মৰিগাঁৱৰ লাহৰীঘাট উন্নয়ন খণ্ডৰ অন্তৰ্গত টেঙাগুৰি গাঁও পঞ্চায়তৰ সমূহীয়া ভৱনত সোমবাৰে বিশেষ বাবে সক্ষম লোক সকলে কেবাটাও দাবী সম্বলিত কাৰ্যসূচীৰে এখন  সভা অনুষ্ঠিত কৰে। সভাত উপস্থিত থাকে লাহৰিঘাট উন্নয়ন খণ্ডৰ খণ্ড বিষয়া।বিশেষ ভাৱে সক্ষম উন্নয়ন সমিতিয়ে চৰকাৰৰ কেইবাটাও গুৰুত্বপূৰ্ণ বিভাগৰ বিষয়া আমন্ত্ৰণ জনায় যদিও কোনো এটা বিভাগৰ পৰা সাহাৰি নোপোৱাত ক্ষোভ প্ৰকাশ সমিতিৰ ‌সভাপতি আতাবুৰ ৰহমানৰ।ইপিনে লাহৰিঘাট সমষ্টিৰ বিধায়ক ডাঃ আছিফ নাজাৰেও সভাত উপস্থিত থকাৰ কথা আছিল যদিও উপস্থিত নথকাত বিশেষ ভাৱে সক্ষম লোক সকলক অৱমনা কৰিছে বুলি  সভাপতি মন্তব্য আগবঢ়ায়। বিধায়ক পুজিৰ  ধন বিশেষ ভাৱে সক্ষম লোকক নিদিয়াৰ পৰিকল্পনাৰেই বিধায়ক জন  সভাত উপস্থিত নথকাৰ অভিযোগ উত্থাপিত কৰিছে সভাপতি আতাবুৰে।

সোমবাৰে মৰিগাঁও মহাবিদ্যালয়ৰ ছাত্ৰ সন্থা গোটৰ উদ্যোগত আৰু সমূহ ছাত্ৰ ছাত্ৰীৰ সহযোগত মহাবিদ্যালয়ৰ অধ্যক্ষ, উপাধ্যক্ষ আৰু বন বিষয়া গৰাকীৰ উপস্থিতিত আজি মহাবিদ্যালয় প্ৰাংগণত ছাত্ৰ ছাত্ৰী সকলৰ মাজত ৫০০ গছপুলি বিতৰণ কৰা হয়। মহাবিদ্যালয়ৰ ছাত্ৰ সন্থাৰ গোটৰ এনে প্ৰচেষ্টাক শলাগ লয় সচেতন মহলে।

ওদালগুৰি জিলা টংলাথানা অন্তৰ্গত টংলা জলাহ পলাহগড়ৰ  মহেন্দ্ৰ ডেকা আৰু সুশিলা ডেকাৰ একমাত্ৰ পুত্ৰ বিকাশ ডেকাই গুৱাহাটীলৈ যাও বুলি আলফাত যোগদান হোৱা খৱৰক লৈ বৰ্তমান বিকাশ ডেকাৰ ঘৰত শোকাকুল পৰিবেশ।প্ৰাপ্ত খৱৰ অনুসৰি টংলা থানাৰ অন্তৰ্গত জলাহ পলাগড়ৰ মহেন্দ্ৰ ডেকা আৰু সুশিলা ডেকাৰ একমাত্ৰ পুত্ৰ বিকাশ ডেকা গুৱাহাটীলৈ যাও বুলি যোৱা মঙলবাৰ ১৬ নৱেম্বৰ দিনাই ঘৰৰ পৰা ওলাই গৈছিল কিন্তু সেইদিনা ঘৰলৈ উভতি আহিব নোৱাৰো বুলি মাকক ফোন কৰিছিল যদিও পিছদিনা ১৭ নৱেম্বৰ দিনা ঘৰত আহিব বুলি মাকক কথা দিছিল কিন্তু সেইদিনাও ঘৰত নাহো বুলি ফোন কৰি তেনেকৈ প্ৰায় শুক্ৰবাৰ ১৯  নৱেম্বৰলৈ থাকিল তাৰ পিছত ফোন অফ ৰখাত পিতৃ মাতৃ চিন্তিত হৈ আছিল।তেনেতে দেওবাৰদিনা নিশা পৰিয়ালৰ সম্পৰ্কীয় এজন দদায়েকে আহি খৱৰটো পিতৃ  মাতৃক দিয়া অনুসৰি বিকাশ ডেকা গুৱাহাটীলৈ যাও বুলি নাগালেণ্ডৰ মন জিলাত  আলফাত যোগদান কৰিছে বুলি জানিব দিয়ে।ফলত নিৰক্ষৰ পিতৃ মাতৃ এতিয়া উপায়ন্তৰ হৈ পৰিছে, জুবিন বুলি কলে পাগল ফুল কুমলীয়া ২১ বছৰ বয়সীয়া বিকাশ ডেকা নম্ৰ সহনশীল দয়ালো অনবৰতে সংগীতৰ লগত জড়িত হৈ ভাল পোৱা বিকাশে ঢোল,গীতাৰ,গান গোৱাৰ ওপৰিও পবিত্ৰ ৰাভাৰ দাপোন গোষ্ঠীৰ লগত জড়িত আছিল। কিন্তু কি কাৰনত বিকাশ ডেকাই এনে পথ বাছি ললে সেয়া এক ৰহস্য জনক হৈ পৰিছে। সেয়েহে  অসুখীয়া পিতৃ-মাতৃ পৰিয়ালটোৰ উপাৰ্জনৰ এক মাত্ৰ লৰা বিকাশ ডেকাক ঘূৰাই আনিবলৈ চৰকাৰক কৰজোৰে আহ্বান জনাইছে পৰিয়ালৰ লোকে

 কোকৰাঝাৰ জিলাৰ ঐতিহ্যমণ্ডিত দেৱৰগাঁও উচ্চতৰ মাধ্যমিক বিদ্যালয়ত মধ্যাহ্ন ভোজনৰ চাউল পুতি থোৱা কেন্দ্ৰক কৰি বিদ্যালয়খনত আজি উত্তপ্ত পৰিৱেশৰ সৃষ্টি হয় । ছাত্ৰ-ছাত্ৰীক মধ্যাহ্ন ভোজনৰ পৰা বঞ্চনা কৰি মধ্যাহ্ন ভোজনৰ চাউল নিশা গোপনে বিদ্যালয় প্ৰাংগনত পুতি থোৱাক কেন্দ্ৰ কৰি একাংশ অভিভাৱক ক্ষুব্ধ হৈ পৰিছে । ছাত্ৰ ছাত্ৰীৰ পেটৰ ভাত কাঢ়ি নি চাউল পুতি থোৱা দেৱৰগাঁও উচ্চতৰ মাধ্যমিক বিদ্যালয়ৰ অধ্যক্ষ হৰিশ চন্দ্ৰ ছেত্ৰীৰ বিৰুদ্ধে ব্যৱস্থা গ্ৰহণৰ দাবী উত্থাপন কৰিছে একাংশ অভিভাৱকে । উল্লেখ্য যে বিদ্যালয় চৌহদত দূৰ্গোন্ধ বিয়পি পৰাত আৰু বিদ্যালয় পৰিচালনা সমিতিৰ সন্মতিত বিদ্যালয়ৰ অধ্যক্ষই নিশা হাজিৰা লগাই মধ্যাহ্ন ভোজনৰ ১৭ কুইণ্টলকৈ চাউল পুতি থোৱা বিষয়ে গম পাই আজি একাংশ অভিভাৱকে সাংবাদিকক অৱগত কৰে আৰু মাটি খান্দি পচি যোৱা চাউল বাহিৰ কৰে । অভিভাৱকসকলে ক্ষুব্ধ হৈ সংবাদমাধ্যমৰ আগত কয় যে বিদ্যালয়খনৰ অধ্যক্ষই ছাত্ৰ ছাত্ৰীক নিয়মিতভাৱে মধ্যাহ্ন ভোজন পৰিৱেশন নকৰে । ৩৩২ জন ছাত্ৰ ছাত্ৰী থকা আৰু ছজনকৈ ৰান্ধনী আৰু সহায়িকা থকা বিদ্যালয়খনত এনেদৰে মধ্যাহ্ন ভোজনৰ চাউল পুতি থোৱাক কেন্দ্ৰ কৰি প্ৰতিক্ৰিয়াৰ সৃষ্টি হৈছে । ইপিনে বিদ্যালয়খনৰ অধ্যক্ষ হৰিশ চন্দ্ৰ ছেত্ৰীৱে কয় যে খোৱাৰ বাবে অনুপযোগী হোৱা চাউলখিনি বিদ্যালয় পৰিচালনা সমিতিৰ প্ৰস্তাৱ আৰু সিদ্ধান্তমৰ্মে চাউলখিনি পুতি থোৱা হৈছিল বুলি মন্তব্য কৰে । উক্ত চাউলখিনি ২০১৯ চনৰ আছিল বুলি মন্তব্য কৰি অধ্যক্ষই গুদামঘৰৰ আন্ত:গাঁথনি সন্দৰ্ভতো তীব্ৰ অসন্তুষ্টি প্ৰকাশ কৰে । বিভাগীয়ভাৱে নিৰ্মান কৰা গুদালঘৰৰ আন্তগাঁথনি মুঠেই সন্তোষজনক নহয় আৰু পানী নিগৰি আহি চাউল নষ্ট হয় বুলি মন্তব্য কৰি চাউলৰ গুদামঘৰত নিগনিৰ উপদ্ৰৱৰ বাবে চাউল নষ্ট হোৱা বুলি মন্তব্য কৰি অধ্যক্ষই বেয়া হোৱা চাউলখিনি ছাত্ৰ -ছাত্ৰীক খুৱাই ছাত্ৰ ছাত্ৰীক মাৰি পেলাব নোৱাৰে বুলি মন্তব্য কৰিছে । তদুপৰি ৰান্ধনি আৰু সহায়িকা কেতিয়াবা নাহে  যাৰ পৰিণতিতে চাউল ৰাহী হৈ নষ্ট হয় বুলি মন্তব্যৰে ৰান্ধনি – সহায়িকাৰ ওপৰত অধ্যক্ষৰ নিয়ন্ত্ৰণ নাথাকে আৰু ৰান্ধনি নাহিলে অধ্যক্ষই ৰান্ধি খুয়াব নেকি বুলি প্ৰশ্নও উত্থাপন কৰে অধ্যক্ষই । ইপিনে বিটিচৰ শিক্ষা বিভাগৰ সঞ্চালক জেপি ব্ৰহ্মই ঐতিহ্যমণ্ডিত দেৱৰগাঁও উচ্চতৰ মাধ্যমিক বিদ্যালয়ত মধ্যাহ্ন ভোজনৰ চাউল পুতি থোৱা ঘটনাৰ তদন্ত কৰা হব বুলি মন্তব্য কৰি ইতিমধ্যে কাৰণ দৰ্শোৱাৰ জাননি জাৰি কৰা হৈছে বুলি মন্তব্য প্ৰকাশ কৰিছে ।

-ডিগবৈ বন সংমণ্ডলৰ অধীনৰ লেখাপানী আঞ্চলিক বন বিভাগে আজি এক গোপন সূত্ৰৰ ভিত্তিত তদন্ত চলাই বালিজান সংৰক্ষিত বনাঞ্চলৰ পৰা প্ৰায় ৩০ চি এফটি চোৰাং কাঠ আৰু এটা অত্যাধুনিক চেইন-স্ব জব্দ কৰিবলৈ সক্ষম হয়। অবৈধ ভাৱে কাটি মজুদ কৰি ৰখা কাঠখিনিৰ গৰাকীক অৱশ্যে বন বিভাগে আটক কৰিবলৈ সক্ষম নহল।তিনিদিন নেৰানেপেৰা তদন্তৰ অন্তত কাঠখিনি জব্দ কৰিবলৈ সক্ষম হৈছে বন বিভাগ।ডিগবৈ বন সংমণ্ডলৰ অধীনৰ বিশেষকৈ লেখাপানী আৰু জাগুন সংৰক্ষিত বনাঞ্চলত একাংশ বন দস্যুৱে জধে মধে মূল্যবান গছ সমূহ এফালৰ পৰা কাটি তহিলং কৰি আহিছে।এই ক্ষেত্ৰত লেখাপানী আৰু জাগুন আঞ্চলিক বন বিভাগে দিন ৰাতি একাকাৰ কৰি দায়িত্ব পালন কৰি আহিছে যদিও বন দস্যুক বন বিভাগৰ গতি বিধিৰ খবৰ যোগান ধৰা দালাল কেইজনমানৰ বাবেই আজি পৰ্যন্ত বন দস্যু কেইটা আটক কৰিব পৰা নাই বন বিভাগে।এই ক্ষেত্ৰত বনাঞ্চল সমূহ ৰক্ষা কৰাৰ স্বাৰ্থত অসম চৰকাৰ তথা বিভাগীয় মন্ত্ৰী জনে কিছু অত্যাধুনিক প্ৰযুক্তিৰ ব্যৱস্থা কৰাৰো প্ৰয়োজনীয়তা আছে। যদি এনেধৰণেই বন বিভাগৰ বিষয়া কৰ্মচাৰীয়ে দায়িত্ব পালন কৰিব লগীয়া হয় তেন্তে কোনো কাৰণতে নিমিত্ত মাত্র কেইজনমান বিষয়া কৰ্মচাৰীৰে এক বৃহত্তৰ মাটিকালিৰে পৰিবেষ্টিত বনাঞ্চল ৰক্ষা কৰাটো অসম্ভৱ হিচাপে এদিন প্ৰমাণিত হোৱাটো নিশ্চিত।