আলফা-চৰকাৰৰ আলোচনাত যেন একপ্ৰকাৰ যতি পৰিল৷ অসম চৰকাৰৰ প্ৰচেষ্টা আৰু আলফাৰ মুখ্য সেনাধ্যক্ষ পৰেশ বৰুৱাৰ সদিচ্ছাত আলফা-চৰকাৰৰ মাজত আলোচনাৰ পৰিবেশ এটা গঢ় লৈ উঠিছিল যদিও আজি আলফাই প্ৰেৰণ কৰা এক বিবৃতিয়ে আলফা-চৰকাৰৰ সম্ভাৱ্য আলোচনাত যতি পেলোৱাৰ সম্ভাৱনাকহে প্ৰকট কৰি তুলিলে৷ স্বাধীনতা দিৱসৰ বৰ্জনৰ আহ্বানেৰে আলফা, এনএছচিএন/জিপিআৰএন-এ আজি সংবাদ প্ৰেৰণ কৰিছে যৌথ বিবৃতি৷ বিবৃতিযোগে আলফাই কয়, সৰ্বসাধাৰণৰ জীৱনশৈলী নিম্নগামীৰ এনে আপদকালত পীড়িত জনগণৰ কাষত অসমৰ্থ ৰাষ্ট্ৰই ১৫ আগষ্টত, ইয়াৰ ৭৬সংখ্যক তথাকথিত ‘স্বাধীনতা দিৱস’ উদযাপন কৰিবলৈ লোৱাটো অন্যায়, ঐতিহাসিকভাৱে অপ্ৰাসংগিক আৰু মূল্যহীন৷ দেশৰ স্বাধীনতা দিৱসৰ বৰ্জনৰ আহ্বান জনোৱাৰ উপৰি ১৫ আগষ্টৰ দিনটোত সৰ্বাত্মক বন্ধ ঘোষণা কৰিছে আলফাই৷ যৌথ বিবৃতিযোগে অসম আৰু নগালেণ্ডৰ উপৰিও মণিপুৰ, ত্ৰিপুৰা আৰু মেঘালয়ৰ সমূহ ৰাজনৈতিক, অ-ৰাজনৈতিক, জাতীয় দল-সংগঠন আৰু সৰ্বস্তৰৰ ৰাইজক ভুৱা ‘স্বাধীনতা দিৱস’ৰ সকলো প্ৰকাৰৰ  কাৰ্যক্ৰমণিকাত যোগদানৰ লগতে ব্যক্তিগত স্তৰতো পালন কৰাৰ পৰা বিৰত থাকিবলৈ আলফাই আহ্বান জনাইছে৷ 

আলফাৰ এই আহ্বানৰ পাছতেই ৰাজ্যজুৰি সৃষ্টি হৈছে তীব্ৰ প্ৰতিক্ৰিয়া৷ যিসময়ত ৰাজ্য চৰকাৰে ‘আজাদী কা অমৃত মহোৎসৱ’ উদযাপন কৰিবলৈ ব্যাপক প্ৰস্তুতি অব্যাহত ৰাখিছে, তেনেসময়তে আলফাৰ আহ্বানে প্ৰতিক্ৰিয়াৰ সৃষ্টি কৰিছে৷ এইবেলি স্বাধীনতা দিৱসক লৈ অসম চৰকাৰেও বিশেষ পদক্ষেপ গ্ৰহণ কৰিছে৷ সেই অনুসৰি, ১৩, ১৪ আৰু ১৫ আগষ্টত অসমবাসীক ঘৰে ঘৰে জাতীয় পতাকা উৰুৱাই স্বাধীনতা দিৱস উদযাপনৰ বাবে আহ্বান জনাইছে৷ আৰু এনে এক সময়তে আলফাৰ স্বাধীনতা দিৱস বৰ্জনৰ আহ্বান বিশেষভাৱে তাৎপৰ্যপূৰ্ণৰূপে বিবেচিত হৈছে৷ কিয়নো, আলফা-চৰকাৰৰ আলোচনাৰ মাধ্যমেৰে ৰাজ্যত এক শান্তি শৃংখলাৰ পৰিবেশ গঢ় লৈ উঠিব বুলি ৰাজ্যবাসীয়ে আশা কৰিছিল৷ ৰাজ্যবাসীয়ে এয়াও আশা কৰিছিল যে পূৰ্বজ মুখ্যমন্ত্ৰীৰ দৰে নহৈ হিমন্ত বিশ্ব শৰ্মাই আলফা-চৰকাৰৰ আলোচনাক লৈ বিশেষ ভূমিকা গ্ৰহণ কৰিব৷ আৰু প্ৰথমাৱস্থাত তেনেকৈয়ে দেখা গৈছিল মুখ্যমন্ত্ৰীগৰাকীক৷ আনকি, মুখ্যমন্ত্ৰী শৰ্মাৰ প্ৰশংসাত পঞ্চমুখ হৈছিল পৰেশ বৰুৱাও৷

বিগত বৰ্ষৰ ১০ মে’ত হিমন্ত বিশ্ব শৰ্মাই দায়িত্ব গ্ৰহণ কৰাৰ পাছত যোৱাবেলিৰ স্বাধীনতা দিৱস আৰু গণৰাজ্য দিৱস বৰ্জনৰ আহ্বান জনোৱা নাছিল আলফাই৷ যুদ্ধবিৰতি ঘোষণা কৰিছিল আলফাই৷ কিন্তু, ক’ৰবাত যেন কেণা লাগিল৷ আলফালৈ চোৰাংচোৱা পঠালে ৰাজ্যৰ শীৰ্ষ আৰক্ষী বিষয়াই৷ পৰিণতিত চোৰাংচোৱাগিৰি কৰিবলৈ যোৱা যুৱকক মৃত্যুদণ্ড দিলে আলফাই৷ প্ৰতিক্ৰিয়া হ’ল৷ সমালোচিত হ’ল আলফা৷ তাৰ পাছত দেখা গ’ল, আলফাক সমৰ্থন কৰাৰ অভিযোগত, আলফাক সমৰ্থন কৰি কবিতা লিখা বাবে জেললৈ গ’ল তৰুণ-তৰুণী৷ এনেকৈয়ে যেন আলফা আৰু চৰকাৰৰ মাজত বাঢ়ি আহিল দুৰত্ব৷ আৰু আজি আলফাৰ স্বাধীনতা দিৱস বৰ্জনৰ আহ্বানেৰে প্ৰেছ বিবৃতি৷ যেন প্ৰতিটো প্ৰসংগৰে মিল আছে ইটোৰে সিটোৰ৷ এতিয়া লক্ষ্যণীয় হ’ব আলফা-চৰকাৰৰ আলোচনাই কি গতি লয়৷ একেদৰে আজিৰ আহ্বানৰ পাছত আলফাৰ আহ্বান সম্পৰ্কত ৰাজ্য চৰকাৰে কি স্থিতি গ্ৰহণ কৰে সেয়াও হ’ব লক্ষ্যণীয়৷

শাওণ মাহ শিৱক আৰাধনা কৰাৰ উত্তম মাহ বুলি ধৰা হয়। শাওণ মাহত জলাভিষেক কৰিলে সোনকালে সকলো সমস্যাৰ সমাধান পাই বুলি ধৰা হয়। আৰু সেয়েহে শাওণ মাহৰ সোমবাৰে শিৱক আৰাধনা কৰা হয়। অৱশ্যে অন্য দিনতো শিৱক আৰাধনা কৰা হয় যদিও এই মাহতো অত্যন্ত শুভ বুলি ধৰা হয়। ৮ আগষ্টত শাওণৰ শেষৰটো সোমবাৰ। আৰু শাওণৰ শেষৰটো সোমবাৰ অৰ্থাৎ চতুৰ্থটো সোমবাৰলৈ ভক্তগণে অতি আগ্ৰহেৰ বাট চাই থাকে। এই মাহত শিৱক পূজা কৰিলে ভক্তসকলৰ সকলো দুখ-যন্ত্ৰণা মহাদেৱে হৰি নিয়ে বুলি সকলোৱে বিশ্বাস কৰে। সেয়েহে তেওঁৰ পূজা কৰোঁতে সকলোৱে হৰ হৰ মহাদেৱ বুলি বাক্য আওৰায়৷

  
এনেধৰণে শিৱক আৰাধনা কৰিলে আপোনাৰ সকলো দুখ হ’ব দূৰ: 
পুৱা সোনকালে উঠি গা ধুই শিৱক আৰাধনা কৰিব লাগে। শিৱ লিংগত পানী ঢালিব লাগে। শাওণত শিৱলিংগত জলাভিষেক বা ৰুদ্ৰাভিষেক কৰাৰ মহত্ব অশেষ, আৰু শাওণত ইয়াৰ মহত্ব অধিক হয়। ৰুদ্ৰাভিষেক কৰি ১০৮বাৰ শিৱ মন্ত্ৰ জঁপ কৰিব আৰু লগতে শিৱ লিংগত বেলপাত অৰ্পণ কৰক। শিৱৰ পূজাৰ সামগ্ৰীত গাখীৰ বেলপাত ভাং ধতুৰা গুটি ৰাখক কিয়নো শিৱৰ প্রিয় সামগ্ৰী অৰ্পণ কৰিলে মহাদেৱ সন্তুষ্ট হ’ব।

শাওন মাহৰ প্রতিটো সোমবাৰে ব্ৰতপালন কৰক।
প্ৰতি সোমবাৰে শিৱ মন্দিৰত এগছি ঘীৰ চাকি জ্বলাওক। 
শাওণৰ সোমবাৰে যিসকল লোকে নীতি-নিয়ম আৰু শ্ৰদ্ধাপূৰ্বক পূজা কৰে তেওঁলোকৰ কষ্ট মহাদেৱে দূৰ কৰে বুলি বিশ্বাস কৰে।

৩১ আগষ্টত হিতেশ দেৱশৰ্মাই অৱসৰ ল’লে৷ ৰাষ্ট্ৰীয় নাগৰিকপঞ্জীৰ ৰাজ্যিক সমন্বয়ক হিচাপে কাৰ্যনিৰ্বাহ কৰিছিল হিতেশ দেৱশৰ্মাই৷ প্ৰতীক হাজেলাৰ পাছত দেৱশৰ্মাই সমন্বয়ক হিচাপে দায়িত্ব লৈয়ে কিছুমান পদক্ষেপ গ্ৰহণ কৰিছিল৷ বিশেষকৈ ১৬শ কোটি টকা ব্যয় কৰি প্ৰস্তুত কৰা নাগৰিকপঞ্জীখনৰ নামত ব্যাপক কেলেংকাৰি সংঘটিত হোৱাৰ বিষয়টোত হিতেশ দেৱশৰ্মাই গুৰুত্ব দিছিল৷ মহাগাণনিকৰ প্ৰতিবেদনতো নাগৰিকপঞ্জী প্ৰস্তুতকৰণৰ নামত এটা মহলে কোটি কোটি টকাৰ ইফাল-সিফাল কৰাৰ তথ্য লিপিবদ্ধ হৈছে৷ উল্লেখযোগ্য যে সামাজিক মাধ্যমত নাগৰিকপঞ্জীৰ নামত সংঘটিত হোৱা কেলেংকাৰিৰ তদন্ত বিচাৰি হিতেশ দেৱশৰ্মাই মুখ্যমন্ত্ৰীৰ দুৰ্নীতি নিবাৰক শাখাক দিয়া এখন পত্ৰ ৰাজহুৱা হৈছে৷ এই পত্ৰখনত দেৱশৰ্মাই প্ৰলয় শীল নামৰ এজন লোকৰ নাম স্পষ্টভাৱে উল্লেখ কৰিছে৷ দেৱশৰ্মাই দুৰ্নীতি নিবাৰক শাখাত দাখিল কৰা অভিযোগ পত্ৰখনত উল্লেখ কৰিছে যে প্ৰলয় শীল নামৰ ব্যক্তিগৰাকী নাগৰিকপঞ্জী প্ৰস্তুতকৰণৰ লগত কোনোধৰণে জড়িত নহয়৷ তেওঁ ঠিকাদাৰ নতুবা বিষয়াও নহয়৷ তৎসত্ত্বেও এইগৰাকী ব্যক্তি নাগৰিকপঞ্জীৰ কাৰ্যালয়ত দৈনিক কিয় দেখিবলৈ পোৱা গৈছিল? এই ক্ষেত্ৰত সদ্যঅৱসৰপ্ৰাপ্ত নাগৰিকপঞ্জীৰ ৰাজ্যিক সমন্বয়ক হিতেশ দেৱশৰ্মাই মুখ্যমন্ত্ৰীৰ দুৰ্নীতি নিবাৰক শাখাৰ ওচৰত লিখিতভাৱে কৈছিল যে প্ৰলয় শীলক জেৰা কৰিলে বহু কথা পোহৰলৈ আহিব৷

ৰাজ্যিক সমন্বয়ক এগৰাকীয়ে দাখিল কৰা অভিযোগ পত্ৰখনক মুখ্যমন্ত্ৰীৰ দুৰ্নীতি নিবাৰক শাখাই কোনো ধৰণৰ গুৰুত্ব নিদিয়াৰ অভিযোগ উত্থাপিত হৈছে৷ আনকি শূন্য সহনশীলতাৰ কথা কোৱা মুখ্যমন্ত্ৰী তথা চৰকাৰে হিতেশ দেৱশৰ্মাৰ অভিযোগপত্ৰৰ আধাৰত কোনো ধৰণৰ গোচৰ এইপৰ্যন্ত ৰুজু নকৰিলে৷ অসমৰ জাতীয় জীৱনৰ দলিল হোৱাৰ পৰা নাগৰিকপঞ্জীক কোনে বঞ্চিত কৰিলে? অসমক বিদেশী মুক্ত কৰা তথা স্বদেশী আৰু বিদেশী চিনাক্তকৰণৰ বাবে প্ৰস্তুত কৰা নাগৰিকপঞ্জীৰ নামত কোনে কেলেংকাৰি সংঘটিত কৰিলে? কোনে উচ্চতম ন্যায়ালয়ৰ নিৰ্দেশনাক বিপথে পৰিচালিত কৰি ৰাজকোষৰ ১৬শ কোটি টকা অপচয় কৰাৰ লগতে অসমীয়া মানুহক চৰম প্ৰতাৰণা কৰিলে, সেই কথাবোৰ অসম চৰকাৰে ৰাজহুৱা কৰিবলৈ আগ্ৰহী নহয়৷ অভিযোগ উঠিছে যে অসম চৰকাৰৰ এটা শক্তিশালী মহলে নাগৰিকপঞ্জীৰ নামত সংঘটিত হোৱা কেলেংকাৰি ঢাকোন দিবলৈ তৎপৰ হৈ পৰিছে৷ যাৰ পৰিণতিত হিতেশ দেৱশৰ্মাই অনা অভিযোগৰ কোনো তদন্ত অসম চৰকাৰে নকৰিলে৷ নাগৰিকপঞ্জীৰ ক্ষেত্ৰত অসম চৰকাৰৰ ভূমিকা অত্যন্ত হতাশাজনক৷ চৰকাৰে নাগৰিকপঞ্জী প্ৰস্তুতকৰণৰ নামত সংঘটিত কৰা কেলেংকাৰিৰ খলনায়কসকলক ৰক্ষণাবেক্ষণ দিবৰ বাবে বিভিন্ন কৌশলৰ আশ্ৰয় লোৱাৰ অভিযোগ উঠিছে৷ এই ক্ষেত্ৰত মুখ্যমন্ত্ৰী হিমন্ত বিশ্ব শৰ্মায়ো পূৰ্বৰ সমন্বয়ক প্ৰতীক হাজেলাক ৰক্ষণাবেক্ষণ দিবলৈ গৈ হিতেশ দেৱশৰ্মাৰ সকলো অভিযোগ একাষৰীয়া কৰাৰ অভিযোগ উত্থাপিত হৈছে৷ 

এক আগষ্টত ৰাষ্ট্ৰীয় নাগৰিকপঞ্জীৰ নতুন ৰাজ্যিক সমন্বয়ক হিচাপে পাৰ্থপ্ৰতিম মজুমদাৰে যোগদান কৰিছে৷ ইতিমধ্যে নাগৰিকপঞ্জী প্ৰস্তুতকৰণৰ নামত সংঘটিত কেলেংকাৰিৰ তদন্ত বিচাৰি হিতেশ দেৱশৰ্মা হতাশ হৈছে৷ নতুন সমন্বয়ক পাৰ্থপ্ৰতিম মজুমদাৰে কেলেংকাৰিৰ তদন্ত নকৰাকৈ বিষয়টো আগবঢ়োৱা সহজ নহ’ব৷ অসম চৰকাৰে নাগৰিকপঞ্জীখনক লৈ কোনো ধৰণৰ আগ্ৰহ দেখুওৱা নাই৷ কেন্দ্ৰীয় গৃহমন্ত্ৰী অমিত শ্বাহে অসমৰ নাগৰিকপঞ্জীক লৈ যথেষ্ট উৎসাহ প্ৰদৰ্শন কৰিছিল৷ সংসদৰ মজিয়াতো ইয়াক লৈ আগ্ৰহ দেখুওৱাই নহয়, সমগ্ৰ দেশতে অসমৰ আহিৰ্ত নাগৰিকপঞ্জী প্ৰস্তুত কৰা হ’ব বুলি ঘোষণা কৰিছিল৷ অমিত শ্বাহৰ এই ঘোষণা কিন্তু আগনাবাঢ়িল৷ ইয়াৰ কাৰণ বিহাৰকে ধৰি বিভিন্ন ৰাজ্য চৰকাৰ আৰু জনসাধাৰণে নাগৰিকপঞ্জীৰ প্ৰয়োজন নাই বুলি ঘোষণা কৰে৷ প্ৰসংগক্ৰমে উল্লেখযোগ্য যে অসমত নাগৰিকপঞ্জী প্ৰস্তুতকৰণৰ ভিত্তিবৰ্ষ অসম চুক্তিৰ আধাৰত ১৯৭১ কৰা হৈছে৷ মুখ্যমন্ত্ৰী হিমন্ত বিশ্ব শৰ্মাই অসমৰ পৰা অবৈধ বিদেশী বহিষ্কৰণৰ ভিত্তিবৰ্ষ ১৯৫১ হ’ব লাগে বুলি বিভিন্ন সময়ত মন্তব্য কৰি আহিছে৷ এতিয়া দিল্লী-দিছপুৰত একে দলৰ চৰকাৰ আছে৷ মুখ্যমন্ত্ৰী শৰ্মা কেন্দ্ৰীয় চৰকাৰৰ অতি ঘনিষ্ঠ৷ তেনেস্থলত অসমৰ অবৈধ বিদেশী নাগৰিকৰ সমস্যাৰ লগতে নাগৰিকপঞ্জীৰ বিষয়টোৰ যদি কোনো সমাধান নহয়, ই হ’ব অত্যন্ত দুৰ্ভাগ্যজনক৷ মুখ্যমন্ত্ৰী শৰ্মাৰ লগতে বিজেপিৰ একাংশ নেতাই বিদেশী বহিষ্কৰণৰ ভিত্তিবৰ্ষ আৰু নাগৰিকপঞ্জীৰ ভিত্তিবৰ্ষ ১৯৫১ হ’ব লাগে বুলি কৈ আহিছে৷ অসমৰ খিলঞ্জীয়া মানুহে বিদেশী বহিষ্কৰণৰ ভিত্তিবৰ্ষ ১৯৫১ হ’লে সুখী হ’ব৷ কিন্তু ভিত্তিবৰ্ষ যদি ১৯৫১ হয়, তেতিয়া অন্য এক সমস্যা আছে৷ প্ৰথম সমস্যা হ’ল, অসমৰ উজনি, মধ্য আৰু কেতবোৰ অঞ্চলত ১৯৫১১ নাগৰিকপঞ্জীখন পাবলৈ নাই৷ দ্বিতীয়তে মেঘালয়, মণিপুৰ, অৰুণাচল, নাগালেণ্ড, মিজোৰাম, ত্ৰিপুৰা বৰ অসমৰ অন্তৰ্ভুক্ত আছিল৷ এই বিষয়টো অত্যন্ত গুৰুত্বপূৰ্ণ৷