যি সময়ত ৰাজ্যৰ শিক্ষিত নিবনুৱা যুৱক যুৱতী সকলে কেৱল মাত্ৰ চৰকাৰী সংস্থাপনৰ আশাত বছৰ বছৰ ধৰি অপেক্ষা কৰি দিন কটাবলগীয়া হৈছে ঠিক তেনে সময়তে তৰুণ প্ৰজন্মৰ একাংশ শিক্ষিত যুৱক যুৱতীয়ে কৃষি বিজ্ঞান কেন্দ্ৰক সহযোগী হিচাপে লৈ নিবনুৱা সমস্যাৰ সমাধানৰ বাবে কৃষি কৰ্মৰ জৰিয়তে প্ৰথম প্ৰচেষ্টাতেই সফলতা লাভ কৰিবলৈ সক্ষম হৈছে।

উল্লেখযোগ্য যে বিভিন্ন ঠাইত বছৰ বছৰ ধৰি ব্ৰহ্মপুত্ৰ বালি চাপৰি সমূহ এনেই পৰি থকালৈ লক্ষ্য কৰি এইবাৰ শোণিতপুৰ জিলাৰ বৰছলা সমষ্টি অন্তৰ্গত ন বিলত ব্ৰহ্মপুত্ৰৰ বালি চৰত কেইবাজনো শিক্ষিত যুৱকেৰে গঠিত জোনাক আত্ম সহায়ক গোটে তেজপুৰ নপাম স্থিত কৃষি বিজ্ঞান কেন্দ্ৰৰ সৈতে যোগাযোগ কৰি প্ৰায় ডেৰশ বিঘা বালি চৰত কৃষি বিজ্ঞান কেন্দ্ৰ তৰফৰ পৰা যোগান ধৰা উন্নত মানদণ্ডৰ মাটি মাহ আৰু মগু মাহ খেতি কৰিছিল।

যুৱক সকলক কৃষি বিজ্ঞান কেন্দ্ৰ তৰফৰ পৰা পৰীক্ষা মূলক ভাৱে যোগান দিয়া উন্নত জাতৰ মাটি আৰু মগু মাহৰ  খেতি কৰি সফলতা পাৱলৈ সক্ষম হৈছে।২৬ নবেম্বৰত তেজপুৰ নপামস্থিত কৃষি বিজ্ঞান কেন্দ্ৰ তৰফৰ পৰা এই খেতি পৰিদৰ্শন কৰিবলৈ অহা কেন্দ্ৰটোৰ শস্য ৰক্ষা বিশেষজ্ঞা সংযুক্তা শইকীয়াই উপস্থিত হৈ কৃষি বিজ্ঞান কেন্দ্ৰৰ পৰা যোগান ধৰা বীজৰ উৎপাদন সম্পৰ্কে কৃষক সকলৰ পৰা বুজ লয়।ইফালে একেটা মাটিত কি দৰে অধিক উৎপাদন কৰিব পাৰি বা মাটিৰ গুণাগুন সম্পৰ্কে কৃষক সকল কেনেদৰে গম পাব সেই সম্পৰ্কে মত বিনিময় কৰে ভূমি বিজ্ঞানী বিষয়া নমিতা দত্তই । কৃষি বিজ্ঞান কেন্দ্ৰৰ দলটোৰ সৈতে সহ প্ৰকল্প বিষয়া পলাশ ঠেঙাল আৰু এপাৰ্টৰ বিষয়া পদ্ম দলেও উপস্থিত থাকি জোনাক আত্ম সহায় গোটৰ জৰিয়তে ব্ৰহ্মপুত্ৰৰ বিশাল বালিচৰত কৃষক সকলে পৰিশ্ৰমৰ জৰিয়তে কৃষি বিজ্ঞানৰ তৰফৰ পৰা লাভ কৰা বীজ সমূহৰ সঠিক ব্যৱহাৰ কৰি যি উৎপাদন কৰিলে ইয়াৰ দ্বাৰা আন কৃষক সকলেও উপকৃত হব বুলি উল্লেখ কৰে।

গুৰুত্বপূৰ্ণ কথা যে যি সময়ত কৃষি বিভাগ তৰফৰ পৰা যোগান ধৰা বীজৰ খেতি কৰি প্ৰায়ে কৃষক সকল ঠগ খাব লগা হয় তেনে সময়তে  তেজপুৰ নপাম কৃষি বিজ্ঞান কেন্দ্ৰ তৰফৰ পৰা উন্নত জাতৰ বীজ লাভ কৰি অধিক উৎপাদন কৰিৱলৈ সক্ষম হৈছে কৃষক গোটটিয়ে।প্ৰথম বাৰৰ বাবে কৃষি কাৰ্যৰ সৈতে জড়িত হৈ মগু আৰু মাটি মাহৰ খেতি কৰা কৃষক গোটটোৱে প্ৰায় ১০০ কুইন্টলতকৈ অধিক মাটিমাহ লাভ কৰিব বুলি কৃষি বিজ্ঞান কেন্দ্ৰৰ দলটোৰ আগত প্ৰকাশ কৰে।  

শেহতীয়াকৈ এই গোটটোকেই পুনৰ উন্নত জাতৰ মটৰ আৰু মচুৰ দাইলৰ বীজ খেতি কৰিবলৈ  যোগান ধৰিছে কৃষি বিজ্ঞান কেন্দ্ৰৰ তৰফৰ পৰা।তেজপুৰ জিলা কৰ্মচাৰী পৰিষদৰ সভাপতি তথা শিক্ষক তৰুণ চন্দ্ৰ নাথ,স্থানীয় কৃষক ৰঞ্জিত নাথ,জয়ন্ত নাথ,নিৰেন কুৰ্মীৰ বিশেষ প্ৰচেষ্টাৰ জৰিয়তে জিলা খনৰ কেইবাগৰাকী শিক্ষিত যুৱকৰ দ্বাৰাই যোগাত্মক দৃষ্টিভংগীৰে কৃষি কৰ্মত আত্মনিয়োগ কৰা এই সকল কৃষকৰ কৃষি কৰ্মই অঞ্চলটোত কৃষি কৰ্মৰ প্ৰতি বহুতকে আকৰ্ষিত কৰিছে ।

স্বাধীনতাৰ পৰশত সঙ্গীত চৰ্চ্চা সঞ্জীৱনীৰ  সঞ্চাৰ হৈছিল । সেই দিনৰ পৰা আজিলৈ অনুৰাগ থকা  ডেকা গাভৰু চামৰ উপৰিও ল’ৰা ছোৱালী বিলাকৰ মনো বৈজ্ঞানিক পদ্ধতি যোগে সংগীত  বিদ্যা আহৰণ কৰিবৰ কাৰণে  আগ্ৰহি হোৱা দেখা যায় । উপভোগ  কৰি ক্ষন্তেকৰ কাৰণে হ’লেও পাহৰি যায় জীৱন নিৰ্বাহৰ  বেথা ।  ই  দেশ তথা ৰাজ্যখনৰ বাবে বৰ শুভ লক্ষণ ।

সেয়ে  বিটিআৰৰ ওদালগুৰি জিলাৰ  ৰৌতা আঞ্চলিক কোচ ৰাজবংশী ছাত্ৰ সন্থা আৰু ৰৌতা আঞ্চলিক কোচ ৰাজবংশী সন্মিলনীৰ উদ্যোগত ৰৌতা চাৰিআলিৰ সমীপৱৰ্তী ৰৌতা বাগান শ্ৰী শ্ৰী লক্ষ্মী মণ্ডপৰ খেল পথাৰত ৭ দিনীয়াকৈ  অনুষ্ঠিত হোৱা কোচ ৰাজবংশীসকলৰ লোকনৃত্য কৰ্মশালা প্ৰদৰ্শন ২৭  নৱেম্বৰৰ নিশা ১০ বজাত সামৰণি পৰে । ৰৌতা অঞ্চলটোৰ ৰৌতাবাগান , ৰৌতাষ্টেচন , ৮ নম্বৰ ধনশ্ৰী, বজ্ৰঝাৰ , বালিসিহা , বালিসিহা হাবি, ঝাৰগাও,সিধাখোৱা ,মৰাধনশ্ৰী আৰু মাধৱগোহাই আদিকেধৰি কেইবাখনো গাঁৱৰ  প্ৰায় পাঁচশ  কিশোৰী আৰু যুৱতীক কলা সংস্কৃতিৰ প্ৰশিক্ষণ দিয়া হয় ।

কোচ ৰাজবংশী সকলৰ সংস্কৃতিৰ ভিতৰত বিশেষ ভাৱে গুৰুত্ব দি  কিশোৰী আৰু যুৱতীসকলক  ঢোল, দোতৰা ,ঝুমকা ,চাৰিন্দা আৰু বাঁহী আদি বাদ্য বজায়  গীত পৰিৱেশনেৰে  নৃত্যৰ  মাজেৰে সুন্দৰ পৰিৱেশৰ মাজত  প্ৰশিক্ষণ আগবঢ়ায় । প্ৰতিদিনে   দিনৰ ১ বজাৰ পৰা নিশা  ৯  বজালৈকে অনুষ্ঠিত হোৱা এই  লোকনৃত্যৰ প্ৰশিক্ষণ আগবঢ়ায় কোকৰাঝাৰৰ দিলীপ ৰায়, কোচবিহাৰৰ দয়াময় বৰ্মন আৰু ধুবুৰীৰ নিতেশ চন্দ্ৰ ৰায়ে । আঞ্চলিক ভিত্তিত  চলা গোৱালিনি ,কুষান , কাৰ্তিকা আৰু হুদুম নামৰ নৃত্য -গীত প্ৰশিক্ষণৰ অন্তত  কালি ২৭ নৱেম্বৰৰ দিনা পুৱা  আঠ বজাত পতাকা উত্তোলন কৰে ৰৌতা আঞ্চলিক কোচ ৰাজবংশী সন্মিলনীৰ সভাপতি বিজয় ৰুদ্ৰই । ইয়াৰ পিছত আবেলি অনুষ্ঠিত হয় মুকলি  সভা ।

এই মুকলি সভাত  সভাপতিত্ব কৰে  ওদালগুৰি জিলা কোচ ৰাজবংশী ছাত্ৰ সন্থাৰ সভাপতি শ্ৰী শ্ৰীবাস সিংহই । সভাত কোচ ৰাজবংশী ছাত্ৰ সন্থাৰ কেন্দ্ৰীয় সমিতিৰ সভাপতি অতুল বৰ্মন , মুছা ‘ৰ কেন্দ্ৰীয় সমিতিৰ সভাপতি জব্বৰ আলী , ওদালগুৰি জিলা কোচ ৰাজবংশী সন্মিলনীৰ সভাপতি অখিল ৰাজবংশী ,  ওদালগুৰি জিলা অবিচি মৰ্চাৰ সভাপতি গোপী বাহাদুৰ চেত্ৰী , ওদালগুৰি জিলা কোচ ৰাজবংশী সন্মিলনীৰ উপ সভাপতি সুৱল বৰ্মন আৰু ওদালগুৰি আঞ্চলিক কোচ ৰাজবংশী সন্মিলনীৰ ভক্ত সিংহ প্ৰমুখ্যে আক্ৰাছু পাঁচখন আঞ্চলিকৰ লগতে দহখন শাখা সমিতিৰ সভাপতি আৰু  সম্পাদকসকলে উপস্থিত থাকি কোচ ৰাজবংশীসকলৰ লোকনৃত্যৰ কৰ্মশালাখনৰ ওপৰত বক্তৃতা প্ৰদান কৰি শিক্ষাৰ্থীসকলক সংগীতৰসিক কামত দিহা পৰামৰ্শ  আগবঢ়ায়  । তদুপৰি সভাত কেইবাগৰাকী বিশিষ্ট অতিথি আৰু প্ৰশিক্ষক, প্ৰশিক্ষাৰ্থী ,নেতা, বিশিষ্ট নাগৰিক , সাংবাদিক আদিক সম্বৰ্ধনা জ্ঞাপন কৰে ।