্থাৰ চতুৰ্দশ দ্বিবাৰ্ষিক অধিবেশন অহা ১৮ জানুৱাৰী তাৰিখে এদিনীয়া কাৰ্যসূচীৰে অম্বাগাওঁ বডো উচ্চতৰ মাধ্যমিক বিদ্যালয়ত অনুষ্ঠিত কৰাৰ বাবে যোজা চলোৱা হৈছে। এই অধিবেশনখনি সুচাৰুকৈ অনুষ্ঠিত কৰিবলৈ অম্বাগাওঁ বডো উচ্চতৰ মাধ্যমিক বিদ্যালয়ৰ অধ্যক্ষা ৰঞ্জীতা দৈমাৰীক সভাপতি, ৰবিনছন বসুমতাৰীক কাৰ্যকাৰী সভাপতি, প্ৰসেনজিত দৈমাৰীক সম্পাদক হিচাপে লৈ এখনি অভ্যৰ্থনা সমিতিও গঠন কৰা হৈছে। শিক্ষক আৰু কৰ্মচাৰীৰ এই অধিবেশনত বিটিআৰৰ উপ মূখ্য কাৰ্যবাহী সদস্য গোবিন্দ চন্দ্ৰ বসুমতাৰী মূখ্য অতিথি, ওদালগুৰি জিলাৰ বিদ্যালয়সমূহৰ পৰিদৰ্শক জয়পাল সিং ব্ৰহ্ম বিশিষ্ট অতিথি আৰু ওদালগুৰি জিলা অধিবিদ্যা পৰিষদৰ সম্পাদক গায়ত্ৰী ভট্টৰাই, ওদালগুৰি জিলা কৰ্মচাৰী পৰিষদৰ সভাপতি শান্তিৰাম শৰ্মা, হৰিশিঙা উচ্চতৰ মাধ্যমিক বিদ্যালয়ৰ অধ্যক্ষা স্বৰ্ণ বসুমতাৰী, কবিৰালী উচ্চতৰ মাধ্যমিক বিদ্যালয়ৰ অধ্যক্ষা সমজ্ৰী নাৰ্জাৰী, বডিগাওঁ উচ্চতৰ মাধ্যমিক বিদ্যালয়ৰ অধ্যক্ষ ৰাজীব বসুমতাৰী, অম্বাগাওঁ হাইস্কুলৰ প্ৰধান শিক্ষক ভূবন শৰ্মা আৰু বেংবাৰী হাইস্কুলৰ প্ৰধান শিক্ষক নোমল দৈমাৰী আমন্ত্ৰিত অতিথি ৰূপে অংশগ্ৰহণ কৰিব বুলি জানিব পৰা গৈছে।
অনুষ্ঠানৰ কাৰ্যসুচী অনুসৰি ৰাতিপুৱা ওদালগুৰি জিলা মাধ্যমিক শিক্ষক আৰু কৰ্মচাৰী সন্থাৰ পতাকা উত্তোলন কৰিব সভাপতি ভবেন চন্দ্ৰ ডেকাই। ছহিদ সকলৰ সোঁৱৰণিত স্মৃতি তৰ্পণ কৰিব অম্বাগাওঁ বডো উচ্চতৰ মাধ্য়মিক বিদ্যালয় শিক্ষক গোটৰ সম্পাদক কাতিৰাম বৰোয়ে। শিক্ষকসকলৰ প্ৰতিনিধি সভা মূকলি কৰিব অম্বাগাওঁ বডো উচ্চতৰ মাধ্যমিক বিদ্যালয়ৰ অধ্যক্ষা ৰঞ্জীতা দৈমাৰীয়ে আৰু মূকলি সভা উদ্বোধন কৰিব ৰাজ্যিক সদস্য কৃষ্ণকান্ত মিজাৰে। অধিবেশনত উপস্থিত থাকি শিক্ষা আৰু শিক্ষকসকলৰ সমস্যাসমূহৰ বিষয়ে আলোচনা আগবঢাবলৈ জিলাখনৰ মাধ্যমিক বিদ্যালয়সমূহলৈ সম্পাদক বৈদ্যনাথ উপাধ্যায়ে আহ্বান জনাইছে।
ঐতিহ্যমণ্ডিত আউনি আটীয় সত্ৰত চুৰি, দুটাকৈ দানপাত্ৰ ভাঙি চোৰে লৈ গ’ল প্ৰণামিৰ ধন
উত্তৰ গুৱাহাটী স্থিত ঐতিহাসিক আউনি আটীয় সত্ৰত ৰোৱা নিশা চোৰ প্ৰবেশ কৰি সত্ৰৰ দুটাকৈ দান পাত্ৰ ভাঙি সত্ৰৰ প্ৰনামিৰ ধন লুটি লৈ যায়। সত্ৰৰ দেউৰীয়ে নামঘৰৰ নিত্য নৈমিত্তিক কাম সমাপন কৰিবলৈ আহি প্ৰথমে প্ৰত্যক্ষ কৰে তলা ভঙা দানপাত্ৰ দুটা ।তাৰপাছতে হুৱাদুৱা লাগে সত্ৰখনৰ ভকত বৈষ্ণৱৰ মাজত । পিছত সকলোৱে প্ৰত্যক্ষ কৰে যে সত্ৰৰ দান পাত্ৰ দুটাৰ তাৰা ভাঙি তাত থকা সমুদায় প্ৰণামিৰ ধন চোৰে লুটপাত কৰি লৈ যায়। ইতিমধ্যে উত্তৰ গুৱাহাটী আৰক্ষী থানাৰ আৰক্ষীয়ে ঘটনাস্থলিলৈ গৈ জোৰ তদন্ত আৰম্ভ কৰিছে। সত্ৰৰ মণিকূটৰ কাষৰ এখন দুৱাৰেৰে চোৰ প্ৰবেশ কৰাৰ সন্দেহ কৰা হৈছে।
সত্ৰৰ দৰে পবিত্ৰ অনুষ্ঠান এটাত চোৰে এইদৰে লুটপাত চলোৱা কাৰ্য্যত মৰ্মাহত হৈ পৰিছে সত্ৰৰ সত্ৰাধিকাৰ ডঃ পিতামহৰ দেৱ গোস্বামী । চোৰৰ এই কাৰ্য্যত গভীৰ উদ্বেগ প্ৰকাশ কৰিছে সত্ৰাধিকাৰ গৰাকীয়ে আৰু এই চুৰি ঘটনাৰ জোৰ তদন্ত কৰি চোৰক ধৰা পেলাই দৃষ্টান্ত মূলক শাস্তিৰ পোষকতা কৰিছে তেওঁ। অঞ্চলটোৰ সচেতন মহলেও এই পবিত্ৰ অনুষ্ঠানৰ চুৰি কাৰ্য্যৰ গৰিহণা দিয়াৰ লগতে চোৰক যিকোনো উপায়ে ধৰা পেলায় কঠোৰ শাস্তি দিবলৈ প্ৰশাসনক আহ্বান জনাইছে।
আমিনগাঁৱত খাদ্য সামগ্ৰী গুৰি কৰা মেচিন বিতৰণ ৰিণিকি ভূঞা শৰ্মাৰ
আজি ভোগালীৰ উৎসাহ উদ্দীপনাৰ মাজতে বিহু উপলক্ষে জালুকবাৰী সমষ্টিৰ ১০ টা মহিলা আত্মসহায়ক মণ্ডল গোটলৈ ১০ টা উন্নত মানৰ খাদ্য সামগ্ৰী গুৰি কৰিব পৰা মেচিন বিতৰণ কৰিলে প্ৰাইড ইষ্ট এন্টাৰটেইনমেন্ট প্ৰাইভেট লিমিটেড ( Pride East entertainment private Ltd) নামৰ প্ৰতিষ্ঠানটোৰ মূখ্য পৰিচালন সঞ্চালিকা ৰিনিকি ভূঞা শৰ্মাই ।এই মেচিনত চাউল , হালধি ,জালুক- জিৰা , ধনীয়া ,জলকীয়াকে ধৰি বিভিন্ন ধৰণৰ খাদ্য সামগ্ৰী কম সময় আৰু কম খৰছত গুৰি কৰিব পৰা যাব ।অসম উদ্যান শস্য আৰু খাদ্য সংশোধন বিভাগৰ উদ্যোগত আয়োজিত এই মেচিন বিতৰণ কৰি ৰিণিকি ভূঞা শৰ্মাই কয় যে এই মেচিনৰ দ্বাৰা জালুকবাৰী সমষ্টিৰ বেজেৰা আৰু শুৱালকুছিৰ মহিলা আত্মসহায়ক মণ্ডলৰ প্ৰায় ১৬ পৰা ২০ হাজাৰ মহিলা উপকৃত হ’ৱ ।
বিনামূলীয়াকৈ বিতৰণ কৰা প্ৰতিটো মেচিনৰ মূল্য প্ৰায় ৫৫ হাজাৰ টকা । এই মেচিনৰ জৰিয়তে মহিলা গোটৰ মহিলা সকলে অৰ্থনৈতিক ভাবে স্বাবলম্বী হ’ব পাৰিব বুলিও শ্ৰীমতী ভূঞা শৰ্মাই উল্লেখ কৰে।
উক্ত মেচিন বিতৰণী অনুষ্ঠানত অসম উদ্যান শস্য আৰু খাদ্য সংশোধন বিভাগৰ সঞ্চালক ত্ৰিলিংগা ভাৰত বৰা, কামৰূপ জিলাৰ মহকুমা কৃষি বিষয়া লক্ষী দত্ত আৰু ভাৰতীয় জনতা পাৰ্টীৰ কিষান মৰ্চাৰ অসম ৰাজ্যিক সমিতিৰ উপ সভাপতি ৰঞ্জিত ভট্টাচাৰ্য্যও উপস্থিত থাকে।
কাকপথাৰ স্বগৃহত উপস্থিত আলফা (স্বা)ৰ শীৰ্ষ নেতা জীৱন মৰাণ
১৯৮৪ চনত মনত স্বাধীন অসমৰ সপোন লৈ সংযুক্ত মূক্তি বাহিনী অসমত যোগদান কৰা তিনিচুকীয়া জিলাৰ কাকপথাৰ ওৱন গাঁৱৰ যুৱক জন আজি স্বগৃহলৈ উভতি আহিল ৷ পৰেশ বৰুৱাৰ অতিকৈ ঘনিষ্ঠ, আলফা স্বাধীনৰ জ্যেষ্ঠ নেতা, বিত্ত সচিব তথা প্ৰাক্তন মেজৰ জেনেৰেল জীৱন মৰাণ ওৰফে গুণত ডাঙৰীয়া আজি নিজৰ উপজা ওৱন গাঁৱত । আজি সুদীৰ্ঘ ৩৮ টা বছৰে সশস্ত্ৰ সংগ্রামৰ অৱসান ঘটাই তিনিচুকীয়া জিলাৰ কাকপথাৰৰ উৱন গাঁওস্থিত স্বগৃহত আহি উপস্থিত হয়। বিগত বৰ্ষতে স্বাস্থ্যজনীত কাৰণত তথা ম্যানমাৰত চলি থকা সামৰিক অভ্যুত্থানৰ জটিলতাৰ ফলত চিকিৎসা কৰিব নোৱাৰাৰ বাবে শিবিৰ ত্যাগ কৰি চিকিৎসাৰ বাবে ঘূৰি অহা বুলি সংবাদ মাধ্যমৰ আগত জানিবলৈ দিয়ে । আলফা (স্বা) পৰা অব্যাহতি লোৱাৰ পিছতেই কেইবামাহ ধৰি তেওঁ কাৰাগাৰত থাকিব লগীয়া হয় । মংগলবাৰে কাৰাগাৰৰ পৰা মুকলি আকাশৰ তললৈ আহি পোনে পোনে তিনিচুকীয়াৰ ৰূপাইস্থিত বাসগৃহলৈ আহি নিশা তাতে কটাই বুধবাৰে পুৱা কাকপথাৰ উৱন গাঁওস্থিত আপোন ঘৰখনত উপস্থিত হয় ৷
সূদীৰ্ঘ ৩৮ বছৰৰ পাছত নিজ গাঁও খনত উপস্থিত হোৱা জ্যেষ্ঠ আলফা নেতা গৰাকীক আদৰণিৰ লগতে গামোছাৰে সম্বৰ্দ্ধনা জনায় বিভিন্ন জনে ৷ এক দীৰ্ঘ বিৰতিৰ পিছত ঘৰৰ ল’ৰা ঘৰলৈ উভতি অহাত উৱন গাঁৱৰ ৰাইজক আৱেগিক হৈ পৰা দেখা যায় ৷ আলফা-চৰকাৰৰ শান্তি আলোচনাৰ পোষকতা কৰা আলফা নেতাজনে ৩৮ বছৰীয়া সংগ্ৰামৰ বিষয়টো আতৰাই চলি আগন্তুক সময়ত স্পষ্ট কৰাৰো ইংগিত দিয়ে। লগতে অনাগত সময়ত নিজকে সামাজিক কাম-কাজত মনোনিবেশ কৰাব বুলিও মন্তব্য আগবঢ়ায়।
বৰপেটাত বৃহৎ পৰিমানৰ চুলাই জব্দ
ভোগালী বিহুৰ প্ৰাকক্ষনত বৰপেটা আবকাৰী বিভাগৰ অভিযানত বৃহৎ পৰিমানৰ চুলাই সহ দুজনক আটক কৰিবলৈ সক্ষম হয়। এক গোপনসুত্ৰৰ পমখেদি বৰপেটা আবকাৰী বিভাগে AS15 AC 0833 নম্বৰৰ এখন টেম্পোৰে নগাওৰ পৰা জনীয়ালৈ লৈ যোৱা অৱস্থাত বৰপেটাৰ যতিগাওত চুলাইখিনি জব্দ কৰে ৷এই অভিযানত প্ৰায় ৩ শ লিটাৰ চুলাইসহ দিলীপ মণ্ডল আৰু ছফি দাসক আটক কৰাৰ লগতে টেম্পোখনো জব্দ কৰিবলৈ সক্ষম হয় আবকাৰী বিভাগে।চুলাই সৰবৰাহ সংক্ৰান্তত আবকাৰী বিভাগে এটা গোচৰ ৰুজু কৰি দিলীপ মণ্ডল আৰু ছফি দাসক ন্যায়ালয়ত হাজিৰ কৰোৱা হব বুলি আবকাৰী বিষয়া প্ৰশান্ত পাঠকে জানিবলৈ দিয়ে ৷
