অ’মিক্ৰণৰ পিছত এইবাৰ IHU! সমগ্ৰ বিশ্বতে অ’মিক্ৰণ ইতিমধ্যে এক গুৰুত্বপূৰ্ণ চিন্তাৰ বিষয় হৈ পৰাৰ সমসাময়িকভাৱে পুনৰ ভূমুকি মাৰিছে ক’ভিদৰ আন এটা প্ৰজাতিয়ে।

ফ্ৰান্সৰ বিজ্ঞানীসকলে ক’ভিদৰ এই নতুন প্ৰজাতিটো চিনাক্ত কৰিছে। ইতিমধ্যে এই নতুন প্ৰজাতিটোক IHU নামেৰে নামাঙ্কন কৰা হৈছে।

গৱেষকসকলৰ মতে IHU ত ৪৬ টা পৰিৱৰ্তন থাকে। এইফালৰ পৰা IHU ৰ পৰিৱৰ্তনৰ হাৰ অ’মিক্ৰনতকৈও অধিক। নতুন প্ৰজাতিটোক অধিক সংক্ৰামক বুলিও কোৱা হৈছে।

প্ৰতিবেদন অনুসৰি মাৰ্চেইলৰ ওচৰত এতিয়ালৈকে ১২ টা IHU সম্বন্ধীয় ঘটনা দেখা গৈছে। আফ্ৰিকান দেশ কেমেৰুন ভ্ৰমণকাৰী ব্যক্তি এজনৰ শৰীৰত প্ৰথম এই প্ৰজাতিটোৰ উপস্থিতি ধৰা পৰে বুলি জানিব পৰা গৈছে।

ঠেঙাল-কছাৰী সকলৰ সামগ্ৰীক উন্নয়নৰ বাবে গঠন কৰা ঠেঙাল স্বায়ত্তশাসিত পৰিষদৰ পৰিষদীয় নিৰ্বাচনত ২১ নং ৰূপহী-গড়পৰা পৰিষদীয় সমষ্টিৰ পৰা বিজেপিৰ দলীয় প্ৰাৰ্থী ৰাজু শইকীয়া বিনা প্ৰতদন্দিতাৰে জয়ী হৈছে ৷ ইয়াৰ বিপৰীতে কংগ্ৰেছ দলৰ দুৰ্দশা অব্যাহত আছে ৷ উল্লেখ্য যে, ঠেঙাল-কছাৰী স্বায়ত্তশাসিত পৰিষদৰ মুঠ ২২ টা পৰিষদীয় সমষ্টিৰ ২০ জানুৱাৰীত ভোটদান হ’ব ৷ ইয়াৰে ২১ নং ৰূপহী গড়পৰা পৰিষদীয় সমষ্টিত ভোটদানৰ পূৰ্বে বিৰোধী দলসমূহে বিজেপিৰ ওচৰত আত্মসমৰ্পণ কৰাটো চৰম লজ্জাৰ বিষয় হিচাপে পৰিগণিত হৈছে। সমষ্টিটোৰ পৰা কংগ্ৰেছ দলৰ পৰা মৃদুপৱন বড়াই প্ৰাৰ্থিত্ব লাভ কৰি মনোনয়ন দাখিল কৰিছিল ৷ আৰু বিজেপিৰ দলীয় প্ৰাৰ্থীগৰাকীৰ তেঁওৱে আছিল একমাত্ৰ প্ৰতিদন্দি ৷ কিন্তু ৰহস্যজনকভাৱে মনোনয়ন প্ৰত্যাহাৰৰ অন্তিম দিনা মৃদুপৱন বড়াই প্ৰাৰ্থিত্ব প্ৰত্যাহাৰ কৰাত বিজেপিৰ দলীয় প্ৰাৰ্থী ৰাজু শইকীয়াক ধেমাজি জিলা নিৰ্বাচনী বিষয়াই বিজয়ী বুলি ঘোষণা কৰে ৷ দলীয় প্ৰাৰ্থীগৰাকী বিনা প্ৰতিদন্দিতাৰে বিজয়ী হোৱাত বিজেপিৰ দলীয়-কৰ্মকৰ্তাসকল উৎফুলিত হৈ পৰিছে ৷ বিজেপি দলৰ গোগামুখ মণ্ডলৰ সভাপতি ৰমেন দেউৰী, সম্পাদকদ্বয় দুলেন পেগু আৰু মদন চেত্ৰীয়ে দলীয় প্ৰাৰ্থী ৰাজু শইকীয়াক অভিনন্দন জনোৱাৰ লগতে নিকাভাৱে কাম-কাজ আগুৱাই নিবলৈ আহ্বান জনাইছে ৷ ৰূপহী গড়পৰা পৰিষদীয় সমষ্টিটোৰ পৰা পূৰ্বেও ৰাজু শইকীয়া বিজয়ী হৈছিল ৷

ওৰাঙৰ সমীপৰ  আমতল ভেৰগাঁৱৰ ঐতিহাসিক শ্রী শ্ৰী মহামুনি মন্দিৰ প্ৰাংগনত  ৩জানুৱাৰীত সদৌ অসম গোৰ্খা ছাত্ৰ সন্থাৰ  পাচনৈ আঞ্চলিক সমিতিৰ পুৰনা সমিতিক ভংগ কৰি নতুন পূৰ্ণাঙ্গ সমিতি এখনৰ গঠন কৰা হয়। নিৰ্বাচন প্ৰক্ৰিয়াৰ সহায়ত তিলক বজগাইদেবক সভাপতি আৰু ওম প্ৰকাশ অধিকাৰীক সাধাৰন সম্পাদক হিচাবে নিৰ্বাচিত কৰা হয়। উল্লেখযোগ্য যে উক্ত সভাখনত শোণিতপুৰ জিলা গোৰ্খা ছাত্ৰ সন্থাৰ সাধাৰন সম্পাদক কিৰন খৰ্কা,সহকাৰী  সম্পাদক ৰজত ভৰদ্বাজ,সাংগঠনিক সম্পাদক নাৰায়ন খৰ্কা, বৰচলা আৰু ঠেলামৰা আঞ্চলিকৰ বিষয় ববীয়াৰ লগতে পাচনৈ আঞ্চলিকৰ প্ৰাক্তন বিষয় ববীয়া নেত্ৰ কটেল, প্ৰনব জ্যোতি চুবেদি, যুৱৰাজ ছেত্ৰী আৰু শিবু অধিকাৰিও উপস্থিত আছিল। শিবু অধিকাৰিয়ে আঁত ধৰা উক্ত সভাত জিলা পদাধিকাৰী সকলৰ লগতে প্ৰাক্তন গোৰ্খা ছাত্ৰ সন্থাৰ বহু কেইজন কৰ্মীক একোখনকৈ খদায়ে সম্বৰ্ধনা জনোৱা হয়। অনুষ্ঠানৰ আৰম্ভণিতে নেত্ৰ কটেলে স্ব ৰচিত গীত এটি গাই সকলোকে মুগ্ধ কৰে। শোণিতপুৰ জিলা গোৰ্খা ছাত্ৰ সন্থাৰ সাধাৰন সম্পাদক কিৰন খৰ্কাৰ লগতে উপস্থিত বহু ছাত্ৰ নেতাই সভাত বক্তব্য ৰাখে।

২জানুৱাৰীত ওদালগুৰিৰ বিশিষ্ট সাহিত্যিক বিদ্যাপতি দাহালৰ এখন গ্ৰন্থ তেওঁৰ নিজ বাসভৱন ওদালগুৰিৰ খাংখ্লাবাৰী স্থিত নতুন বছৰ উপলক্ষত উন্মোচন কৰা হয়। বিশিষ্ট সাহিত্যিক তাৰাপতি উপাধ্যায়ে বিদ্যাপতি দাহালৰ কাব্যগ্ৰন্থ “শ্ৰীভট্টদেৱমহাকাব্যম্” উন্মোচন কৰি দাহালৰ অন্যান্য গ্ৰন্থ সমুহৰ অৱদান উল্লেখ কৰে। উল্লেখযোগ্য যে বিশিষ্ট সংস্কৃত পণ্ডিত তথা ওদালগুৰিৰ সাংবেদ সংস্কৃত টোলৰ প্ৰাক্তন অধ্যক্ষ বিদ্যাপতি দাহালৰ    কাব্যগ্ৰন্থ সমুহ বৰ্তমান কুৰিৰ ঘৰ অতিক্ৰম কৰিছে। তেওঁৰ  কৃতি সমুহ পঞ্চবিংশতি তত্ববিবেচনম্, সাহিত্য বিমৰ্শ, ‘কাম্য’ খণ্ডকাব্যম্,’আমা’খণ্ডকাব্যম্’, ‘পাশ্চাত্য সমালোচনা সিদ্ধান্ত’, পাশ্চাত্য সমালোচনা আৰু প্ৰমুখবাদ, বিবেকানন্দপ্ৰশস্তি,উষাহৰণ মহাকাব্যাম্, তত্বচিন্তনম্, শ্ৰীমদ্ভাগৱতমহত্বম্, ভগৱচ্চৰিতামৃতম্( খণ্ড কাব্যম্), সৃষ্টিনব্যমহাকাব্যম্, ভাৰতীয় নেপালী সাহিত্যকো বিকাশ, শংকৰদেৱমহাকাব্যম্, ভানুভক্তমহাকাব্যম্, শ্ৰীদেৱদামোদৰদেৱমহাকাব্যম্, শ্ৰীমাধৱদেৱমহাকাব্যম্, স্বামীবিবেকানন্দমহাকাব্যম্, শ্ৰীহৰিদেৱমহাকাব্যম্ আৰু ভট্টদেৱমহাকাব্যমকে ধৰি অন্যান্য অসংখ্য গ্ৰন্থ প্ৰকাশিত হোৱাৰ লগতে এঘাৰটা পুৰস্কাৰেৰে সন্মানিতো হৈছে। তেওঁ ব্যাকৰণ-বেদান্ত-সাহিত্য শাস্ত্ৰী, সাংখ্যয়োগাচাৰ্য্যত স্নাকোত্তৰ ডিগ্ৰি অৰ্জন কৰিছিল। ২০২২ৰ শুভ নতুন বছৰত তেৱেঁ প্ৰকাশিত কৰা শ্ৰীভট্টদেৱমহাকাব্যম্ ৰাইজক উৎসৰ্গা কৰাৰ লগতে অন্য চাৰিটা গ্ৰন্থ ক্ৰমে শ্ৰীশংকৰদেৱচৰিতামৃতং নব্যমহাকাব্যম্, সংস্কৃত সাহিত্যইতিহাস, গুৰুকালিচৰণব্ৰহ্মমমহাকাব্যম্ আৰু মহাত্মাগান্ধীমহাকাব্যম্ প্ৰেছত প্ৰকাশন্মুখ অৱস্থাত আছে।

প্ৰায় নব্বৈ বছৰ বয়সতো শুধা চকুৰে কলম চলোৱা বিদ্যাপতি দাহালৰ গ্ৰন্থ সমুহ বিভিন্ন বিশ্ববিদ্যালয়ত বিষয় পাঠ হিচাপে ছাত্ৰ-ছাত্ৰী সকলে অধ্যয়ন কৰি আছে। নতুন বছৰত উন্মোচন হোৱা গ্ৰন্থৰ উন্মোচনী সভাত বড়ো ভাষাৰ অন্যতম লিখক নবীন মল্ল বড়ো, ওদালগুৰি উচ্চতৰ মাধ্যমিক বিদ্যালয়ৰ অধ্যক্ষ পুস্পধৰ বাচ্তোলা, ওদালগুৰিৰ মণিপ্ৰকাশ কিতাপ ঘৰৰ স্বত্বাধিকাৰী তথা বিশিষ্ট নাগৰিক নৰেশ্বৰ ডেকা, অসম নেপালী সাহিত্য সভা ওদালগুৰি জিলা সমিতিৰ সভাপতি লক্ষ্মণ অধিকাৰী,সম্পাদক মোহন কুমাৰ ছেত্ৰী, অসম সাহিত্য সভা ওদালগুৰি জিলা সমিতিৰ প্ৰাক্তন সভাপতি দেৱৰাজ সাপকোটাৰ লগতে অন্যান্য বিশিষ্ট ব্যক্তিসকল উপস্থিত থাকে। নেপালী সাহিত্য সভা ওদালগুৰি শাখা সমিতিৰ সভানেত্ৰী ইন্দিৰা গৌতমে সভাপতিত্ব কৰা সভাৰ উদ্দেশ্যে ব্যাখ্যা কৰে সম্পাদক ধিৰাজ উপাধ্যায়ে। সভাত বিভিন্ন সাহিত্যিক সকলে কবিতা পাঠো কৰে।