অতিমাৰী কৰ’ণাক লৈ সমগ্ৰ দেশ চিন্তিত হৈ থকাৰ সময়ত ওদালগুৰি জিলাৰ ওৰাঙ চাৰিআলি আজি দুদিন ধৰি সাপ্তাহিক বজাৰলৈ ৰূপান্তৰিত হোৱাত সচেতন মহলে গভীৰ উদ্বেগ প্ৰকাশ কৰিছে ৷চৰকাৰৰ কঠোৰ নীতি নিয়ম ভৰিৰে মোহাৰি কি ক্ৰেতা কি বিক্ৰেতা সকলোৱে কভিড প্ৰট’কল ভংগ কৰি ওৰাং মাজবাট পথত ভিৰ কৰিছে ৷ঠেলা হেচা কৰি বজাৰ কৰিছে যদিও সিংহভাগৰে মূখত নাই মাক্স ৷কৰ’ণা যেন কাহানিবাই বিদায় লৈছে ওৰাঙৰ পৰা ৷ওদালগুৰি জিলাৰ সীমান্তত থকা ওৰাং চাৰিআলিৰ গাতে লাগি আছে শোণিতপুৰ জিলা ৷শোণিতপুৰ জিলাত লকডাউন চলি থকা বাবে বিশেষভাবে শোণিতপুৰৰ চিৰাজুলি অঞ্চলৰ লোকে ঈদৰ বজাৰ কৰিবলৈ হেতা ওপৰা লগাইছে ৷ক’ভিড১৯ ৰ প্ৰট’কল ভংগকৰি এনে জনসমাগম সৃষ্টি হোৱাৰ পিছতো সংশ্লিষ্ট বিভাগে  কুম্ভকৰ্ণৰ গভীৰ নিন্দ্ৰাত নাক বজাই শুই থকা দেখিবলৈ পোৱা গৈছে ৷

শোণিতপুৰ জিলাৰ জামুগুৰিহাটত ক’ৰনাৰ উদ্বেকজনক গণ সংক্ৰমণৰ মাজতে হ’ম ডেলিভাৰী কৰি অহা একাংশ ব্যৱসায়ীয়ে অত্যাৱশ্যকীয় খাদ্য সামগ্ৰীৰ মূল্য বৃদ্ধি কৰাত সমস্যাত পৰিছে সৰ্বসাধাৰণ ৰাইজ। ফলস্বৰুপে জামুগুৰিহাটত মূল্য বৃদ্ধি ঘটোৱা এই সকল অসাধু ব্যৱসায়ক কঠোৰ ভাবে সকিয়নী প্ৰদান কৰে শোণিতপুৰ জিলা উপায়ুক্ত ভূপেশ চন্দ্ৰ দাসে। ক’ভিড পৰিস্থিতি পৰ্যালোচনা কৰিবলৈ জামুগুৰিহাটত উপস্থিত হোৱা জিলা উপায়ুক্ত গৰাকীয়ে জটিল তথা সংকটপূৰ্ণ সময়ত মূল্য বৃদ্ধি ঘটোৱা অসাধু ব্যৱসায়ীৰ বিৰুদ্ধে শীঘ্ৰে কঠোৰ পদক্ষেপ গ্ৰহণ কৰিব বুলি জানিব দিয়ে। ইয়াৰ উপৰিও জামুগুৰিহাটত অধিক ক’ৰণা সংক্ৰমণৰ হাৰ বৃদ্ধি হোৱাত কন্টেইনমেন্ট জ’ন হিচাপে ঘোষণা কৰা পানপুৰ হকমাত উপস্থিত হৈ জিলা উপায়ুক্ত গৰাকীয়ে নিজে পৰিদৰ্শন কৰি ক’ভিড বিধি উলংগা কৰা সকলৰ ওপৰত কঠোৰ পদক্ষেপ লবলৈ আহ্বান জনাইছে স্থানীয় প্ৰশাসন,গাঁওবুড়াকে ধৰি গাঁওৰক্ষী বাহিনীসকলকো। ইয়াৰ উপৰিও জামুগুৰিহাটত যি সকল লোকে হ’ম ডেলিভাৰি কৰি অহাৰ মাজতে দোকান খোলা আৰু মূল্য বৃদ্ধি প্ৰসংগত জিলা উপায়ুক্ত গৰাকীয়ে কয় যে অত্যাৱশ্যকীয় খাদ্য সামগ্ৰীৰ নিৰ্ধাৰিত মূল্যতকে অধিক ললে আৰু যি সকল হ’ম ডেলিভাৰী কৰাৰ লগতে দোকান খোলিছে সেইসকলৰ দোকান ছীল কৰা হব আৰু হ’ম ডেলিভাৰী কৰিবলৈ দিয়া অনুমতি পত্ৰও বাতিল কৰা হব বুলি কয়।

ক’ভিডে ভয়ংকৰ ৰূপ ধাৰণ কৰা শোণিতপুৰ জিলাৰ জামুগুৰিহাটত বৰ্তমান অধিক ভয়াবহ হৈ উঠিছে ক’ভিডৰ গণ সংক্ৰমণ।শোণিতপুৰ জিলাৰ ভিতৰতে বৰ্তমান আক্ৰান্তৰ হাৰ সৰ্বাধিক হোৱা জামুগুৰিহাটৰ গ্ৰামাঞ্চললৈকে ক’ভিডৰ সংক্ৰমণ বৃদ্ধি পোৱাত শোণিতপুৰ জিলাৰ উপায়ুক্তৰ নিৰ্দেশত এতিয়া জামুগুৰি আৰক্ষীয়ে লগত অৰ্ধসামৰিক বাহিনী আৰু জিলাপৰ্যায়ৰ বিষয়াক লগত লৈ একাংশ অসচেতন লোকক সচেতন কৰিবৰ বাবেই গাঁৱে গাঁৱে পদসঞ্চালন কৰাৰ লগতে দিব লগা হৈছে আৰক্ষীয়ে তহল৷ক’ভিড প্ৰট’কল ভংগ কৰা বাটে ঘাটে মটৰ চাইকেল লৈ ঘুৰা ফুৰা একাংশ লোকক জৰিমণা বিহাৰ লগতে বেত্ৰাঘাটো কৰিব লগীয়া হৈছে আৰক্ষীয়ে৷ইয়াৰোপৰি বজাৰ সমাৰ বন্ধ থকাৰ পিছতো ক’ভিড প্ৰট’কল ভংগ কৰি একাংশ বেপাৰীয়ে শাক পাচলি,মাংস আদি গাঁৱৰ তিনিআলি চাৰিআলিত বিক্ৰী কৰি থকা লোকসকলকো ঘুৰাই পঠাবলগীয়া হৈছে আৰক্ষীয়ে৷অঞ্চলটোত ক’ভিডৰ সংক্ৰমণ ৰোধ কৰিবৰ বাবেই জিলা প্ৰশাসণে আনকি মাইক লৈ ৰাইজক সজাগ আৰু সচেতন কৰাৰ লগতে সন্ধিয়াৰ ভাগত একাংশই নীতি নিয়ম ভংগ কৰি সান্ধ্যভ্ৰমণ কৰি সময় অতিবাহিত কৰা মহিলা পুৰুষ সকলকো আৰক্ষীয়ে সতৰ্ক কৰি  দিয়া পৰিলক্ষিত হৈছে৷উল্লেখ্য যে জামুগুৰিহাটত বৰ্তমানলৈকে ১৬ শৰো অধিক লোক ক’ৰনাত আক্ৰান্ত হোৱাৰ লগতে ১৬ জনকৈ লোক মৃত্যুমুখত পৰাৰ উপৰিও ১৫০ গৰাকীৰো অধিক আক্ৰান্ত চিকিৎসাধীন হৈ আছে৷জোন বৰা,জামুগুৰিহাট।

অসমীয়া জাতি যি চিত্ৰকলা, সংস্কৃতি তথা গুৰু দুজনাৰ যি মহত্ত্ব অৱদান ‘ভাওনা’ক বিশ্বমুখী কৰাৰ উদ্দেশ্যে আগত ৰাখি প্ৰাকৃতিক ৰঙেৰে সৰ্বাধিক দৃশ্য অংকিত কৰিলে শিৱসাগৰৰ এগৰাকী ছাত্ৰীয়ে। মুঠ ৭৩ টা ছবিৰে “নৃসিংহ যাত্ৰা ” ভাওনাখন সকলো ব‍্যক্তিয়ে বুজিব পৰাকৈ প্ৰতিফলিত হৈ আছে চিত্ৰ সমূহত। ” নৃসিংহ যাত্ৰা ” ভাওনা  অসমীয়া ভাষাৰ প্ৰথম খন ভাওনা । যিখন ভাওনা Manuscript ৰ যোগেদি উলিওৱা হৈছে। সম্পূৰ্ণ Manuscript আৰ্হি ব্যৱহাৰ কৰি ভাওনা খনৰ প্ৰতিটো দৃশ্য অংকন কৰা হৈছে। গায়ন-বায়নৰ প্ৰৱেশৰ পৰা , সূত্ৰধাৰৰ প্ৰৱেশৰ পৰা ভাওনাৰ শেষ মূহুৰ্তলৈকে অংকন কৰা হৈছে।  শিৱসাগৰ নগৰৰ সমীপৰ শুকানপুখুৰী অঞ্চলৰ নিৱাসী ধ্ৰুৱজ্যোতি কাকতি আৰু ৰূপজ্যোতি কাকতিৰ কন্যা তথা শিৱসাগৰ মহাবিদ্যালয়ৰ ছাত্ৰী  নিমিশা কাকতিয়ে অংকন কৰা ৭৩ টা দৃশ্যত বিভক্ত কৰা হৈছে। ” নৃসিংহ যাত্ৰা  ” ভাওনা খনৰ ৩১ টা চৰিত্ৰত ভগৱান বিষ্ণুৰ বৰাহ আৰু নৃসিংহ অৱতাৰ উল্লেখ কৰা হৈছে। চিত্ৰ সমূহত কোনো ধৰণৰ কৃত্ৰিম ৰং নাই। সকলো ৰঙেই প্ৰাকৃতিক। যোৱা ২১ মে ‘ ৰ পৰা ৩০ মে’ ৰ ভিতৰত সম্পূৰ্ণ ১০ দিনৰ ভিতৰত ভাওনা ভাগি চিত্ৰৰ যোগেদি অংকন কৰি উলিয়াইছে।যাৰ বাবে এনেকুৱা এটা শৈলী যি সকলো প্ৰকাৰৰ , সকলো ধৰণৰ মানুহে সেই চিত্ৰসমুহ চাই অসমীয়া ভাওনা সম্পকে কিছু আভাস বুজিব পৰা এটা পাৰদৰ্শিতা আছে ৷ অসমীয়া জাতি ভক্তি প্ৰাণৰ গুৰু দুজনাই ৰচিত মহাপুৰুষীয়া ভাঁওনা “নৃসিংহ যাত্রা” ক প্ৰাকৃতিক ৰঙেৰে অংকন কৰি India Book of Records ত স্হান লাভ কৰি পিতৃ ধ্ৰুৱ কাকতি কন্যা নিমিশা কাকতিয়ে নিজ জন্মস্থান শুকানপুখুৰীৰ লগতে শিৱসাগৰ তথা অসমৰ নাম উজলাই আমাকো গৌৰাম্বিত কৰিছে। নিমিশা কাকতিৰ এই সফলতা অৰ্জনক লৈ শিৱসাগৰ জিলাৰ লগতে শুকান পুখুৰী বাসী ৰাইজ  আনন্দৰত উৎফুল্লিত হৈ পৰিছে।

অসম চৰকাৰৰ এক নিৰ্দেশ মৰ্মে ওদালগুৰি জিলা আৰক্ষী অধীক্ষক কাৰ্যালয়ৰ এলেকাসহ ওদালগুৰি  সদৰ  আৰক্ষী থানাৰ  আৰক্ষী বিষয়া মলয়  কুমাৰ  আচাৰ্যই   ৰৌতা  আৰক্ষী থানালৈ  বদলি হৈ আহে  । সেয়েহে ৰৌতা আৰক্ষী  থানাৰ  নতুন   ভাৰপ্ৰাপ্ত  আৰক্ষী  বিষয়া হিচাপে  কালি ১৯  জুলাইৰ  দিনা  থানাৰ  দায়িত্বভাৰ গ্ৰহণ কৰে । গতিকে  বৃহত্তৰ  ৰৌতা  অঞ্চলটোৰ  বিভিন্ন  জনগোষ্ঠীৰ  জনসধাৰণে  নতুনকৈ  আহি  কাৰ্যত  যোগদান কৰা  নতুন আৰক্ষী বিষয়াগৰাকীক সম্ভায়ণ  জনাইছে  । তদুপৰি এই  নতুন  আৰক্ষী  বিষয়া গৰাকীৰ  নেতৃত্বত বৃহত্তৰ ৰৌতা অঞ্চলটো দুৰ্নীতি  মুক্ত হোৱাৰ   লগতে  ড্ৰাগছ  মুক্ত  আৰু  ক’ভিড  মহামাৰীৰ প্ৰতি  লক্ষ্য  ৰাখিব বুলি  ৰাইজে  আশা প্ৰকাশ কৰিছে  ।  আনহাতে  এই  ৰৌতা আৰক্ষী থানাৰ ভাৰপ্ৰাপ্ত আৰক্ষী বিষয়া হেমন্ত বৰুৱাই ওদালগুৰি  জিলা  আৰক্ষী  অধীক্ষক  কাৰ্যালয়লৈকে  আজি  বদলি  হৈ  যায়  বুলি   জানিব পৰা গৈছে  । 

নাই  মোমাইতকৈ কণা মোমাই সাৰ,  এই আপ্তবাক্য  শাৰী প্ৰযোজ্য হৈছিল বিগত বছৰৰ মহামাৰী কৰ’নাৰ সময়ত । কিয়নো ৰাজ্য চৰকাৰে মহামাৰী কৰ’নাৰ লকডাউনৰ সময় চোৱাত  প্ৰায় সংখ্যক লোকৰ একাউণ্টত ৫০০ শ টকা দিয়াৰ উপৰিও বিনামূলীয়া চাউল আৰু চৰকাৰী কৰ্মচাৰী সকলৰ পৰাও কিছু সাহাৰ্য্য আগবঢ়োৱা হৈছিল । কিন্তু এইবেলি  বিগত বছৰৰ তুলনাত বহু দৰিদ্ৰ সীমাৰেখাৰ তলৰ লোক সকলৰ মাজত খাদ্য সংকটে দেখা দিছে । বিশেষকৈ নৈশ বাছৰ টিকট কাউন্টাৰত থকা যুৱক,যুৱতী সকলৰ জীৱন আৰু জীৱিকাৰ প্ৰতি প্ৰচণ্ড ভাবুকি কঢ়িয়াই আনিছে । উল্লেখযোগ্য যে ৰৌতা, ধনশ্ৰীঘাট আৰু ওৰাঙত কেইবাটাও নৈশ বাছ সেৱাৰ টিকট কাউন্টাৰ আছে । কাউন্টাৰত টিকট বিক্ৰী নামত নিয়োজিত হৈ থকা বহু যুবক যুৱতীয়ে ইযাৰ পৰা কিছু অংশ লাভ কৰি পৰিয়ালক  পোহ পাল দি অহাৰ লগতে নিতৌ ব্যৱহাৰ্য্য সামগ্ৰী কিনি কোনো মতে যোৰা তাপলি মাৰি চলিছে যদিও এতিয়া দীৰ্ঘ দিন ধৰি নৈশ বাছ বন্ধ হৈ পৰাত তেওঁলোকৰ  অৱস্থা  পানীত হাঁহ নচৰা বিধৰ হৈ পৰিছে ।তেওঁলোকৰ পৰিয়াললৈ নামি আহিছে  ঘোৰ অন্ধকাৰ ।ৰুদ্ধ হৈ পৰিছে যুবক, যুবতী সকলৰ জীৱন আৰু জীৱিকাৰ গতি পথ । কেবল নৈশ  বাছ সেৱাৰ টিকট বিক্ৰী কৰা যুৱক যুৱতী সকলৰে তথৈবচ অৱস্থা নহয ।অনুৰূপ ধৰনেৰে চেলুন, দৰ্জী, ধোৱা, মচি,  প্ৰেছ,  ক্ষুদ্ৰ ক্ষুদ্ৰ  ব্যৱসায়ী প্ৰতিষ্ঠানৰ সৈতে জড়িত থকা যুবক যুবতী সকলৰ মাজত তীব্ৰ খাদ্য সংকটে দেখা দিছে। গতিকে এইসকল ব্যৱসায়ত জড়িত হৈ থকা যুৱক যুৱতী সকলে আৰ্থিক সাহাৰ্য্যৰ বাবে    চৰকাৰৰ মুখলৈ বাদ চাই আছে ।

ওদালগুৰি জিলাৰ ভিতৰতেই মাজবাটৰ নিলগৰ ধনশ্ৰী টি কোম্পানীৰ উল্লেখযোগ্য আৰু  প্ৰশংসনীয়  চাহ বাগিচা হৈছে বাহিপুখুৰী চাহ বাগিচা । বৰ্দ্ধিত মহামাৰী ক’ভিড কালত অসমৰ বহু চাহ বাগিচাৰ  শ্ৰমিকে ক’ৰোণা সংক্ৰান্তত প্ৰচাৰ হৈ থকা কিছুমান উৰা বাতৰিত ভুল গৈ ক’ভিড ১৯ পৰীক্ষাৰ পৰা পলাই ফুৰা ভেকচিন নোলোৱা , পৰীক্ষা নকৰা ,স্বাস্থ্য কৰ্মীক বেয়া ব্যৱহাৰ কৰা দেখা গৈছিল । মাজবাট অঞ্চলত এখন চাহ বাগিচাত কৰোণা টেষ্ট কৰাৰ কথা বুজাবলৈ যাওঁতে স্বাস্থ্য কৰ্মীৰ লগতে আটছা কৰ্মী সকলো অপদস্ত হব লগা হৈছিল । ভয় ,ভাবুকি নীৰৱে সহ্য কৰিব লগীয়া দৰে ঘটনাও সংগঠিত হৈ থকাটো এতিয়া নিত্যনৈমিত্তিক স্বাভাবিক ঘটনা হৈ পৰিছে ৷ কিন্তু এইবোৰ ঘটনাৰ সম্পূৰ্ণ বিপৰীত দৃশ্য দেখা পোৱা গৈছে মাজবাটৰ বাহিপুখুৰী চাহ বাগিছাখনত । চাহ বাগিছা খনৰ চিকিৎসক ,স্বাস্থ্য কৰ্মী ,আশা কৰ্মী , পৰিচালক ও চাহ শ্ৰমিক সকলৰ  প্ৰত্যক্ষ সহযোগত এক সুন্দৰ পৰিবেশৰ সৃষ্টি কৰি কৰি মাৰাত্মক বৰ্দ্ধিত মহামাৰীৰ বিৰুদ্ধে চৰকাৰে জনোৱা আহ্বান মৰ্মে সমূহীয়া ভাবে যুজঁ দিয়াৰ ফলত বাগিছা খন কৰোণা মুক্ত বাগান হিচাপে চিহ্নিত হোৱাৰ পথত ধাৱমান হৈছে । এই বাহিপুখুৰী চাহ বাগিছা খনৰ  মুঠ জনসংখ্যা হৈছে ৪৫০৪ গৰাকী আৰু ইয়াৰে ৩৫১৬ গৰাকী হৈছে বাগিচাখনৰ চাৰিসীমাৰ অন্তৰ্গত বাসিন্দা । ৮২২ টা পৰিয়াল থকা বাগিচাখনত প্ৰথম অৱস্থাত শতাধিক কৰোণা পজিটিভ চিনাক্ত হোৱাত এক হাহাকাৰ অবস্থাৰ সৃষ্টি হৈছিল । শ্ৰমিক সকলেও কৰোণা টেষ্ট কৰোৱাত শংকিত,আতংকিত  হোৱা পৰিলক্ষিত হৈছিল । টেষ্ট কৰিবলৈ অমান্তি হৈছিল । পজিটিভ লোক সকল বাগিচাৰ বাহিৰৰ কো’ভিড কেয়াৰ চেণ্টাৰত যাবলৈ অমান্তি পর্যন্ত হৈছিল । স্বাস্থ্য কৰ্মী ,প্রশাসন , বিজেপি দলৰ কাৰ্য্যকর্তা , বিভিন্ন দল সংগঠনে চলোৱা প্ৰচেষ্টাৰ ফলত এই ধৰণৰ অশান্তময় পৰিবেশৰ পৰা ক্ৰমান্বয়ে এক সুস্থিৰ অৱস্থালৈ ঘূৰাই অনা হৈছিল । আতংকিত হৈ পৰা চাহ শ্ৰমিক সকলক বুজোৱা , ক’ভিড চেণ্টাৰৰ ব্যৱস্থা কৰি বাগিচাখনতেই ৰাখি চিকিৎসা সেৱা আগবঢ়াই খোৱা বোৱাৰ পৰা  আবশ্যক অনুসৰি বিছনা পত্ৰ আদিবোৰৰ  ব্যৱস্থা কৰি দিয়াটো ইমান সহজো নাছিল ৷ যদিও বাগিচাখনৰ শ্ৰমিক সকলৰ পাৰস্পৰিক আৰু উমৈহতীয়া  সক্ৰিয়  সহযোগিতাৰ ফলত অৱশেষত  সকলো কামেই  সহজ ভাবে পৰি চালিত হোৱাৰ ক্ষেত্ৰত যথেষ্ট সহায় হৈছিল । চাহ বাগিচাখনত ইতিমধ্যে এতিয়ালৈ ১৯১১ গৰাকী লোকৰ ক’ভিড পৰীক্ষা কৰোৱা হৈছে  তাৰে কৰোণা ১২৪ গৰাকীৰ দেহত কৰোণা ধৰা পৰিছিল । ইয়াৰে ১২১ গৰাকী ৰোগী সুস্থ হৈ ঘৰলৈ উভতি গৈছে আৰু ৩ গৰাকী এতিয়ালৈ চিকিৎসাধীন হৈ আছে । ওৰাং খণ্ড প্ৰাথমিক স্বাস্থ্য কেন্দ্ৰৰ বিপিএম পংকজ সভাপণ্ডিতৰ সহযোগত বাগিচাখনৰ  একটিং পৰিচালক তিলক চন্দ্ৰ ডেকা, জ্যেষ্ঠ সহঃ পৰিচালক  মোহন শইকীয়া, চিকিৎসক কে পি মিশ্ৰ ,স্বাস্থ্য সহায়ক ,চিবেশ গোৱালা,এ এন এম নিতা দেৱী ,ফাৰ্মাচিষ্ট কে চি ব্ৰহ্ম ,এ এন এম ক্ৰমে  নিৰুপমা চহৰীয়া , মহিমা কুৰ্মী , পিপলিং বড়ো ,আৰু আশা পৰ্যবেক্ষক ববী টিগ্গা  আশা কর্মী ক্ৰমে – আছিচণ তিৰ্কী, দেবয়ন্তী ৰজক, যশোদা লাকড়া , মমি গৌড় , সন্ধ্যা তাঁতি প্ৰমুখ্যে কৰ্মী সকলে অক্লান্ত পৰিশ্ৰম কৰি বাগিছা খনৰ এক সুস্থিৰ  আৰু উন্নত পৰিবেশ উভতাই আনে ।মাজে সময়ে এই বাগিছাখন ওৰাঙৰ স্বাস্থ্য কৰ্মী  ৰঞ্জিত থাপা,অনিল কলিতা, আবু বক্কৰ চিদ্দিক,সঞ্জীৱ তালুকদাৰ,উদয় শংকৰ শৰ্মাআদিয়ে শ্ৰমিক সকলক ক’ভিড টেষ্ট কৰি আহিছে ৷ক’ভিড ১৯ ৰ বিৰুদ্ধে দিনে নিশাই একাকাৰ কৰি যুজঁ দিয়া  কভিড যোদ্ধা শিৱেচ গোৱালাক স্বাস্থ্য ভিভাগৰ তৰফৰ পৰা যোৱা  ১১জুলাইত ওৰাঙৰ কলাগুৰু বিষ্ণুৰাভা স্নাতক মহাবিদ্যালয়ত আয়োজিত জিলা উপায়ুক্ত উপস্থিত থকা এখন সভাত সম্বৰ্ধনাও জনোৱা হৈছে । বাগিছা খনৰ স্বাস্থ্য কৰ্মী সকলৰ এটাই আশা কৰিছে যে কৰোণা মুক্ত  চাহ বাগিছা  লাগে । কভিড হট স্পট হিচাপে চিহ্নিত হোবা চাহ বাগিছাখন স্বাস্থ্য বিভাগ আৰু চাহ বাগিছাৰ কভিড ভেকচিন গ্ৰহন, সুচিকিৎসা,সুব্যবস্থাপনা আৰু  সুদক্ষ পৰিচালনা আদিৰ বাবে দিনক দিনে কভিড সংক্ৰমন ক্ৰমান্বয়ে উন্নতি  দিশত  হ্ৰাস পাবলৈ ধৰিছে ৷এইখন চাহ বাগিছাই কভিডৰ ক্ষেত্ৰত গ্ৰহন কৰা  প্ৰশংসনীয় কাৰ্য্যক ওদালগুৰি জিলা সচেতন নাগৰিক সমিতি,বিটিএডি সাংবাদিক সংস্থাৰ কেন্দ্ৰীয় সমিতিৰ সাধাৰণ সম্পাদক নব কুমাৰ ডেকাই শলাগ লৈ আন্তৰিক ধন্যবাদ জনাইছে ৷