হোজাই জিলাৰ চৌধুৰী বজাৰত আজি হোজাই বন বিভাগে অবৈধ কাঠফলা মিলৰ বিৰুদ্ধে তীব্ৰ অভিযান চলায়৷ অভিযানত ৩ নং চামৰালিৰ ঈদগাহৰ ওচৰৰ পৰা এটা অবৈধ কাঠফলা মিল জব্দ কৰে বন বিভাগে৷ হোজাই বন সংমণ্ডল প্ৰাধিকাৰী গুণদ্বীপ দাসৰ নিৰ্দেশত হোজাই বন সুৰক্ষা বিষয়া মহেশ নাথৰ নেতৃত্বত বন বিভাগৰ এটা দলে অভিযান চলাই জব্দ কৰে মিলটো৷ঘটনা সংক্ৰান্তত বন বিভাগৰ লোকে কাকো আটক কৰিব পৰা নাই যদিও তদন্ত চলাই আছে বন বিভাগে৷

উল্লেখ্য যে হোজাইৰ বিভিন্ন প্ৰান্তত দীৰ্ঘদিনৰ পৰা চলি আহিছিল কেবাটাও অবৈধ কাঠফলা মিল৷ শেহতীয়াকৈ এনে অবৈধ কাঠফলা মিলৰ বিৰুদ্ধে বন বিভাগে তীব্ৰ অভিযান আৰম্ভ কৰিছে৷দুদিন পূৰ্বেও মোৰাঝাৰৰ ৰহমত নগৰৰ পৰা এটা অবৈধ কাঠফলা মিল বন বিভাগে জব্দ কৰাৰ পিছত আজি চামৰালিত অভিযান চলাই পুনৰ আন এটা অবৈধ কাঠফলা মিল জব্দ কৰে বন বিভাগে৷বন বিভাগে এই চক্ৰটোৰ বিৰুদ্ধে তীব্ৰ অভিযান চলালেও পুনৰ চক্ৰটোৱে ভিতৰুৱা দুৰ্গম অঞ্চলত এনেদৰে কাঠফলা মিল বহুৱাই চোৰাং কাঠৰ ৰমৰমীয়া ব্যৱসায় চলাই আহিছে৷

কামৰূপ জিলাৰ বকো সমষ্টিৰ অন্তৰ্গত নগৰবেৰাৰ টুপামাৰীত পানীৰ দৰত জলকীয়া বিক্ৰী কৰিব লগীয়া হোৱাত জলকীয়া খেতিয়কৰ মাজত হাহাকাৰ পৰিস্থিতিৰ সৃষ্টি হৈছে। মূৰৰ ঘাম মাটিত পেলাই কৃষকে উৎপাদন কৰা জলকীয়াৰ উপযুক্ত বজাৰ মূল্য নাপাই এতিয়া লোকচানৰ সন্মুখীন হব লগা হৈছে বৃহত্তৰ টুপামাৰী অঞ্চলৰ হাজাৰ হাজাৰ দৰিদ্ৰ কৃষক ৰাইজ। ৰাজ্যৰ ভিতৰত অন্যতম সৰ্ববৃহৎ জলকীয়া বজাৰ কামৰূপ জিলাৰ নগৰবেৰাৰ টুপামাৰী জলকীয়া বজাৰ। পিছে বজাৰ খনলৈ সম্প্ৰতি নামিছে অশনি সংকেত, দুখীয়া কৃষকে পথাৰৰ জলকীয়া বজাৰত উলিয়াই বেচিব লগা হৈছে প্ৰতি কেজি’ত দহ-বাৰ টকা দামত।

বেংকৰ পৰা ঋণ লৈ অইনৰ মাটি লিজত লৈ বৃহত্তৰ টুপামাৰী অঞ্চলৰ একাংশ কৃষকে জলকীয়া খেতি কৰিছিল যদিও আশা কৰা মতে লাভৱান হব নোৱাৰাত মূৰে কপালে হাত দি বহি থাকিব লগা হৈছে শ শ কৃষকে। প্ৰতি বছৰে টুপামাৰী বজাৰৰ পৰাই ৰাজ্যৰ ভিন্ন প্ৰান্তৰ লগতে বহিঃৰাজ্যলৈও সৰবৰাহ হয় বৃহৎ পৰিমাণৰ কেচাঁ জলকীয়া, তেনেস্থলত বজাৰ খনৰ এই বিপৰ্যয় কিছু দিনলৈ অব্যাহত ৰ’লে ৰাজ্যৰ কৃষি অৰ্থনীতিত মোক্ষম আঘাত পৰাৰ সম্ভাৱনাই অধিক। জলকীয়া এটা ন্যায্য মূল্য নিৰ্ধাৰণ আৰু বজাৰ খনত শীঘ্ৰে জলকীয়া সংৰক্ষণৰ বাবে শীতল গৃহ স্থাপনৰ দাবী জনাইছে দুখীয়া কৃষকে।

ইংৰাজী নৱবৰ্ষৰ শুভক্ষণত দীৰ্ঘদিন ধৰি  ওৰাং চাৰিআলিৰ ৰাজহুৱা চাফাই  কৰ্মী শোভা_দাস_ভদ্ৰ নামৰ দৰিদ্ৰ সীমাৰেখাৰ তলত অতি কষ্টেৰে জীৱন নিৰ্বাহ কৰি অহা মহিলাৰ  ঘৰত উপস্থিত হৈ  মঙ্গলদৈ লোকসভা সমষ্টিৰ সাংসদ দিলীপ শইকীয়াৰ ন’মিনি তথা মাজবাটৰ বিজেপি যুৱ নেতা কিশোৰ শৰ্মা আৰু  মাজবাট বিজেপি দলীয় কাৰ্য্যকৰ্তা ক্ৰমে মান্না দে কে আদি কৰি বহু বিজেপি দলীয় কাৰ্য্যকৰ্তা  সকলে এখনি ফুলাম গামোচাৰ নৱবৰ্ষৰ শুভেচ্ছা জ্ঞাপন কৰে । 

উল্লেখযোগ্য যে ওৰাং অঞ্চলৰ সকলোৰে পৰিচিত শোভা দাস নামৰ এই মহিলা গৰাকীয়ে  প্ৰায়ে ১৫ বছৰ ধৰি ওৰাং অঞ্চলক  বিনামূলীয়াকে স্বচ্ছ কৰি ৰখাৰ দৰে মহান কামত দৈনিক জড়িত হৈ আছে যাৰ ফলত সমগ্ৰ ওৰাং অঞ্চলত প্ৰষ্টিকৰ লগতে নানান ধৰণৰ অলাগতিয়াল সামগ্ৰী বুটলি সমগ্ৰ ওৰাং অঞ্চলক প্লাষ্টিক মুক্ত পৰিবেশ গড় দিয়াৰ অন্যতম ভূমিকা গ্ৰহণ কৰি অহা পৰিলক্ষিত হৈছে ।  শোভাৰ এই পদক্ষেপে বৃহত্তৰ ওৰাং অঞ্চলৰ সকলো ৰাইজক প্ৰদূষণ মুক্ত কৰাৰ লগতে সু- স্বাস্থ্যৰ পৰিবেশ গঢ়ি তোলাত যথেষ্ট অৰিহনা যোগাই আহিছে ।

দেশৰ প্ৰধানমন্ত্ৰীয়ে  স্বয়ং স্বচ্ছতাৰ প্ৰতি অধিক গুৰুত্ব প্ৰদান কৰাৰ সমান্তৰালকৈ বিজেপি কাৰ্য্যকৰ্তা সকলেও স্বচ্ছ ভাৰতৰ প্ৰতি অধিক গুৰুত্ব দিয়াৰ সময়ত অদৃশ্য ভাবে  ওৰাংৰ এই গৰাকী  শোভা_দাস নামৰ মহিলা জনীয়ে  নিজৰ অঞ্চল স্বচ্ছ কৰি ৰখাত যি মুখ্য ভূমিকা গ্ৰহণ কৰি আহিছে তাক যুৱ নেতা কিশোৰ শৰ্মায়ে শলাগিছে  ৷ আৰু আজি শুভ নৱবৰ্ষৰ শুভক্ষণত তাইৰ ঘৰত উপস্থিত হৈ  বিজেপি দলীয় কাৰ্য্যকর্তা সকলে নৱবৰ্ষৰ শুভেচ্ছা দিয়াৰ লগতে তেওঁৰ উজ্জ্বল ভৱিষ্যত কামনা কৰিছে ।

যি সময়ত ৰাজ্যত বন ধ্বংসই প্ৰকৃতিপ্ৰেমী সকলক উদ্বিগ্ন কৰি তুলিছে সেই সময়তে উজনিত গেলেকীত গঢ় লৈ উঠা এখন মানৱসৃষ্ট অৰণ্যই দৃষ্টি কাঢ়িছে সকলোৰে। শিৱসাগৰ জিলাৰ নাজিৰা মহকুমাৰ অসম – নাগালেণ্ড সীমান্তত বশিষ্ঠ গংগা ক্ষাত দিখৌ নৈৰ কুলু কুলু সুৰৰ প্ৰৱাহমান জলধাৰা নৈসৰ্গিক শোভাৰে নগা পাহাৰৰ নামনি অংশত অৱস্থিত এক অৰণ্যম ক্ষেত্ৰ। ২০০১ বৰ্ষতে গেলেকীৰ এজন প্ৰকৃতিপ্ৰেমী নিৰন গগৈৰ প্ৰচেষ্টাত সীমান্তৱৰ্তী অঞ্চলটোত আৰম্ভ হৈছিল এক বন বিপ্লৱ। প্ৰায় ২০ হেক্টৰ মাটিত চোমনিবাৰী স্থাপনেৰে আৰম্ভ হৈছিল কমলাবাৰী অৰণ্যম ক্ষেত্ৰ স্থাপনৰ প্ৰাৰম্ভিক কাম। উদ্যমী নিৰন গগৈৰ লগ লাগিছিল স্থানীয় বহুকেইজন যুৱক। প্ৰকৃতিপ্ৰেমী যুৱককেইজনৰ এই প্ৰচেষ্টাত সহযোগিতা আগবঢ়াইছিল সেই সময়ৰ শিৱসাগৰ জিলাৰ উপায়ুক্ত ৰবি কোটা। লাহে লাহে সম্প্ৰসাৰিত হৈছিল কমলাবাৰী অৰণ্যম ক্ষেত্ৰৰ পৰিসৰ। সম্প্ৰতি প্ৰায় ৩০০০ বিঘা ভূখণ্ড সামৰি উজনি অসমৰ এক বৃহৎ মানৱসৃষ্ট অৰণ্যম ক্ষেত্ৰত পৰিণত হৈছে কমলাবাৰী।

গাৰোপবন বন সুৰক্ষা সমিতি নামৰ এক পৰিচালনা সমিতিৰ তত্বাৱধানত কমলাবাৰীত এতিয়া ১৫০ হেক্টৰ ভূখণ্ডত বাঁহগছ, ৩০ হেক্টৰ ভূখণ্ডত ঔ টেঙাৰ বাগিছা, ৫০ হেক্টৰ ভূখণ্ডত প্ৰায় ১৪০০০ জোপা পৈণত তিতাচপা, ৩ হেক্টৰ ভূখণ্ড সামৰি প্ৰায় ৮০০০ জোপা চেগুন গছ জাতিস্কাৰ হৈ উঠিছে। ইয়াৰোপৰি ৫ হেক্টৰ ভূখণ্ডত স্থাপিত হোৱা ফল মূলৰ বাগিছাই পৰ্যটকক আকৰ্ষিত কৰি আহিছে। শেহতীয়াকৈ কমলাবাৰী অৰণ্যম ক্ষেত্ৰত সংযোগ ঘটিছে ‘সাহিত্য মনিষী উপবন’ নামেৰে এক জৈৱ বৈচিত্ৰ উদ্যানৰ। প্ৰায় আঢ়ৈ হেক্টৰ ভূমিত গঢ়ি তোলা এই ঔষধি গছৰ সমাহাৰ ঘটা উদ্যানখন পৰ্যটকৰ আকৰ্ষণৰ কেন্দ্ৰবিন্দু হৈ উঠিছে। বিভিন্ন বিদ্যালয় মহাবিদ্যালয়ৰ শিক্ষাৰ্থীৰ ক্ষেত্ৰ অধ্যয়নৰ সমল হিচাপে পৰিগণিত হৈ পৰা এই ঔষধি উদ্ভিদৰ উদ্যানখনত প্ৰায় সহস্ৰাধিক বিভিন্ন ঔষধি গুণ সম্পন্ন উদ্ভিদৰ সমাহাৰ দেখা পোৱা যায়। ইয়াৰোপৰি প্ৰায় বিলুপ্ত প্ৰায় উদ্ভিদসমূহ যেনে মেজাংকৰি, মাধৈমালতী, বৰ্হমথুৰি ইত্যাদি কমলাবাৰীত পৰ্যাপ্ত পৰিমাণে পোৱাৰ লগতে পৃথিৱীৰ আটাইতকৈ ব্যয়বহুল কাঠ মেহগণি গছৰো সমাহাৰ দেখা পোৱা যায়। দিখৌ নৈৰ নৈসৰ্গিক শোভাৰ লগতে কাষতে সগৌৰৱেৰে থিয় দি থকা নগা পাহাৰৰ প্ৰাকৃতিক শোভাই সদায় কমলাবাৰী প্ৰতি আকৰ্ষিত কৰি আহিছে পৰ্যটক সকলক। সম্প্ৰতি উজনি অসমৰ অন্যতম জনপ্ৰিয় বনভোজ স্থলীত পৰিগণিত হৈছে জৈৱ বৈচিত্ৰৰে ভৰপূৰ কমলাবাৰী অৰণ্যম ক্ষেত্ৰ। নতুন বছৰত নিজৰ মনৰ ভাৱ প্ৰকাশ কৰি কমলাবাৰীৰ গুৰি ধৰোঁতা তথা বন বন্ধু নিৰন গগৈয়ে দৈনিক অগ্ৰদূতক কয় যে সম্প্ৰতি বিশ্বজুৰি আলোচ্য বিষয় হৈ পৰা গোলকীয় উঞ্চতাৰ অস্বাভাৱিক পৰিৱৰ্তনৰ অন্যতম বা প্ৰধান কাৰণ বন ধ্বংস। তেনেস্থলত বনানীকৰণৰ জড়িয়তে বিশ্বৰ ভৌগোলিক উত্তৰণৰ বেলিকা কিঞ্চিত হলেও বৰঙণি আহবঢ়োৱা  সকলোৰে সামাজিক দ্বায়িত্ব।

নতুন বছৰত সকলোৱে সংকল্প লোৱা উচিত যাতে বনানীকৰণৰ জড়িয়তে পৃথিৱী খন সেউজ কৰি ৰাখিব পাৰি। ইফালে সীমান্তৰ অতন্ত্ৰ প্ৰহৰী হিচাপেও পৰিগণিত হৈ আহিছে কমলাবাৰী অৰণ্যম ক্ষেত্ৰ। গেলেকী সংৰক্ষিত বনাঞ্চলৰ প্ৰায় ৬০০০ হেক্টৰ ভূখণ্ড ইতিমধ্যে চুবুৰীয়া ৰাজ্য নগাৰ দখললৈ যোৱাৰ সময়তে সংৰক্ষিত বনাঞ্চল খনৰ অৱশিষ্ট অংশত স্থাপিত কমলাবাৰী অৰণ্যম ক্ষেত্ৰই অসমৰ ভূখণ্ডক সুৰক্ষা দি আহিছে  চুবুৰীয়া ৰাজ্যখনৰ আগ্ৰাসনৰ পৰা। সত্তৰ দশকৰ পৰাই গেলেকী সংৰক্ষিত বনাঞ্চলত শেনচকু নগাৰ। ধাৰাবাহিক ভাৱে অসমৰ দিশে সীমা সম্প্ৰসাৰিত কৰি অহা আগ্ৰাসী নগাবাহিনীও যেন থমকি ৰৈছে কমলাবাৰী স্থাপনৰ পাছতে। দেশী – বিদেশী পৰ্যটকেৰ বিচৰণৰে  সদা ব্যস্ত হৈ উঠা কমলাবাৰী এতিয়া অসমৰ পৰ্যটনৰ মানচিত্ৰত এক উল্লেখযোগ্য স্থান হৈ পৰিছে।ৰাজ্যৰ পৰ্যটন উন্নয়ন নিগমৰ দৰে এটা গুৰুত্বপূৰ্ণ বিভাগ আছে যদিও   জৈৱ বৈচিত্ৰৰে ভৰপূৰ অসম বিশ্বৰ পৰ্যটন মানচিত্ৰত এতিয়াও জিলিকি উঠা নাই। চৰকাৰী ভাৱেই বন ধ্বংসৰ বাতৰিয়ে বৰ্তমান সংবাদ শিৰোনামা দখল কৰাৰ সময়তে গেলেকীত বন বন্ধু নিৰন গগৈৰ সবল নেতৃত্বত চলা এই সেউজ বিপ্লৱ এক অনন্য হিচাপে পৰিগণিত হৈছে। অনাগত সময়ত চৰকাৰী কৰ্তৃপক্ষৰ সহযোগত কমলাবাৰী অৰণ্যম ক্ষেত্ৰক দেশৰ ভিতৰতে এক বৃহৎ জৈৱ বৈচিত্ৰৰ উদ্যান হিচাপে গঢ়ি তোলাৰ আশা পুহি ৰখা গাৰোপবন বন সুৰক্ষা সমিতিয়ে শেহতীয়া ভাৱে স্থাপন কৰা ঔষধি বাগিছাৰ উদ্যানখনে অনাগত সময়ত আয়ুৰ্বেদ চিকিৎসা শাস্ত্ৰৰ ঔষধ প্ৰস্তুতৰ বহু কেঁচা সামগ্ৰী উপলব্ধ কৰাৰ সম্ভাৱনীয়তা নুই কৰিব নোৱাৰি।